ମୁକେଶ ସିଂହ କହିଛନ୍ତି ଯେ, ଗତ କିଛି ଦିନ ହେବ ଡିଡିସିର ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି। ସେବେଠାରୁ ଆମ ନିକଟକୁ ଇଣ୍ଟେଲିଜେନ୍ସ ଇନପୁଟ ଆସୁଥିଲା। ନିର୍ବାଚନକୁ ଦୃଷ୍ଟିରେ ରଖି ସୀମାପାର ଆତଙ୍କବାଦୀ ଅନୁପ୍ରବେଶ କରିପାରନ୍ତି ବୋଲି ସୂଚନା ମିଳିଥିଲା। ଏହା ସହ କୌଣସି ବିଶେଷ ଟାର୍ଗେଟ ରଖି ଅସ୍ତ୍ରଶସ୍ତ୍ର ତସ୍କରୀ ହେବାର ଆଶଙ୍କା ଥିଲା। ଯେଉଁ ଆତଙ୍କବାଦୀମାନେ ନିହତ ହୋଇଛନ୍ତି ସେମାନେ ପାକିସ୍ତାନର।
ଆତଙ୍କବାଦୀମାନେ ଅନୁପ୍ରବେଶ କରିପାରନ୍ତି ବୋଲି ସୂଚନା ମିଳିବା ପରେ ସବୁ ସ୍ଥାନରେ ସିଆରପିଏଫ ଯବାନଙ୍କୁ ନିୟୋଜିତ କରାଯାଇଥିଲା। ଏହି ମଧ୍ୟରେ ଚେକିଂ ସମୟରେ ଏକ ଟ୍ରକକୁ ରୋକାଯାଇଥିଲା। ଟ୍ରକର ତଲାଶି କରିବା ବେଳେ ଟ୍ରକ ଚାଳକ ଫେରାର ହେବାକୁ ଚେଷ୍ଟା କରିଥିଲା ଏହି ସମୟରେ ସୁରକ୍ଷାବାହିନୀ ଉପରକୁ ଫାଇରିଂ କରାଯାଇଥିଲା। ଯାହା ପରେ ସେନା ପକ୍ଷରୁ ଜବାବ ଦିଆଯାଇଥିଲା। ପ୍ରାୟ 3 ଘଣ୍ଟା ଯାଏଁ ଏହି ଏନକାଉଣ୍ଟର ହୋଇଥିଲା। ଫଳ ସ୍ଵରୂପ 11ଟି ଏକେ 47 ରାଇଫଲ, ତିନୋଟି ପିସ୍ତଲ, 29 ଗ୍ରେନେଡ, ମୋବାଇଲ ଫୋନ, କମ୍ପାସ, ଗୋଳା ବାରୁଦ ଏବଂ ଅନ୍ୟ ଉପକରଣ ଜବତ ହୋଇଛି। ତେବେ ଏହି ଅପରେଶନରେ ଦୁଇ ଜଣ କନେଷ୍ଟବଳ ଆହତ ହୋଇଛନ୍ତି।
