ୟେସ୍‌ ବ୍ୟାଙ୍କରେ ଲୋକଙ୍କ ଟଙ୍କା ସୁରକ୍ଷିତ ଅଛି, ଖୁବ୍‌ଶୀଘ୍ର ବ୍ୟାଙ୍କର ପୁନଃଉଦ୍ଧାର କରାଯିବ: ଶକ୍ତିକାନ୍ତ

ମୁମ୍ବାଇ: ୟେସ୍‌ ବ୍ୟାଙ୍କରେ ଜମା ରହିଥିବା ଲୋକଙ୍କ ଟଙ୍କା ସୁରକ୍ଷିତ ଅଛି । ଖୁବ୍‌ ଶୀଘ୍ର ଏହି ବ୍ୟାଙ୍କର ଆର୍ଥିକ ସଙ୍କଟ ଦୂର ହେବ । ଏନେଇ ଆଜି ଆର୍‌ବିଆଇ ଗଭର୍ଣ୍ଣର ଶଶିକାନ୍ତ ଦାସ କହିଛନ୍ତି । ସେ କହିଛନ୍ତି ୟେସ୍‌ ବ୍ୟାଙ୍କ ପାଇଁ ବିଶେଷ ଭାବେ ଯୋଜନା କରାଯାଉଛି । ଲୋକଙ୍କ ଟଙ୍କା ସେମାନେ ଫେରିପାଇବେ, କୌଣସି ଜମାକାରୀଙ୍କ ଟଙ୍କା ବୁଡ଼ିବ ନାହିଁ । ଆର୍ଥିକ ବ୍ୟବସ୍ଥାର ସୁରକ୍ଷା ନିଶ୍ଚିତ କରିବା ବ୍ୟାଙ୍କର ଲକ୍ଷ୍ୟ । ରିଜର୍ଭ ବ୍ୟାଙ୍କ ଖୁବ୍‌ଶୀଘ୍ର ୟେସ୍‌ ବ୍ୟାଙ୍କର ପୁନରୁଦ୍ଧାର ପାଇଁ ଏକ ଯୋଜନା କରିବ।

ସୂଚନାଯୋଗ୍ୟ, ୟେସ୍‌ ବ୍ୟାଙ୍କର ପରିଚାଳନାରେ ବ୍ୟାପକ ଅନିୟମିତତା ଓ ଆର୍ଥିକ ଦେବାଳିଆ ଅବସ୍ଥାକୁ ଦୃଷ୍ଟିରେ ରଖି ଆରବିଆଇ ଏହା ଉପରେ କଟକଣା ଲାଗୁ କରିଛି । ୟେସ୍ ବ୍ୟାଙ୍କ ଜମାକାରୀଙ୍କ ଅର୍ଥ ଉଠାଣ ଉପରେ ରିଜର୍ଭ ବ୍ୟାଙ୍କ କଟକଣା ଲାଗୁ କରିଛି । ଆରବିଆଇ ପକ୍ଷରୁ ବ୍ୟାଙ୍କର ବୋର୍ଡ ଅଫ୍‌ ଡାଇରେକ୍ଟର୍ସଙ୍କୁ ନିଲମ୍ବନ କରାଯିବା ସହ ଏସ୍‌ବିଆଇର ପୂର୍ବତନ ଡିଏମ୍‌ଡି ତଥା ସିଏଫଓ ପ୍ରଶାନ୍ତ କୁମାରଙ୍କୁ ପ୍ରଶାସକ ରୂପେ ନିଯୁକ୍ତ କରାଯାଇଛି । ଏହା ସହିତ ବ୍ୟାଙ୍କରୁ ଟଙ୍କା ଉଠାଣ ପରିମାଣ ୫୦ ହଜାରକୁ ସୀମିତ କରାଯାଇଛି ।

ତେବେ ଗୋଟିଏ ପଟେ ଶଶିକାନ୍ତ ଜମାକାରୀଙ୍କୁ ସାନ୍ତ୍ୱନା ଦେଇଥିବା ବେଳେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମଧ୍ୟ ସମାନ କଥା କହିଛନ୍ତି । ୟେସ୍‌ ବ୍ୟାଙ୍କ ପାଇଁ ରାସ୍ତା ବାହାର କରାଯାଉଛି । ଲୋକଙ୍କ ଟଙ୍କା ସୁରକ୍ଷିତ ରହିଛି । ଖୁବ୍‌ଶୀଘ୍ର ବ୍ୟାଙ୍କର ସ୍ଥିତି ସୁଧୁରି ବୋଲି ଅର୍ଥମନ୍ତ୍ରୀ କହିଛନ୍ତି ।