ହୃଦୟଥରା ହତ୍ୟାକାଣ୍ଡ ସହ 10 ବର୍ଷର ଆକ୍ରୋଶର ଅନ୍ତ, ପାଟଣାଗଡ଼ ହତ୍ୟାକାଣ୍ଡରେ ବନ୍ଧା ହେଲେ 7 ହତ୍ୟାକାରୀ

ପାଟଣାଗଡ଼ ଗଣହତ୍ୟାର ପର୍ଦ୍ଦାଫାସ। 3 ପରିବାର ମିଶି ରଚିଥିଲେ ହତ୍ୟାକାଣ୍ଡର ଷଡ଼ଯନ୍ତ୍ର। 10 ନଭେମ୍ବରର ଥିଲା ଜାନି ପରିବାର ପାଇଁ ମୃତ୍ୟୁର ରାତି। ସମୟ ରାତି 8ଟା... । ବୁଲୁ ଜାନିଙ୍କ ଘର ପାଖରେ ପହଞ୍ଚିଥିଲେ 9 ହତ୍ୟାକାରୀ। ନବରଙ୍ଗପୁରରୁ 4, ନିର୍ଲାରୁ 2 ଓ ପାଟଣାଗଡ଼ରୁ ଥିଲେ 3 ଜଣ ।  ସମସ୍ତେ ଥିଲେ ଗଣ୍ଡ, ଜାନି ଓ ମାଝି ପରିବାରର। ଦୀର୍ଘ ଦିନର ପାରିବାରିକ ଆକ୍ରୋଶର ଅନ୍ତ କରିବାକୁ ଅକ୍ଟୋବରରୁ ଚାଲିଥିଲା ପ୍ଲାନିଂ। ହତ୍ୟାକାଣ୍ଡ ରାତି ପ୍ରାୟ 11.30ରେ ପରିସ୍ରା ପାଇଁ ବାହାରକୁ ଆସିଥିଲେ ବୁଲୁ ଜାନି । ସେତେବେଳେ ତାଙ୍କ ଉପରକୁ ଚାଲିଥିଲା ଗୁଳି କିନ୍ତୁ ବଞ୍ଚିଯାଇଥିବା ବୁଲୁ ଘରେ ପଶିଯାଇଥିଲେ । ତାଙ୍କ ପଛେ ପଛେ ଯାଇଥିଲେ ହତ୍ୟାକାରୀ । ପାଖରେ ଥିବା ମାରଣାସ୍ତ୍ରରେ ଘରକୁ କରିଥିଲେ ରକ୍ତରଞ୍ଜିତ। ନଭେମ୍ବର 10 ତାରିଖରେ ଶ୍ମଶାନ ପାଲଟିଥିଲା ବୁଲୁ ଜାନିଙ୍କ ଘର। ରକ୍ତ ରଞ୍ଜିତ ଘରେ ସବୁ ଦିନ ପାଇଁ ଶୋଇଯାଇଥିଲେ ବାପା, ମାଆ, 3 ପୁଅ ଓ ଝିଅ। ଶେଷରେ ସଅଁରପଡ଼ାର ବନ୍ଦକୋଠରୀ ଭିତରେ ଥିବା ମୃତ ରହସ୍ୟ ଉପରୁ ହଟିଛି ପରଦା। ଆଉ ସାମ୍ନାକୁ ଆସିଛି ମୃତ୍ୟୁ ପଛର ବିଚିତ୍ର କାରଣ । କାରଣ ଥିଲା ପିଲାଙ୍କୁ ମାରିଦିଅ...ନ ହେଲେ ସେମାନେ ବଡ଼ ହେଲେ ଆମକୁ ମାରିବେ। ଏଭଳି କାରଣ ସହ ଗୋଟିଏ ପରିବାରକୁ କରିଦିଆଗଲା ନିଶ୍ଚିହ୍ନ। କେବଳ ସେତିକି ନୁହେଁ ମାରିବା ପରେ ସୁନା ପାଇଁ ଖୋଳିଥିଲେ ଘର।