କେଉଁଠି, କେତେ ଦିନ ତିଷ୍ଠୁଛି କୋରୋନା ? ଜାଣନ୍ତୁ..

ସମଗ୍ର ବିଶ୍ୱରେ ଘାତକ ସାଜିଥିବା ମହାମାରୀ କରୋନା ଏବେ ଦିନକୁ ଦିନ ଉଗ୍ର ରୂପ ଧାରଣ କରୁଛି । ସମଗ୍ର ବିଶ୍ୱକୁ ଗ୍ରାସ କରିଥିଲେ ମଧ୍ୟ କମିବାର ନା ଧରୁ ନାହିଁ । ଏହି ଶକ୍ତିଶାଳୀ ଭୂତାଣୁକୁ ମାରିବା ପାଇଁ ଏ ପର୍ଯ୍ୟନ୍ତ କୌଣସି ଔଷଧ ବାହାରି ନଥିବାରୁ କରୋନା ରାଜ କରୁଛି ସମଗ୍ର ବିଶ୍ୱରେ । ତେବେ ଏହି କରୋନା ଭାଇରସ କେଉଁଠି କେତେ ଦିନ ବଂଚି ରହିପାରେ । ତାହାକୁ ନେଇ ସାଧାରଣ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି ।

କରୋନା ଉପରେ ଗବେଷଣା କରୁଥିବା ବୈଜ୍ଞାନିକମାନେ କହିଛନ୍ତି ଯେ କରୋନା ଭାଇରସ ପ୍ଲାଷ୍ଟିକ ଓ ଷ୍ଟିଲ ଜିନିଷରେ ତିନିଦିନ ବା 72 ଘଣ୍ଟା ପର୍ଯ୍ୟନ୍ତ ଜୀବନ୍ତ ରହିପାରିବ । ପ୍ଲାଷ୍ଟିକ ଓ ଷ୍ଟିଲ ପାତ୍ରରେ ଲାଗିଥିବା ଭାଇରସ କ୍ରମେ କ୍ରମେ ଦୁର୍ବଳ ହୋଇଯାଏ ଏବଂ ମଣିଷ ଶରୀରରେ ପ୍ରବେଶ କଲେ ମଧ୍ୟ ବିଶେଷ ଶକ୍ତିଶାଳୀ ହୋଇପାରେ ନାହିଁ ବୋଲି ବିଶେଷଜ୍ଞମାନେ କହିଛନ୍ତି । ସେମାନେ ସ୍ୱାସ୍ଥ୍ୟକର୍ମୀମାନଙ୍କୁ ସତର୍କ କରାଇଦେଇଛନ୍ତି ଯେ, ଏହି ଭାଇରସ ବାୟୁମଣ୍ଡଳରେ ରହିପାରେ । ଗତ ମଙ୍ଗଳବାର ଦିନ ନ୍ୟୁ ଇଂଲଣ୍ଡ ଜର୍ଣ୍ଣାଲ ଅଫ ମେଡିସିନରେ ପ୍ରକାଶିତ ଏକ ଗବେଷଣାତ୍ମକ ନିବନ୍ଧରେ କୁହାଯାଇଛି ଯେ ଏହି ଭାଇରସ କାର୍ଡବୋର୍ଡରେ ଏକ ଦିନ ବା 24 ଘଣ୍ଟା ପର୍ଯ୍ୟନ୍ତ ବଂଚି ପାରୁଛି ।

କିନ୍ତୁ ତମ୍ବା ଉପରେ ମାତ୍ର 4 ଘଣ୍ଟା ବଂଚିପାରୁଛି ବୋଲି ଗବେଷକମାନେ କହିଛନ୍ତି । ତେଣୁ କୌଣସି ପାର୍ସଲ ବା କାଗଜରେ ପ୍ୟାକିଂ ହୋଇଥିବା ଜିନିଷରେ ଅତି ଦୁର୍ବଳ ଭାଇରସ ରହିଥାନ୍ତି ଯଦି ପାର୍ସଲ ଦେଉଥିବା ଲୋକଙ୍କର କାଶ କିମ୍ବା ଛିଙ୍କ ହେଉନଥାଏ, ତାହେଲେ ଏହା ସଂକ୍ରମିତ ହେବାର ସମ୍ଭାବନା କମ । ଖାଉଟି ଦୋକାନ ଓ ରେଷ୍ଟୁରାଣ୍ଟରେ ଦିଆଯାଉଥିବା ପ୍ୟାକେଟ ଓ ବ୍ୟାଗ ଦ୍ୱାରା ମଧ୍ୟ ଏହି ଭୂତାଣୁ ସଂକ୍ରମିତ ହେବାର ସମ୍ଭାବନା ରହିଛି ବୋଲି ଭାରଜିନିଆର ବିଶିଷ୍ଟ ସଂକ୍ରାମକ ରୋଗ ଡାକ୍ତର ଲିନସେ ମାର କହିଛନ୍ତି ।

ତେବେ ଏଥିପ୍ରତି ସମସ୍ତେ ସତର୍କ ରହିବାକୁ ସେ ପରାମର୍ଶ ଦେଇଛନ୍ତି । ଯଦି ଲୋକେ ସଚେତନ ହେବେ, ତେବେ ଖାଦ୍ୟ ପଟେକଗୁଡିକୁ ସକ୍ରମଣ ମୁକ୍ତ କରିବା ଦରକାର । ସେହିପରି ସ୍ୱାସ୍ଥ୍ୟକର୍ମୀମାନେ ସ୍ପେଦ୍ୱାରା ନିଜର ଶରୀରକୁ ସଂକ୍ରମଣମୁକ୍ତ କରିବା ଦରକାର । ତେବେ ଏହା ବାୟୁରୁ ସୃଷ୍ଟି ହୁଏ ନାହିଁ ବୋଲି ବିଶେଷଜ୍ଞମାନେ କହିଛନ୍ତି । ଅପରକ୍ଷେ ସିଙ୍ଗାପୁରରୁ ପ୍ରକାଶ ପାଉଥିବା ଜାମା ନାମକ ଏକ ପତ୍ରିକାରେ ମାର୍ଚ୍ଚ 4 ତାରିଖରେ ଏହା ବାୟୁବାହିତ ରୋଗ ବୋଲି ପ୍ରକାଶ ପାଇଥିଲା । କୋରୋନା ଭାଇରସ ବାୟୁରେ ଗତିକରି ପାରେ । ମାତ୍ର ବାୟୁମଣ୍ଡଳରେ ଏହା ଅତିବେଶିରେ ଅଧଘଣ୍ଟାଏ ପାଇଁ ବଂଚି ପାରିବ ବୋଲି ସମସ୍ତେ ଏକମତ ହୋଇଛନ୍ତି । ବାୟୁମଣ୍ଡଳରେ ଏହା ବେଶିସମୟ ବଂଚିପାରୁନଥିବାରୁ, ଏହାର ପ୍ରଭାବ ଖୁବ କମ ରହିଥାଏ । ମାତ୍ର ଦୁର୍ବଳ ଓ ବୃଦ୍ଧ ଲୋକଙ୍କୁ ଆକ୍ରାନ୍ତ କରିବାର ସମ୍ଭାବନା ରହିଛି । ଅପରପକ୍ଷେ ସଂକ୍ରମିତ ଲୋକଙ୍କୁ ଯେଉଁ ପଦ୍ଧତିରେ ଡାକ୍ତର ଓ ସ୍ୱାସ୍ଥ୍ୟକର୍ମୀ ଚିକିତ୍ସା କରୁଛନ୍ତି, ସେମାନେ ସ୍ପେକରି ନିଜର ପୋଷାକପତ୍ର ଓ ଶରୀରକୁ ଭୂତାଣୁମୁକ୍ତ କରିବା ଦରକାର ।

ଯଦି କୌଣସି ରୋଗୀକୁ ଗୁରୁତର ନିମୋନିଆ ହୋଇଥିବା ଜଣାପଡିଲା, ତାହେଲେ ତାଙ୍କୁ ତୁରନ୍ତ ଇନକ୍ୟୁବେଟରରେ ରଖିବା ଜରୁରୀ ବୋଲି ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ ଆଲର୍ଜି ଆଣ୍ଡ ଇନଫେକ୍ସିୟସ ଡିଜିଜ ଭାଇରୋଲୋଜିର ଡକ୍ତର ଭିନସେଣ୍ଟ ମନଷ୍ଟର କହିଛନ୍ତି । ସ୍ୱାସ୍ଥ୍ୟକର୍ମୀମାନେ ନିଜର ସୁରକ୍ଷା ପାଇଁ ବିଭିନ୍ନ ଜିନିଷ ବ୍ୟବହାର କରୁଛନ୍ତି, ସେଗୁଡିକୁ ମଧ୍ୟ ସଂକ୍ରମଣରୁ ମୁକ୍ତ ରଖିବା ଦରକାର । କାରଣ ସେମାନେ ବାହାରକୁ ଆସିବା ପରେ, ଗ୍ଲୋବ୍ସ, ମାସ୍କ, ପୋଷାକ ଆଦିରେ ଲାଗିଥିବା ଛୋଟବଡ ଡ୍ରପଲେଟଗୁଡିକ ବାୟୁମଣ୍ଡଳରେ ପ୍ରବେଶ କରିବେ । ସିଗାରେଟ ଖାଉଥିବା ଲୋକପାଖରେ ଥିବା ଅନ୍ୟ ବ୍ୟକ୍ତିକୁ ଯେପରି ବିଳମ୍ବରେ ହେଉ ବା ଶୀଘ୍ର ହେଉ ଧୂଆଁ ଯାଏ, ଠିକ୍ ସେହିପରି ଏହି ଭାଇରସ ବାୟୁରେ ଯାଇପାରେ । ମାତ୍ର ଦୂରରେ ରହିଥିବା ବ୍ୟକ୍ତିଙ୍କ ପାଖକୁ ଯାଇପାରିବ ନାହିଁ ବୋଲି ବିଶେଷଜ୍ଞାମାନେ କହିଛନ୍ତି । ତେବେ ଏହି ଭୂତାଣୁ ଶତକଡା 40 ଭାଗ ଆଦ୍ରତା ଥିବା ବାୟୁମଣ୍ଡଳରେ ଦୀର୍ଘ ସମୟ ବଂଚିପାରିବ ବୋଲି ବିଶେଷଜ୍ଞମାନେ କହିଛନ୍ତି ।