ପାଞ୍ଚଜଣିଆ ମନ୍ତ୍ରୀଗୋଷ୍ଠୀ ଗଠନ, ସେପ୍ଟେମ୍ୱର ପ୍ରଥମ ସପ୍ତାହରେ ପ୍ରଥମ ବୈଠକ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାଞ୍ଚଜଣିଆ ମନ୍ତ୍ରୀଗୋଷ୍ଠୀ ଗଠନ କରିଛନ୍ତି । ଉକ୍ତ ମନ୍ତ୍ରୀଗୋଷ୍ଠୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରବିଶଙ୍କର ପ୍ରସାଦ, ଥାଓ୍ୱର ଚାନ୍ଦ ଗେହଲଟ୍‌, ଜିତେନ୍ଦ୍ର ସିଂହ ଓ ନରେନ୍ଦ୍ର ତୋମାର ରହିଛନ୍ତି । ଏହି ମନ୍ତ୍ରୀଗୋଷ୍ଠୀ ନବଗଠିତ କେନ୍ଦ୍ରଶାସିତ ଅଞ୍ଚଳର ବିକାଶ କାର‌୍ୟ୍ୟକୁ ତ୍ୱରାନ୍ୱିତ କରିବା ପାଇଁ ରୋଡ୍‌ମ୍ୟାପ୍‌ ପ୍ରସ୍ତୁତ କରିବ । ଜମ୍ମୁ କଶ୍ମୀରର ବିକାଶ ପାଇଁ କେନ୍ଦ୍ର ସରକାର ବଡ଼ ପ୍ୟାକେଜ ଘୋଷଣା କରିବାର ଦିନକ ପରେ ପ୍ରଧାନମନ୍ତ୍ରୀ ମୋଦି ଏପରି ପଦକ୍ଷେପ ଗ୍ରହଣ କରିଛନ୍ତି । ଜମ୍ମୁ-କଶ୍ମୀରରେ ଯୁବବର୍ଗଙ୍କୁ ଉପକୃତ କରିବା ସହ ରାଜସ୍ୱ ଆୟ ବୃଦ୍ଧି କରିବା ଭଳି ପ୍ରକଳ୍ପଗୁଡ଼ିକର ଘୋଷଣା କରିବାକୁ ମୋଦି ସରକାର ଅଣ୍ଟା ଭିଡ଼ିଛନ୍ତି ।

ଜମ୍ମୁ କଶ୍ମୀରରୁ ଧାରା ୩୭୦ ଉଚ୍ଛେଦ ପୂର୍ବକ ସ୍ୱତନ୍ତ୍ର ମାନ୍ୟତା ପ୍ରତ୍ୟାହାର ଏବଂ ରାଜ୍ୟକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ବିଭକ୍ତ ପରିପ୍ରେକ୍ଷୀରେ ସେଠାକାର ସ୍ଥିତି ଉପରେ ମନ୍ତ୍ରୀ ଗୋଷ୍ଠୀ କାର‌୍ୟ୍ୟ କରିବ । ବିଶେଷ କରି ଉଭୟ ଜମ୍ମୁ କଶ୍ମୀର ଓ ଲଦାଖର ବିଭିନ୍ନ କ୍ଷେତ୍ରରେ ଉନ୍ନୟନ କାର‌୍ୟ୍ୟ କରିବା ସହିତ ଅର୍ଥନୈତିକ ଓ ସାମାଜିକ ଉନ୍ନତି ଦିଗରେ ନାନା ପଦକ୍ଷେପ ଗ୍ରହଣ ଦିଗରେ ଏହା ଦୃଷ୍ଟି ଦେବ । ସେପ୍ଟେମ୍ୱର ପ୍ରଥମ ସପ୍ତାହରେ ମନ୍ତ୍ରୀ ଗୋଷ୍ଠୀ ପ୍ରଥମ ବୈଠକ ଅନୁଷ୍ଠିତ ହେବ ବୋଲି ସରକାରୀ ସୂତ୍ରରୁ ଜଣାପଡ଼ିଛି । ସୂଚନା ଅନୁସାରେ ମଙ୍ଗଳବାର ୧୫ଟି ମନ୍ତ୍ରଣାଳୟ ଓ ବିଭାଗୀୟ ସଚିବମାନ ଏକ ଗୁରୁତ୍ୱପୂର୍ଣ୍ଣ ବୈଠକରେ ଜମ୍ମୁ କଶ୍ମୀରକୁ ଦୁଇଟି କେନ୍ଦ୍ର ଶାସିତ ଅଞ୍ଚଳରେ ବିଭକ୍ତ ପ୍ରକ୍ରିୟା ସମ୍ପାଦନ କରିବା ଉପରେ ଆଲୋଚନା କରିଥିଲେ ।

ଏଥିସହ ରାଜ୍ୟ ପୁନର୍ଗଠନ ପରେ ଯଥାସମ୍ଭବ ସ୍ଥିତି ସ୍ୱାଭାବିକ ରଖାଯିବ ତଥା କେନ୍ଦ୍ର ସରକାରଙ୍କ ବିଭିନ୍ନ ଯୋଜନା ଓ ପଦକ୍ଷେପ ଜାମ୍ମୁ କାଶ୍ମୀରରେ କାର‌୍ୟ୍ୟକାରୀ କରିବା ସମ୍ୱନ୍ଧରେ ବୈଠକରେ ଆଲୋଚନା ହୋଇଥିଲା । ବିକାଶ କାର‌୍ୟ୍ୟକ୍ରମ ତଥା ଦୁଇ କେନ୍ଦ୍ର ଶାସିତ ଅଞ୍ଚଳ ମଧ୍ୟରେ ସମ୍ପତ୍ତି ଆବଣ୍ଟନ ବୈଠକରେ ଆଲୋଚନାର କେନ୍ଦ୍ରବିନ୍ଦୁ ଥିଲା । ଶୀତ ପୂର୍ବରୁ ଲଦାଖରେ ଆତ୍ୟାବଶ୍ୟକୀୟ ସାମଗ୍ରୀ ଗଚ୍ଛିତ ରଖିବା ଉପରେ ମଧ୍ୟ ଗୁରୁତ୍ୱ ଦିଆଯାଇଥିଲା । ଉଲ୍ଲେଖ ଯେ ଗତମାସରେ ସଂସଦରେ ଗୃହୀତ ହୋଇଥିବା ଜମ୍ମୁ କଶ୍ମୀର ପୁନର୍ଗଠନ ବିଧେୟକ ୨୦୧୯ ଅନୁସାରେ ଗଠିତ ଏହି ଦୁଇ କେନ୍ଦ୍ରଶାସିତ ଅଞ୍ଚଳ ଆସନ୍ତା ଅକ୍ଟୋବର ୩୧ରେ ପୂର୍ଣ୍ଣାଙ୍ଗ ରୂପ ନେବ ।