"ମୋକ୍ଷ" ମାସ୍କ ତିଆରି କରି ଚର୍ଚ୍ଚାରେ ଓଡ଼ିଆ ପୁଅ ପୀୟୂଷ

by Rasmita Pradhan

ନୂଆଦିଲ୍ଲୀ : ମହାମାରୀ କରୋନା ସଂକ୍ରମଣ କାରଣରୁ ବିଶ୍ଵବାସୀଙ୍କ ପାଇଁ ମାସ୍କ ଏକ ଅନିବାର୍ଯ୍ୟ ଜିନିଷ ପାଲଟିଲାଣି। ତେବେ ଏହି ମଧ୍ୟରେ ଏକ ସ୍ଵତନ୍ତ୍ର ମାସ୍କ ତିଆରି କରି ଚର୍ଚ୍ଚାକୁ ଆସିଛନ୍ତି ଓଡ଼ିଆ ପୁଅ ଆଇଆଇଟିସିଆନ ପୀୟୂଷ ଅଗ୍ରୱାଲ। ଏନ 95 ସହିତ ଏଆର ଫିଲଟର ବ୍ୟବସ୍ଥା ରହିଛି ଏହି ମାସ୍କରେ। ଏହି ମାସ୍କର ନାମ ମୋକ୍ଷ ରଖାଯାଇଛି। ଏହି ମାସ୍କର ବିଶେଷତ୍ଵ ହେଉଛି- ଏଥିରେ ଦୁଇଟି ପଙ୍ଖା ଲାଗିଛି। ସବୁ ସମୟରେ ଏହା ଆପଣଙ୍କୁ ବିଶୁଦ୍ଧ ବାୟୁ ଯୋଗାଇବ। ଏହି ମାସ୍କରେ ଲାଗିଥିବା ପଙ୍ଖା ଖୁବ୍ ଉନ୍ନତ ଧରଣର। ଏହାଦ୍ଵାରା କୋଣସି ବ୍ୟକ୍ତିକୁ ଶ୍ଵାସକ୍ରିୟାରେ କୌଣସି ସମସ୍ୟା ହେବ ନାହିଁ। ଫ୍ୟାନ ଚାଲିବା ପାଇଁ ଏଥିରେ ରହିଛି ବ୍ୟାଟେରୀ ସୁବିଧା। ଏହାକୁ ଯେକୌଣସି ୟୁଏସବି କେବୁଲ ଦ୍ଵାରା ଚାର୍ଜ କରିପାରିବେ।

ଏନେଇ ପୀୟୂଷ କହିଛନ୍ତି ଯେ, 1981ରେ ଆଇଆଇଟି ଖଡ଼ଗପୁରରୁ ପାସ ହେବା ପରେ ଟାଟା କମ୍ପାନୀ ପକ୍ଷରୁ ଆମେରିକା ରିସର୍ଚ୍ଚ ପାଇଁ ସେ ଯାଇଥିଲେ। ସେଠାରୁ 1984 ରେ ଫେରି ସେ ଆଇଆଇଏମ୍ କୋଲକାତାରେ ନିଜର ଏମବିଏ କୋର୍ସ କରିଥିଲେ। ଏହାପରେ ଆଉ ପଛକୁ ଫେରି ନାହାନ୍ତି। 1987 ରୁ 1989 ମଧ୍ୟରେ ଏକ କମ୍ପୁଟର କମ୍ପାନୀରେ କାମ କରିଥିଲେ। ଏହାପରେ 1989 ରେ ଚାକିରୀ ଛାଡି ଚେନ୍ନାଇରେ ନିଜର ବ୍ୟବସାୟ ଆରମ୍ଭ କରିଥିଲେ। ପୁଣି 1991ରେ ଉତ୍ତରାଖଣ୍ଡରେ ଏକ ଏନଜିଓରେ ଚାକିରୀ କରିଥିଲେ। ପରବର୍ତୀ ପର୍ଯ୍ୟାୟରେ ପୁଣି ଚାଷ ପାଇଁ ମନ ବଳଇଥିଲେ ସେ। 1998 ରେ ନାସିକରେ 10 ଏକର ଜମି ନେଇ ଅଙ୍ଗୁର ଚାଷ କରିଥିଲେ।

2006ରେ ଚାଷ ଜମିକୁ ନେଇ ବିବାଦ ହେବାରୁ ପୁଣି ସେ ଆମେରିକା ପଳେଇ ଥିଲେ। ଯେତେବେଳେ ମନ ଯାହା ଇଛା କରିଛି ମୁଁ କରିଛି ବୋଲି ସେ କହିଛନ୍ତି। ଆମେରିକାରେ ତାଙ୍କୁ ଶାନ୍ତି ନ ମିଳିବାରୁ ସେ ପୁଣି ଭାରତ ଫେରିଥିଲେ। 2008ରେ ଦିଲ୍ଲୀ ଆସି ନିଜର ଜିପିଏସ୍ ଟ୍ରାକିଂ ସିଷ୍ଟମ ବ୍ୟବସାୟ ଆରମ୍ଭ କରିଥିଲେ। ମେଟ୍ରୋ କାର୍ଡ ଭଳି ଦିଲ୍ଲୀ ବସ ସେବା ପାଇଁ ମଧ୍ୟ ସେ ଜିପିଏସ ସିଷ୍ଟମ ଡେଭଲପ କରିଥିଲେ। ପରବର୍ତ୍ତୀ ସମୟରେ ନିଜର କାର୍ଯ୍ୟାଳୟକୁ ସାଇକେଲରେ ଯାଉଥିବା ସମୟରେ ପ୍ରଦୂଷଣକୁ ଲକ୍ଷ କରି ତାଙ୍କର ମାସ୍କ ତିଆରି ପାଇଁ ମନ ବଳିଥିଲା। ଏହାପରେ ଦୁଇ ବର୍ଷର ଗବେଷଣାରେ ସେ ଏହି ମାସ୍କ ପ୍ରସ୍ତୁତ କରି ଏବେ ବଜାରକୁ ଛାଡିଛନ୍ତି। ନିଜର ଅଫିସରେ ପ୍ରାୟ 20 ଜଣ ଲୋକଙ୍କୁ ସେ ନିଯୁକ୍ତି ଦେଇଛନ୍ତି। ଏହା ସହ 15 ଜଣ ସପୋଟିଭ୍ ଷ୍ଟାଫ୍ ମଧ୍ୟ ରଖିଛନ୍ତି।