'ନମୋ'ଙ୍କ ୨ୟ ଇନିଂସ୍‌: କ୍ୟାବିନେଟ୍ ପାହ୍ୟା ପାଇଁ ଆରମ୍ଭ ହେଲା ଫୋନ କଲ୍, ଚର୍ଚ୍ଚାରେ ୪ଟି ପ୍ରମୁଖ ବିଭାଗ

ନୂଆଦିଲ୍ଲୀ: ପୁଣି 5 ବର୍ଷ ଯାଏଁ ଚାଲିବ ନମୋ ସରକାର । ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବାକୁ ଯାଉଛନ୍ତି ନରେନ୍ଦ୍ର ମୋଦି । ଆଜି ସନ୍ଧ୍ୟା 7ଟା ସମୟରେ ରାଷ୍ଟ୍ରପତି ଭବନ ପରିସରରେ ପ୍ରଧାନମନ୍ତ୍ରୀ ଭାବେ ଶପଥ ନେବେ ନମୋ । 2014 ଭଳି ଚଳିତ ଥର ମଧ୍ୟ ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ମନ୍ତ୍ରିମଣ୍ଡଳ ଟିମ୍‌ର ଶପଥ ଗ୍ରହଣ ସମାରୋହ ମେଗା ଇଭେଣ୍ଟ ଭଳି ଆୟୋଜନ କରାଯାଇଛି । କାର୍ଯ୍ୟକ୍ରମରେ ଯୋଗ ଦେବାକୁ 6000 ଅତିଥିଙ୍କୁ ନିମନ୍ତ୍ରଣ କରାଯାଇଛି । ସେହିପରି ଦେଶ ବାହାରୁ ବାଙ୍ଗ୍‌ଲାଦେଶ, ଶ୍ରୀଲଙ୍କା, ମିଆମାର, ଥାଇଲାଣ୍ଡ, ନେପାଳ ଓ ଭୂଟାନ୍‌ରୁ ରାଷ୍ଟ୍ର ମୁଖ୍ୟମାନେ ମୋଦିଙ୍କ ଶପଥ ଗ୍ରହଣ ମେଗା ଇଭେଣ୍ଟରେ ଯୋଗ ଦେବେ । ଏହାଛଡା ସମସ୍ତ ରାଜ୍ୟର ମୁଖ୍ୟମନ୍ତ୍ରୀ ଓ ସାଂସଦଙ୍କୁ ମଧ୍ୟ ନିମନ୍ତ୍ରଣ ଦିଆଯାଇଛି ।

ସୂଚନା ଯେ, ମୋଦିଙ୍କ ନେତୃତ୍ୱରେ ଏନଡିଏ ସରକାର ଦ୍ୱିତୀୟ ଥର ପାଇଁ ଆଜି ସରକାର ଗଢିବା ନେଇ ଶପଥ ନେବ । ଏନେଇ ମୋଦି ସରକାରରେ କେତେ ମନ୍ତ୍ରୀ ରହିବେ, କିଏ କେଉଁ ଦାୟିତ୍ୱ ପାଇବ ? ଏହାକୁ ନେଇ ବିଚାର ବିମର୍ଷ ଜାରି ରହିଛି । ତେବେ ସ୍ୱାସ୍ଥ୍ୟାବସ୍ଥା ଖରାପ ଥିବାରୁ ଅରୁଣ ଜେଟଲୀ ମନ୍ତ୍ରୀ ହେବେ ନାହିଁ ବୋଲି ସ୍ପଷ୍ଟ କରିଛନ୍ତି । ସେହିପରି ସୁଷମା ସ୍ୱରାଜ ମଧ୍ୟ ସ୍ୱାସ୍ଥ୍ୟ ଠିକ୍ ନଥିବା କାରଣରୁ ଦାୟିତ୍ୱ ନଦେବାକୁ ଅନୁରୋଧ କରିଥିବା ଜଣାପଡିଛି । ତେବେ ମୋଦିଙ୍କ ମନ୍ତ୍ରିମଣ୍ଡଳରେ ମୋଟ 17ଜଣ ନୂଆ ଚେହେରାଙ୍କ ସହ 65 ଜଣ ମନ୍ତ୍ରୀଙ୍କୁ ଦାୟିତ୍ୱ ଦିଆଯାଇପାରେ । 2014ରେ 45ଜଣ ମନ୍ତ୍ରୀ ଶପଥ ଗ୍ରହଣ କରିଥିଲେ । କିନ୍ତୁ ପରେ ମୋଟ ମନ୍ତ୍ରୀଙ୍କ ସଂଖ୍ୟା 76 ହୋଇଯାଇଥିଲା । ତେବେ ଚଳିତ ଥର ମୋଦି ଓ ବିଜେପି ଅଧ୍ୟକ୍ଷ ଅମିତ ଶାହଙ୍କ ମଧ୍ୟରେ ପୁଣି ଚାଲିଛି ବୈଠକ । ଏପରିକି ଅମିତ ଶାହ ଅର୍ଥମନ୍ତ୍ରୀ ଭାବେ ଦାୟିତ୍ୱ ନେଇ ପାରନ୍ତି ବୋଲି ମଧ୍ୟ ଆଲୋଚନା କରାଯାଉଛି ।

ମୋଦିଙ୍କ କ୍ୟାବିନେଟ୍‌ରେ କିଏ ରହିବ ସେନେଇ ଆଲୋଚନା ଜାରି ରହିଥିବାବେଳେ ଶାହ-ମୋଦିଙ୍କ ବୈଠକ ମଧ୍ୟ ଶେଷ ହୋଇଛି । ବୈଠକ ପରେ ପିଏମଓ ପକ୍ଷରୁ ଫୋନ କଲ୍‌ ଯିବା ପ୍ରକ୍ରିୟା ଆରମ୍ଭ ହୋଇଯାଇଛି । ଯାହାକୁ ଫୋନ କଲ୍‌ ଯିବ, ସେ ସନ୍ଧ୍ୟା 7ଟା ରାଷ୍ଟ୍ରପତି ଭବନରେ ମୋଦିଙ୍କ ସହ ଶପଥ ନେବେ । ମୋଦିଙ୍କ ଟପ୍ 4ଟି କ୍ୟାବିନେଟ୍ ପାହ୍ୟାକୁ ନେଇ ଆଲୋଚନା ଜୋରଶୋରରେ ଚାଲିଛି । ଗୃହ, ଅର୍ଥ, ପ୍ରତିରକ୍ଷା ଓ ବିଦେଶ ଏହି ପ୍ରମୁଖ 4ଟି ବିଭାଗରେ ମୋଦି କାହାକୁ ରଖିବେ ସେ ନେଇ ସାରା ଦେଶର ନଜର ରହିଛି । ଅନ୍ୟପଟେ ଓଡ଼ିଶାରୁ ନବନିର୍ବାଚିତ ସାଂସଦ ଅପରାଜିତା ଷଡଙ୍ଗୀ ମୋଦିଙ୍କ କ୍ୟାବିନେଟ୍‌ରେ ଚଳିତ ଥର ସ୍ଥାନ ପାଇପାରନ୍ତି ବୋଲି ଆଲୋଚନା କରାଯାଉଛି । ସେହିପରି ଓଡ଼ିଶାର 2 ପୂର୍ବ କେନ୍ଦ୍ରମନ୍ତ୍ରୀ ଜୁଏଲ ଓରାମ ଓ ଧର୍ମେନ୍ଦ୍ର ପ୍ରଧାନ ମଧ୍ୟ ମୋଦିଙ୍କ କ୍ୟାବିନେଟ୍‌ରେ ପୁଣି ରିପିଟ୍ ହେବେ ବୋଲି ଚର୍ଚ୍ଚା ହେଉଛି ।

ଅନ୍ୟପଟେ ନମୋଙ୍କ 2ୟ ଇନିଂସର ଶପଥ ପାଠ ସମାରୋହରେ ଯୋଗ ଦେବାକୁ ଦିଲ୍ଲୀକୁ ଅତିଥିଙ୍କ ସୁଅ ଛୁଟୁଛି । ଦେଶ ତଥା ଦେଶ ବାହାରୁ ନିମନ୍ତ୍ରୀତ ଅତିଥିମାନେ ଦିଲ୍ଲୀ ଆସି ଡେରା ଜମାଇଲେଣି ।