ଏୟାର୍‌ଷ୍ଟ୍ରାଇକ୍‌ର ପ୍ରମାଣ ନେଇ କଣ କୁହନ୍ତି ଏକ୍ସପର୍ଟସ୍‌...

ନୂଆଦିଲ୍ଲୀ: ଜମ୍ମୁ-କାଶ୍ମୀରର ପୁଲଓ୍ୱାମାରେ ଆତଙ୍କୀ ଆକ୍ରମଣ ପରେ ପାକିସ୍ତାନର ବାଲାକୋଟରେ ଭାରତ ଏୟାରଷ୍ଟ୍ରାଇକ୍ କରି ଆତଙ୍କୀ ଆଡ୍ଡାକୁ ଧ୍ୱଂସ କରିଦେଲା  । ତେବେ ଏହି ଏୟାରଷ୍ଟ୍ରାଇକ୍‌କୁ ନେଇ ବିବାଦ ଥମିବାକୁ ନାଁ ଧରୁନାହିଁ । ଭାରତୀୟ ବାୟୁସେନାର ଏହି ଏୟାରଷ୍ଟରାଇକ୍‌କୁ  ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଯାହାକୁ ନେଇ ସରକାରଙ୍କ ପକ୍ଷରୁ ସ୍ପଷ୍ଟ ଉତ୍ତର ଏଯାବତ ମିଳିନାହିଁ । ତେବେ ସବୁଠାରୁ ବଡ଼ ପ୍ରଶ୍ନ ଏୟାରଷ୍ଟ୍ରାଇକ୍‌ରେ କେତେ ଆତଙ୍କୀ ମରଛନ୍ତି ?

ଭାରତୀୟ ବାୟୁସେନାର ଏୟାଷ୍ଟ୍ରାଇକ୍ ପରେ ବିଦେଶୀ ଗଣମାଧ୍ୟମ ସରକାରଙ୍କ ତଥ୍ୟ ଉପରେ ପ୍ରଶ୍ନ ଉଠାଇଛନ୍ତି । ପରେ ପରେ ବିରୋଧୀ ଦଳ ମଧ୍ୟ ଗଣମାଧ୍ୟମ ଆଳରେ ସରକାରଙ୍କୁ ଆକ୍ରମଣ କରିବାରେ ଲାଗିଛନ୍ତି ।

ଏୟାରଷ୍ଟ୍ରାଇକର ସୂଚନା ମିଳିବା ପରେ ବାଲୋକୋଟରେ 300 ଆତଙ୍କୀ ମରିଥିବା ଖବର ମଧ୍ୟ ଆସିଲା । ପରେ ବିଜେପି ଅଧ୍ୟକ୍ଷ ଅମିତ ଶାହ 250 ଆତଙ୍କୀ ମରିଥିବା ଦାବି କରିଥିଲେ । ଏନେଇ ବିଦେଶ ରାଜ୍ୟ ମନ୍ତ୍ରୀ ଏବଂ ପୂର୍ବ ସେନା ପ୍ରମୁଖ ବି.କେ ସିଂହ କହିଛନ୍ତି ଯେ ଶାହଙ୍କ ଏହା ଏକ ଅନୁମାନ ମାତ୍ର ।

ଅନ୍ୟପଟେ ଏୟାର ଭାଇସ୍ ମାର୍ଶଲ ଆର୍‌ଜିକେ କପୁରଙ୍କ କହିବାନୁସାରେ, ବାୟୁସେନା ଏୟାରଷ୍ଟ୍ରାଇକ୍‌ରେ ଟାର୍ଗେଟ୍ ପୁରା କରିଛି ଏବଂ ଏନେଇ ପ୍ରମାଣ ମଧ୍ୟ ରହିଛି । ସେହିପରି ଅବସରପ୍ରାପ୍ତ ଏୟାର ଭାଇସ ମାର୍ଶଲ କପିଲ କାକ୍‌ଙ୍କ ଅନୁସାରେ, ବାଲାକୋଟରେ କେତେ ଆତଙ୍କୀ ମରିଛନ୍ତି ଏହା ପାକିସ୍ତାନ ଏବଂ ତାର ଗୁଇନ୍ଦା ବିଭାଗ ଏବଂ ଆଇଏସଆଇକୁ ହିଁ ଜଣାଥିବ । ଏହାଛଡା ପାକିସ୍ତାନରେ ଯେଉଁ ଏଜେନ୍ସି ଗ୍ରାଉଣ୍ଡ ଇଣ୍ଟେଲିଜେନ୍ସ ଅଛି ସେ ମଧ୍ୟ ଜାଣିଥିବ ଯେ ପ୍ରକୃତରେ କେତେ ଆତଙ୍କୀ ମରିଛନ୍ତି । ସେହିପରି ରକ୍ଷା ବିଶେଷଜ୍ଞ ସି. ଉଦୟ ଭାସ୍କରଙ୍କ ଅନୁସାରେ ବିଦେଶ ସଚିବ ବିଜୟ ଗୋଖଲେ ଯଦି କହିଛନ୍ତି ଯେ ବଡ ସଂଖ୍ୟାରେ ଆତଙ୍କୀ ମରିଛନ୍ତି, ତେବେ ନିଶ୍ଚିତ ରୂପେ ଏହା ତଥ୍ୟ ଭିତ୍ତିକ ହୋଇଥିବ । ଅପରପଟେ ବାୟୁସେନାର ଏୟାରଷ୍ଟରାଇକ୍‌ ନେଇ ବିରୋଧୀ ଦଳ ସରକାରଙ୍କୁ ମାଗିଛନ୍ତି ପ୍ରମାଣ ।

ଏନେଇ ସରକାରଙ୍କ ପକ୍ଷରୁ ମଧ୍ୟ ପାଲଟା ପ୍ରଶ୍ନ କରାଯାଇଛି ଯେ, ବାୟୁସେନା ଉପରେ କଣ ବିରୋଧିଙ୍କ ବିଶ୍ୱାସ ନାହିଁ?  ତେବେ ଏସବୁ ନେଇ ରକ୍ଷା ବିଶେଷଜ୍ଞ ସି. ଉଦୟ ଭାସ୍କର କହିଛନ୍ତି ହୋଇପାରେ ସରକାର ନିଜର ସର୍ଭିଲାନ୍ସ ତରିକା ସାର୍ବଜନୀନ କରିବାକୁ ଚାହୁଁନାହାନ୍ତି ଏଣୁ ପ୍ରମାଣ ଦେଉନାହାନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ବିଦେଶ ସଚିବ ଯଦି ବୟାନ ଦେଇଛନ୍ତି, ତେବେ ନିଶ୍ଚିତ ଭାବେ କୌଣସି ଇନ୍‌ପୁଟ୍ ଆଧାରରେ ଦେଇଥିବେ ।