କେନ୍ଦ୍ର ସରକାରଙ୍କ ବଡ଼ ନିଷ୍ପତ୍ତି, କୋରୋନା ମୃତକଙ୍କ ପରିବାରକୁ ମିଳିବ ୪ ଲକ୍ଷ ସହାୟତା ରାଶି

ନୂଆଦିଲ୍ଲୀ : ସାରା ବିଶ୍ଵରେ ଆତଙ୍କ ଖେଳାଇଛି ମହାମାରୀ କୋରୋନା। ଏନେଇ ଭାରତ ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ଏଣିକି ଦେଶରେ କୋରୋନା ଭୂତାଣୁରେ ସଂକ୍ରମିତ ହୋଇ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ପରିବାରକୁ ୪ ଲକ୍ଷ ଟଙ୍କା ସହାୟତା ରାଶି ଦେବା ପାଇଁ ସରକାର ଘୋଷଣା କରିଛନ୍ତି।

ଚୀନର ଉହାନରୁ ଜାତ ହୋଇଥିବା କୋରୋନା ଭୂତାଣୁରେ ସାରା ବିଶ୍ଵରେ ୧,୩୨,୫୩୬ ଜଣ ସଂକ୍ରମିତ ହୋଇଥିବା ବେଳେ ଏଯାଏଁ ୫ ହଜାରରୁ ଅଧିକ ଲୋକ ମୃତ୍ୟୁବରଣ କଲେଣି। ଏହି କ୍ରମରେ ଭାରତରେ ୮୫ ଜଣ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ ୨ ଜଣଙ୍କର ମୃତ୍ୟୁ ହୋଇଛି।

ସେପଟେ କୋରୋନା ସହ ମୁକାବିଲା କରିବା ପାଇଁ ପଶ୍ଚିମବଙ୍ଗ, ଗୋଆ, ହିମାଚଳ ପ୍ରଦେଶ, ଦିଲ୍ଲୀ, ଓଡ଼ିଶା ଆଦି ରାଜ୍ୟରେ ସମସ୍ତ ସ୍କୁଲ, କଲେଜ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। କେନ୍ଦ୍ର ସରକାର ଏହାକୁ ରାଷ୍ଟ୍ରୀୟ ବିପତ୍ତିକାଳୀନ ସ୍ଥିତି ମଧ୍ୟ ଘୋଷଣା କରିଛନ୍ତି। ସେହିପରି ବାରଣାସୀରେ ଯୋଗୀ ଆଦିତ୍ୟନାଥ କୋରୋନା ଟେଷ୍ଟ ପାଇଁ ୫ଟି ଲ୍ୟାବ୍ ପ୍ରସ୍ତୁତ କରିଛନ୍ତି।