କାମ ଦେଲାନି 'ହୁକୁମ୍ କା ଇକ୍କା', ୯୭ ପ୍ରତିଶତ ଆସନରେ କଂଗ୍ରେସ ହାରିଲା

ନୂଆଦିଲ୍ଲୀ: 2019 ଲୋକସଭା ନିର୍ବାଚନ ଅନେକ ଦୃଷ୍ଟିରୁ ଐତିହାସିକ ନିର୍ବାଚନ ବୋଲି କହିପାରିବା । ଏହି ନିର୍ବାଚନରେ ନେହେରୁ-ଗାନ୍ଧି ପରିବାରର ସବୁଠାରୁ ନୂଆ ସଦସ୍ୟ ପ୍ରିୟଙ୍କା ଗାନ୍ଧି ଭଦ୍ରା ହୁକମ୍ କା ଇକ୍କା ଭାବେ ରାଜନୀତିରେ ଏଣ୍ଟ୍ରି କଲେ । ତେବେ ପ୍ରିୟଙ୍କାଙ୍କ ଆକସ୍ମିକ ରାଜନୀତିରେ ଏଣ୍ଟ୍ରି କଂଗ୍ରେସ କିନ୍ତୁ କୌଣସି ଲାଭ ଦେଇପାରିଲା ନାହିଁ ।

ସୂଚନା ଯେ, ନିର୍ବାଚନର ଠିକ୍ 3 ମାସ ପୂର୍ବରୁ ପ୍ରିୟଙ୍କା କଂଗ୍ରେସର ପ୍ରଚାର ପ୍ରସାର ଦାୟିତ୍ୱ ନେଇଥିଲେ । ଯାହାର କିଛି ଆଖିଦୃଷିଆ ପ୍ରଭାବ ପଡିଲା ନାହିଁ । ଏହି ଲୋକସଭା ନିର୍ବାଚନ ପାଇଁ ସାରା ଦେଶରେ ପ୍ରିୟଙ୍କା ଗାନ୍ଧି 38ଟି ନିର୍ବାଚନୀ ରାଲି କରିଥିଲେ । ଏଥିରୁ 26ଟି ରାଲି କେବଳ ଉତ୍ତରପ୍ରଦେଶରେ, ବାକି ରାଲି ମଧ୍ୟ ପ୍ରଦେଶ, ଦିଲ୍ଲୀ, ଝାରଖଣ୍ଡ ଓ ହରିୟାଣାରେ କରି କଂଗ୍ରେସ ପ୍ରାର୍ଥୀଙ୍କ ପାଇଁ ପ୍ରଚାର ପ୍ରସାର କରିଥିଲେ ପ୍ରିୟଙ୍କା ।  ଭେଟେରାନ୍ ନେତ୍ରୀ ତଥା ପୂର୍ବ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ନାତୁଣୀ ତଥା ରିପ୍ଲିକା ଭାବେ ମଇଦାନକୁ ଓହ୍ଲାଇ ପ୍ରିୟଙ୍କା ମୋଦି ହଟାଓ ଅଭିଯାନ ଆରମ୍ଭ କରିଥିଲେ ହେଁ କୌଣସି ଫଳ ମିଳିଲା ନାହିଁ । ପ୍ରିୟଙ୍କା ଯେଉଁ ଯେଉଁ ଆସନ ପାଇଁ ନିର୍ବାଚନୀ ପ୍ରଚାର ଦାୟିତ୍ୱ ନେଇଥିଲେ, ସେଗୁଡିକ ମଧ୍ୟରୁ ପ୍ରାୟ 97 ପ୍ରତିଶତ ସ୍ଥାନରେ କଂଗ୍ରେସ ପାର୍ଟି ପରାଜିତ ହୋଇଛି ।

ପ୍ରିୟଙ୍କା ଗାନ୍ଧି ପୂର୍ବ ଉତ୍ତରପ୍ରଦେଶର କଂଗ୍ରେସ ପ୍ରଭାରୀ ଭାବେ ଓ ଜ୍ୟୋତିରାଦିତ୍ୟ ସିନ୍ଧିୟାଙ୍କୁ ପଶ୍ଚିମ ଉତ୍ତରପ୍ରଦେଶର ପ୍ରଭାରୀ ଦାୟିତ୍ୱ ଦିଆଯାଇଥିଲା । ଏହାସହ ଉଭୟଙ୍କୁ ପାର୍ଟିର ମହାସଚିବ ପଦ ମଧ୍ୟ ମିଳିଥିଲା । ଉତ୍ତରପ୍ରଦେଶରେ ତ୍ରିମୂଖୀ ଲଢେଇ ହୋଇଥିଲା । ଗୋଟିଏ ପଟେ ମଜବୁତ୍ ବିଜେପି ଅନ୍ୟପଟେ ସପା-ବସପାର ମହାମେଣ୍ଟ ଥିଲା । ଉଭୟଙ୍କ ଉପସ୍ଥିତିରେ ପ୍ରିୟଙ୍କା ଗାନ୍ଧିଙ୍କ ଏଣ୍ଟ୍ରିକୁ କିଛି ଲୋକ ମାଷ୍ଟରଷ୍ଟ୍ରୋକ୍ ବୋଲି କହିଥିଲେ ତ କିଛି କହିଥିଲେ କଂଗ୍ରେସ ବ୍ୟତିବ୍ୟସ୍ତ ହୋଇ ଏଭଳି ନିଷ୍ପତ୍ତି ନେଇଛି ।

ପ୍ରକାଶ ଥାଉ କି, ଉତ୍ତରପ୍ରଦେଶ ସର୍ବଦା ଭାରତୀୟ ରାଜନୀତିର କେନ୍ଦ୍ର ରହିଆସିଛି । ଏପରିକି ଭାୟା ୟୁପି ଦେଇ ଦିଲ୍ଲୀକୁ ରାସ୍ତା ଯାଏ । ରାଜନୀତି ମଇଦାନରେ ସବୁଠାରୁ ଭିଭିଆଇପି ରାଜ୍ୟ ଉତ୍ତରପ୍ରଦେଶ, ଯେଉଁଠି 543ଟି ଲୋକସଭା ଆସନରୁ 80ଟି ଆସନ ରହିଛି । ପୂର୍ବ ୟୁପିରେ ଲୋକସଭା ଆସନ 41ଟି ରହିଛି । ଏଠାରେ ଅନେକ ଭିଭିଆଇପି ଆସନ ମଧ୍ୟ ରହିଛି । ଯେପରି ଅମେଠୀ, ରାୟବରେଲୀ, ଗୋରଖପୁର ଓ ବାରଣାସୀ ।

ତେବେ ଲୋକସଭା ନିର୍ବାଚନ ଫଳ ସହ ଏହା ମଧ୍ୟ ସ୍ପଷ୍ଟ ହୋଇଗଲା ଯେ, ପ୍ରିୟଙ୍କା ଗାନ୍ଧି ଭଦ୍ରାଙ୍କ ଯାଦୁ କାମ କଲାନାହିଁ । ବିଜେପି ଏବଂ ଏନଡିଏକୁ ଜବରଦସ୍ତ ବିଜୟ ହାସିଲ ହୋଇଛି । ଏବଂ ମହାମେଣ୍ଟ ମଧ୍ୟ ଫେଲ୍ ମାରିଲା ।