ଏବେ ପଡ଼ୋଶୀ ପାକିସ୍ତାନରେ ଗୃହଯୁଦ୍ଧର ପରିସ୍ଥିତି ସୃଷ୍ଟି ହୋଇଛି । ୨୦୧୮ରେ କ୍ଷମତାକୁ ଆସିଥିବା ଇମ୍ରାନ୍ ଖାନ୍ ସରକାର ଏବେ ଅଡ଼ୁଆରେ ପଡିଛନ୍ତି । ଦେଶରେ ବଢ଼ିଥିବା ଦୁର୍ନୀତି, ଦରଦାମ୍ ବୃଦ୍ଧି, ଖରାପ ଅର୍ଥନୈତିକ ସ୍ଥିତି, ଦୁବଳ ସ୍ୱାସ୍ଥ୍ୟସେବା ଏବଂ ଶାସନ ପ୍ରଶାସନରେ ସେନାର ହସ୍ତକ୍ଷେପ ପାଇଁ ଇମ୍ରାନ୍ ବିରୋଧିଙ୍କ ଟାର୍ଗେଟରେ ରହି ଆସିଛନ୍ତି । ଏପରିକି ଅନ୍ୟ ଇସଲାମିକ୍ ଦେଶଗୁଡ଼ିକ ସହ ଭାରତର ସମ୍ପର୍କ ବଢ଼ୁଥିବା ବେଳେ ପାକିସ୍ତାନର ସମ୍ପର୍କ ଖରାପ ହେବାରେ ଲାଗିଛି ଯାହା ଇମ୍ରାନଙ୍କ ପାଇଁ ନିଜ ଦେଶରେ ମୁଣ୍ଡବିନ୍ଧାର କାରଣ ପାଲଟିଛି । ଚୀନ ସହିତ ବନ୍ଧୁତା ତାଙ୍କ ପାଇଁ କୌଣସ ଦୃଷ୍ଟିରୁ ଲାଭଦାୟକ ସାବ୍ୟସ୍ତ ହୋଇପାରିନି ।
ଇମ୍ରାନଙ୍କ ବିରୋଧରେ ଗତ ସେପ୍ଟେମ୍ବରରେ ଏକାଠି ହୋଇଥିବା ୧୧ ଦଳିଆ ମେଂଟ ପାକିସ୍ତାନ ଡେମୋକ୍ରାଟିକ୍ ମୁଭ୍ମେଂଟ୍ ଏହା ମଧ୍ୟରେ ଦେଶର ବିଭିନ୍ନ ସ୍ଥାନରେ ରାଲିର ଆୟୋଜନ କରି ସାରିଲାଣି । ଗତ ସପ୍ତାହର ଦୁଇଟି ରାଲିରେ ଯୋଗ ଦେଇଥିବା ବିଶାଳ ଜନସଂଖ୍ୟା ଇମ୍ରାନ୍ ଖାନ୍ ଏବଂ ସେନାମୁଖ୍ୟ କମର ଜାଭେଦ୍ ବାଜୱାଙ୍କୁ ଘୋର ଚିନ୍ତାରେ ପକେଇଛି ।
ତେବେ ସେଠାକାର ପୁଲିସ୍ ଏବଂ ସେନା ମଧ୍ୟରେ ଆରମ୍ଭ ହୋଇଥିବା ମୁକାବିଲା ସବୁଠୁଁ ଅଡ଼ୁଆ ପରିସ୍ଥିତି ସୃଷ୍ଟି କରିଛି । କରାଚୀର ବିଶାଳ ରାଲି ପରେ ଗତ ୧୯ ତାରିଖ ଦିନ ପୂର୍ବତନ ପ୍ରଧାନମନ୍ତ୍ରୀ ନୱାଜ୍ ସରିଫଙ୍କ ଜ୍ୱାଇଁ ମହମ୍ମଦ ସଫଦର୍ ଅୱାନଙ୍କୁ ସିନ୍ଧ ପୁଲିସ୍ ଗିରଫ କରିଥିଲା ।ପରେ ଜଣା ପଡ଼ିଥିଲା ପାକିସ୍ତାନ ସେନା ସିନ୍ଧପ୍ରଦେଶର ପୁଲିସ୍ ଆଇଜିଙ୍କୁ ଅପହରଣ କରି ସଫଦରଙ୍କୁ ଗିରଫ ପାଇଁ ଚାପ ପକେଇଥିଲା । ଏହାପରେ ସିନ୍ଧରେ ସେନା ବିରୁଦ୍ଧରେ ପୁଲିସ୍ ବାହିନୀ ତାତି ଉଠିଥିଲେ । ଏବେ ସେଠାରେ ଆଇଜିଙ୍କ ସମେତ ପୁଲିସ୍ର ସମସ୍ତ ବଡ଼ ବଡ଼ ଅଧିକାରୀ ପ୍ରଦିବାଦ ସ୍ୱରୂପ ଛୁଟିରେ ରହିବାକୁ ଆବେଦନ କରିଛନ୍ତି ।
ଏହାରି ମଧ୍ୟରେ ଗତ ବୁଧବାର ସକାଳେ କରାଚୀରେ ଏକ ବିଷ୍ଫୋରଣ ହୋଇଥିଲା ଯେଉଁଥିରେ ୫ ଜଣ ମୃତ୍ୟୁବରଣ କରିବା ସହିତ ୨୦ ଜଣ ଆହତ ହୋଇଛନ୍ତି । ପାକିସ୍ତାନର ଗଣମାଧ୍ୟମ ଏବଂ ପୁଲିବାହିନୀର ନଜର ହଟେଇବା ପାଇଁ ସେନା ଏହି ବିଷ୍ଫୋରଣ ଘଟେଇଥିବାର ଜଣାପଡ଼ିଛି । ଏହି ଘଟଣା ପରେ ଏବେ ସେନା ଏବଂ ସରକାରଙ୍କୁ ଘେରିବା ପାଇଁ ବିରୋଧି ମେଣ୍ଟର ସୁଯୋଗ ପାଇଛି । ସେଠାରେ ବିରୋଧି ମେଣ୍ଟ,ସାଧାରଣ ଜନତା ଏବଂ ପୁଲିସ୍ର ମିଳିତ ବିଦ୍ରୋହ ଗୃହଯୁଦ୍ଧର ଆଶଙ୍କା ସୃଷ୍ଟି କରିଛି ।
