କୁମ୍ଭାର ଗଢୁଥିବା ହାତ ଗଢ଼ା ମାଟି ଦୀପ ଆଡ଼କୁ ଗ୍ରାହକଙ୍କ ନଜର ନାହିଁ। ଗୋଟିଏ ପଟେ ଲକଡାଉନ ପାଇଁ ଦୀପ ବେପାର ଏକପ୍ରକାର ଠପ୍ ହୋଇଯାଇଥିବା ବେଳେ କୁମ୍ଭକାରମାନେ ବେରୋଜଗାର ହୋଇ ପଡ଼ିଥିଲେ। ଆଶା ଥିଲା ଦୀପାବଳିରେ କିଛି ରୋଜଗାର କରିବେ। ମାତ୍ର ତାହା ବି ଆଶାନୁରୂପ ହେଉନାହିଁ ବୋଲି କହିଛନ୍ତି ଦୀପ କାରିଗର।
ଗରିବ ଓ ସ୍ବଳ୍ପ ରୋଜଗାରିଆ ଗ୍ରାହକଙ୍କୁ ବାଦ୍ ଦେଲେ, ସ୍ବଚ୍ଛଳ ବର୍ଗର ଗ୍ରାହକମାନେ ଅଧିକ ଦାମ୍ରେ ଦେଇ ରଙ୍ଗିନ୍ ଦୀପ ଓ ରଙ୍ଗିନ୍ ଆଲୋକମାଳା କିଣିବାରେ ଲାଗିଛନ୍ତି। ଦୀପାବଳି ଆସିବାର ମାସେ ପୂର୍ବରୁ ଆରମ୍ଭ ହୋଇଯାଏ ଦୀପ ତିଆରି । ବିଭିନ୍ନ ପ୍ରକାରର ଦୀପ ତିଆରି କରି ନିଜ ପରିବାର ପ୍ରତିପୋଷଣ କରନ୍ତି ।
କିନ୍ତୁ ଏବେ ନାହିଁ ପୂର୍ବ ଭଳି ବେପାର। କୁମ୍ଭକାରଙ୍କ କହିବା ଅନୁସାରେ ଦୀପ ତିଆରି ତାଙ୍କର କୌଳିକ ବୃତ୍ତି। ଦୀପ ତିଆରି ଖର୍ଚ୍ଚ ବଢ଼ୁଛି, ଅଥଚ ବିକ୍ରି କମୁଛି। ଅଥଚ ବଜାରରେ ବାହାର ରାଜ୍ୟରୁ ଆସୁଥିବା ଦୀପକୁ ଲୋକେ ଚଢ଼ା ଦରରେ କିଣୁଛନ୍ତି। ଅଧିକ ସଂଖ୍ୟାରେ ମାଟି ଦୀପ ବିକ୍ରି ନ ହେଲେ, ସେମାନଙ୍କ ପାରିଶ୍ରମିକ ମିଳୁନାହିଁ।
