ଲୋକସଭା ନିର୍ବାଚନ ୨୦୧୯: ୧୫ଟି VIP ଆସନ ଉପରେ ସମସ୍ତଙ୍କ ନଜର

ନୂଆଦିଲ୍ଲୀ: ନିର୍ବାଚନ ଆୟୋଗ ଦ୍ୱାରା ଲୋକସଭା ନିର୍ବାଚନ ବିଗୁଲ ବାଜିବା ସହ ପ୍ରକୃତ ଲଢେଇ ମଧ୍ୟ ଆରମ୍ଭ ହୋଇଯାଇଛି । ସାତଟି ପର୍ଯ୍ୟାୟରେ ଚଳିତ ବର୍ଷ ନିର୍ବାଚନ ହେବ । ଦେଖିବାକୁ ଗଲେ ନିର୍ବାଚନ  ସମୟରେ ପ୍ରତ୍ୟେକ ଆସନର ନିଜ ନିଜର ମହତ୍ୱ ରହିଛି । କିନ୍ତୁ ଏହା ସତ୍ତ୍ୱେ କିଛି ଏପରି ଭିଆପି ଆସନ ରହିଛି ଯାହା ଉପରେ ସାରା ଦେଶର ନଜର ରହିଥାଏ । ଏସବୁ ଭିଆପି ସିଟ୍‌ରେ କିଏ ଜିତିବ ଆଉ କିଏ ହାରିବ ତାରି ଉପରେ ନେତାଙ୍କ ବି ଫୋକସ୍ । ତେବେ ଆସନ୍ତୁ ଜାଣିବା ଏହି ଭିଆପି ଆସନ ସମ୍ପର୍କରେ ଅଧିକ କିଛି  ।

ବାରଣାସୀ: ବାରଣାସୀରେ ମତଦାନ ଶେଷ ପର୍ଯ୍ୟାୟରେ ଅର୍ଥାତ୍ ମେ 19ରେ ହେବ । 2014ରେ ଏହି ଆସନରୁ ନରେନ୍ଦ୍ର ମୋଦି ପ୍ରଥମ ଥର ପାଇଁ ଲୋକସଭା ନିର୍ବାଚନ ଲଢିଥିଲେ ଏବଂ ବହୁମତରେ ପ୍ରଧାନମନ୍ତ୍ରୀ ଆସନରେ ବସିଥିଲେ । ଏଭଳିସ୍ଥଳେ ଲୋକଙ୍କ ମଧ୍ୟରେ ଏହି ଆସନ ନେଇ ଉତ୍ସୁକତା ଲାଗି ରହିଛି  । କିଏ ଚଳିତ ଥର ଏହି ଆସନରୁ ନିର୍ବାଚନ ମଇଦାନକୁ ଓହ୍ଲାଇବ ଏବଂ କିଏ ବାଜି ମାରିବ ଏହାକୁ ନେଇ ଲାଗିଛି ଚର୍ଚ୍ଚା ।

ଅମେଠୀ ଏବଂ ରାୟବରେଲୀ: କଂଗ୍ରେସର ଗଡ ବୋଲି କୁହାଯାଏ । 2014 ଲୋକସଭା ନିର୍ବାଚନରେ କଂଗ୍ରେସ କେବଳ ଏହି ଦୁଇ ରାଜ୍ୟରେ ନିଜର ପତିଆରା ଜମାଇପାରିଥିଲା । ତେବେ ଚଳିତ ବର୍ଷ କଂଗ୍ରେସ ଏହି ଦୁଇ ସଂସଦୀୟ କ୍ଷେତ୍ରରେ ନିଜ ଲଜ୍ଜା ବଞ୍ଚାଇ ପାରୁଛି କି ନାହିଁ ତାହା ଦେଖିବାକୁ ବାକି ରହିଲା ।

ବଡୋଦରା ଏବଂ ପୁରୀ: ଏହି ଦୁଇଟି ଲୋକସଭା ମଣ୍ଡଳୀରେ ଏପ୍ରିଲ 23ରେ ମତଦାନ ପ୍ରକ୍ରିୟା ହେବ । ତେବେ ଗତ ନିର୍ବାଚନରେ ନରେନ୍ଦ୍ର ମୋଦି ବାରଣାସୀ ସମେତ ବଡୋଦରାରୁ ମଧ୍ୟ ନିର୍ବାଚନ ଜିତିଥିଲେ । ତେବେ ଚଳିତ ବର୍ଷ ଚର୍ଚ୍ଚା ହେଉଛି ଯେ, ବାରଣାସୀ ସମେତ ପୁରୀରୁ ମଧ୍ୟ ମୋଦି ନିର୍ବାଚନ ଲଢିପାରନ୍ତି । ତେବେ ଏନେଇ ସମସ୍ତଙ୍କ ନଜର ରହିଥିବା ବେଳେ ବିଜେପି ପକ୍ଷରୁ କିନ୍ତୁ କୌଣସି ବିଧିବଦ୍ଧ ସୂଚନା ଦିଆଯାଇନାହିଁ ।

ଅମୃତସର: ଏଠାରେ ମେ’19ରେ ନିର୍ବାଚନ ହେବ । ପ୍ରକାଶ ଥାଉ କି, ଏହି ଆସନର ମହତ୍ୱ ଚଳିତ ବର୍ଷ ଆହୁରି ବଢିଯାଇଛି । କାରଣ, ମନମୋହନ ସିଂହ ଏଠାରେ ନିର୍ବାଚନ ଲଢିବାକୁ କଂଗ୍ରେସ ପ୍ରସ୍ତୁତି ଚଳାଇଛି । 2014 ଲୋକସଭା ନିର୍ବାଚନରେ ଏଠାରୁ ବିଜେପି ବରିଷ୍ଠ ନେତା ଅରୁଣ ଜେଟଲୀ ନିର୍ବାଚନ ଲଢି ହାରି ଯାଇଥିଲେ ।

ସୁଲ୍‌ତାନପୁର: କେନ୍ଦ୍ରମନ୍ତ୍ରୀ ମେନକା ଗାନ୍ଧୀଙ୍କ ପୁଅ ବରୁଣ ଗାନ୍ଧିଙ୍କ ନିର୍ବାଚନ ମଣ୍ଡଳୀ ସୁଲ୍‌ତାନପୁରରେ ମତଦାନ ମେ’ ହେବ । ଯଦିଓ ବରୁଣ ଗାନ୍ଧି ବର୍ତ୍ତମାନ ସମୟରେ ସେତେଟା ଲାଇମ୍‌ଲାଇଟ୍‌ରେ ନାହାନ୍ତି, କିନ୍ତୁ ଏକଦା ସେ ଫାୟାର ବ୍ରାଣ୍ଡ ନେତା ଥିଲେ ।

କନୌଜ: ମୁଲାୟମ୍ ସିଂହଙ୍କ ବହୁ ତଥା ଉତ୍ତରପ୍ରଦେଶର ପୂର୍ବ ମୁଖ୍ୟମନ୍ତ୍ରୀଙ୍କ ପତ୍ନୀ ଡିମ୍ପଲ ଯାଦବ 2014ରେ ଏଠାରେ ସାଂସଦ ହୋଇଥିଲେ । ତେବେ ଏଠାରେ ଏପ୍ରିଲ 29ରେ ମତଦାନ ପ୍ରକ୍ରିୟା ହେବ ।

ଝାନ୍ସୀ ଏବଂ କାନପୁର: ଏହି ଦୁଇଟି ନିର୍ବାଚନ ମଣ୍ଡଳୀରେ ମତଦାନ ପ୍ରକ୍ରିୟା ଏପ୍ରିଲ 29ରେ ହେବ । ପ୍ରକାଶ ଯେ, ଝାନ୍ସୀର ସଂସଦୀୟ ଆସନରୁ ଉମା ଭାରତୀ ଲଢିବେ ଏବଂ କାନପୁରରୁ ମୁରଲୀ ମନୋହର ଯୋଶୀ ।

ମୈନପୁରୀ ଏବଂ ଆଜମଗଡ଼: ମୈନପୁରୀରେ ଏପ୍ରିଲ 23 ହେବାକୁ ଥିବା ନିର୍ବାଚନ ଉପରେ ସମସ୍ତଙ୍କ ନଜର ଏଥିପାଇଁ ଅଛି କାରଣ,2014ରେ ମୁଲାୟମ୍ ସିଂହ ଯାଦବ ଏଠାରେ ନିର୍ବାଚନ ଲଢି ଜିତିଥିଲେ । ଏହାଛଡା ଆଜମଗଡ଼ରେ ମେ’ 12ରେ ମତଦାନ ପ୍ରକ୍ରିୟା ହେବ । ଯେଉଁଠାରେ ମୁଲାୟମ୍ ସିଂହ ଯାଦବ ନିଜର 2ୟ ବାଜି ମାରିଥିଲେ ।

ଗାନ୍ଧିନଗର ଏବଂ ପିଲିଭିତ୍: ଭିଆପି ଆସନ ତାଲିକାରେ ଗାନ୍ଧିନଗର ଏବଂ ପିଲିଭିତ୍‌ରେ ଏପ୍ରିଲ 23ରେ ନିର୍ବାଚନ ହେବାକୁ ସ୍ଥିର ହୋଇଛି । ଗାନ୍ଧିନଗର ବିଜେପିର ବରିଷ୍ଠ ନେତା ଲାଲକୃଷ୍ଣ ଲାଲକୃଷ୍ଣ ଆଡ଼ଭାଣୀଙ୍କ ନିର୍ବାଚନ ମଣ୍ଡଳୀ ହୋଇଥିବା ବେଳେ ପିଲିଭିତ୍ କେନ୍ଦ୍ରମନ୍ତ୍ରୀ ମେନକା ଗାନ୍ଧିଙ୍କ ନିର୍ବାଚନ ମଣ୍ଡଳୀ  ।

ଲକ୍ଷ୍ନୌ: ମେ’ 6ରେ ଲକ୍ଷ୍ନୌରେ ମତଦାନ ପ୍ରକ୍ରିୟା ହେବ । 2014ରେ ଏଠାରୁ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ ନିର୍ବାଚନ ଜିତି ଥିଲେ । ଏକଦା ଏହି ଆସନ ଜନ ନାୟକ ତଥା ପୂର୍ବତନ ପ୍ରଧାନମନ୍ତ୍ରୀ ସ୍ୱର୍ଗତ ଅଟଳ ବିହାରୀ ବାଜପେୟୀଙ୍କ ଥିଲା । ତେବେ ଏବେ ଏହା ରାଜନାଥ ସିଂହଙ୍କର । ପରମ୍ପରା ଅନୁଯାୟୀ ଭିଆପି ଲିଷ୍ଟରେ ଟପ୍‌ରେ ଥିବା ଲକ୍ଷ୍ନୌ ଚଳିତ ନିର୍ବାଚନରେ କେଉଁ ମୋଡ ନେଉଛି ତାହା ଦେଖିବାକୁ ବାକି ରହିଲା ।