ଗବେଷଣା ଅନୁଯାୟୀ କରୋନା ଆକ୍ରାନ୍ତଙ୍କ ଝାଡ଼ା, ପରିସ୍ରାରେ ବି ଭୂତାଣୁ ବାହାରନ୍ତି। ଯଦି ଆକ୍ରାନ୍ତଙ୍କ ଝାଡ଼ା ପରିସ୍ରାକୁ ସର୍ବସାଧାରଣଙ୍କ ଝାଡ଼ା, ପରସ୍ରା ଯାଉଥିବା ପାଇପରେ ଛଡ଼ାଯିବ ତେବେ ଏହା ସହର ପାଇଁ ବିପଦ ସୃଷ୍ଟି କରିବ । ଆଉ ଏହା ଦ୍ୱାରା କରୋନା ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ବଢ଼ିଯିବ । ଏହି ସମସ୍ୟା ଯେପରି ନହେବ ସେଥିପାଇଁ ଆଇଆଇଟି-ଭୁବନେଶ୍ବରର ଗୋଟିଏ ଟିମ ଏହା ଉପରେ ଗବେଷଣା କରୁଛନ୍ତି ।
ରୋଗୀଙ୍କ ଝାଡ଼ା, ପରିସ୍ରା ସ୍ବେରେଜ ଲାଇନରେ ମିଶିବା ପୂର୍ବରୁ ଏହାକୁ ବିଶୋଧନ କରାଯିବା ଦରକାର। ଏହା କିପରି ସ୍ବତଃସ୍ଫୂର୍ତ୍ତ ଭାବେ ବିଶୋଧନ ହୋଇଯିବ ସେଥିପାଇଁ ସ୍ବତନ୍ତ୍ର ଚାମ୍ବର ପ୍ରସ୍ତୁତ କରାଯାଉଛି । ଏହି ଚାମ୍ବରକୁ ପ୍ରତ୍ୟେକ ରୋଗୀ ବ୍ୟବହାର କରୁଥିବା ଶୌଚାଳୟ କିମ୍ବା ପୂରା ହସ୍ପିଟାଲ ପାଇଁ ଗୋଟିଏ ଚାମ୍ବର ଭାବେ ବ୍ୟବହାର କରାଯାଇପାରିବ।
ଏହି ଚାମ୍ବର ଦେଇ ଯେଉଁ ଝାଡ଼ା, ପରିସ୍ରା ଯିବ ସେଗୁଡ଼ିକ ବିଶୋଧନ ହୋଇ ସ୍ବେରେଜ ଲାଇନରେ ମିଶିଯିବ। ଫଳରେ ସହରବାସୀଙ୍କ ଉପରେ କୌଣସି ବିପଦ ରହିବନି। ଆଇଆଇଟି ଭୁବନେଶ୍ବରର ଗବେଷଣା ରିପୋର୍ଟ ପ୍ରକାଶ ପାଇବା ପରେ ଭୁବନେଶ୍ୱରର ଚିନ୍ତା ବଢ଼ିଯାଇଛି ।
କାରଣ ରାଜଧାନୀରେ ସବୁଠୁ ଅଧିକ କରୋନା ଆକ୍ରାନ୍ତ ଚିହ୍ନଟ ହୋଇଥିବାବେଳେ ଏଠାରେ ଥିବା ହସ୍ପିଟାଲଗୁଡ଼ିକରେ ସ୍ବତନ୍ତ୍ର ଶୌଚାଳୟ କି ଝାଡ଼ା ପରିସ୍ରା ବିଶୋଧନ ହେବାର ବ୍ୟବସ୍ଥା ନାହିଁ। ଅପରପକ୍ଷେ କୋରୋନା ଆକ୍ରାନ୍ତ ସୁସ୍ଥ ହୋଇଯିବା ପରେ ମଧ୍ୟ ସେମାନଙ୍କର ମଳରୁ ଦୀର୍ଘ ଦିନ ପର୍ଯ୍ୟନ୍ତ କୋରୋନା ଭୂତାଣୁ ବାହାରୁଛି ବୋଲି ଗବେଷକମାନେ କହିଛନ୍ତି । ତେଣୁ ଏଥିପ୍ରତି ସରକାର ସଚେତନ ହେବା ଜରୁରୀ ।
