ସିନ୍ଧିଆଙ୍କୁ କଳା ପତାକା ପ୍ରଦର୍ଶନ କରିଥିବା ୩୫ ଜଣଙ୍କ ବିରୋଧରେ ମାମଲା ରୁଜୁ

ଭୋପାଳ : କଂଗ୍ରେସରୁ ଇସ୍ତଫା ଦେଇ ବିଜେପିରେ ସଦ୍ୟ ଯୋଗ ଦେଇଥିବା ପୂର୍ବତନ ସାଂସଦ ଜ୍ୟୋତିରାଦିତ୍ୟ ସିନ୍ଧିଆଙ୍କୁ କଳା ପତାକା ପ୍ରଦର୍ଶନ କରିଥିବା ୩୫ ଜଣ ଲୋକଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଗତ ଶୁକ୍ରବାର କମଲା ପାର୍କ କ୍ଷେତ୍ର ରାସ୍ତାରେ ସିନ୍ଧିଆ ବିମାନ ବନ୍ଦରକୁ ଯିବା ବେଳେ ତାଙ୍କ ଗାଡ଼ି ଉପରକୁ କିଛି ଦୁର୍ବୃତ୍ତ ପଥର ମାଡ଼ କରିବା ସହ କଳା ପତାକା ପ୍ରଦର୍ଶନ କରିଥିଲେ।

ସେପଟେ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହ୍ଵାନ ଅଭିଯୋଗ ଆଣିଛନ୍ତି ଯେ, ଗତ ଶୁକ୍ରବାର ରାଜ୍ୟସଭା ନିର୍ବାଚନ ପାଇଁ ବିଜେପି ପ୍ରାର୍ଥୀ ଜ୍ୟୋତିରାଦିତ୍ୟ ସିନ୍ଧିଆ ନାମାଙ୍କନ ପତ୍ର ଦାଖଲ କରିବାକୁ ଯିବା ବେଳେ ତାଙ୍କ କାରକେଡ଼ ଉପରକୁ ମରଣାନ୍ତକ ଆକ୍ରମଣ ହୋଇଥିଲା।

ଚୌହ୍ଵାନ କହିଛନ୍ତି ଯେ, କମଲା ପାର୍କ ଅଞ୍ଚଳରେ ସିନ୍ଧିଆଙ୍କ କାର ଅଟକାଇ ତାଙ୍କ କାରକେଡ଼ ଉପରକୁ ପଥର ଫୋପଡ଼ା ଯାଇଥିଲା।