ପୁଲ୍‌ଓ୍ୱାମା ହମ୍‌ଲାର ପ୍ରତିଶୋଧ: ପାକିସ୍ତାନ ଘରେ ପଶି ମାରିବାକୁ ଯୋଜନା କରୁଛି ଭାରତ !

ନୂଆଦିଲ୍ଲୀ: ପୁଲ୍ଓ୍ୱାମା ହମ୍‌ଲା ପରେ ପ୍ରଧାନମନ୍ତ୍ରୀ ସେନାକୁ ପୁର୍ଣ୍ଣ ଅନୁମତି ଦେଇଛନ୍ତି । ପରିସ୍ଥିତି ଅନଯାୟୀ ସେନା ନିଜେ କ’ଣ କାର୍ଯ୍ୟାନୁଷ୍ଠାନ ନେବ ତାହା ନିଷ୍ପତ୍ତି ନେବାର ସମ୍ପୁର୍ଣ୍ଣ ଅଧିକାର ଦିଆଯାଇଛି । ତେବେ ସେନା ପକ୍ଷରୁ ପାକିସ୍ତାନ ଅଧିକୃତ କଶ୍ମୀରରେ ପ୍ରବେଶ କରି ପ୍ରତିଶୋଧ ନେବାର ଯୋଜନା କରାଯାଉଥିବା ଜଣାପଡ଼ିଛି । ଏଥିପାଇଁ ସେନା ଏବଂ ସୁରକ୍ଷା ବଳ ୨ଟି ସ୍ତରରେ କାର୍ଯ୍ୟାନୁଷ୍ଠାନ ଲାଗି ଯୋଜାନ କରିପାରନ୍ତି । ସୁରକ୍ଷା ମାମଲାର ମନ୍ତ୍ରିମଣ୍ଡଳୀୟ ସମିତି ବୈଠକ ପରେ ଉଚ୍ଚ ସ୍ତରରୁ ମିଳିଥିବା ସଂକେତରୁ ଜଣାପଡିଛି ଯେ, ଭାରତ ଏଥର ପାକିସ୍ତାନ ପ୍ରାୟୋଜିତ ଆତଙ୍କବାଦ ବିରୋଧରେ ଅଧିକ ଦୃଢ କାର୍ଯ୍ୟାନୁଷ୍ଠାନ ପାଇଁ ତତ୍ପର ହୋଇ ଉଠିଛି ।

କାର୍ଯ୍ୟାନୁଷ୍ଠାନର ସମନ୍ୱୟ ଦାୟିତ୍ୱ ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ନିକଟରେ ରହିଛି । ସୂତ୍ର ଅନୁସାରେ କାର୍ଯ୍ୟାନୁଷ୍ଠାନ କେବେ ହେବ, ତାହା କୁହାଯାଇ ପାରିବ ନାହିଁ । ଉରି ଆକ୍ରମଣ ପରେ ଅନେକ କାର୍ଯ୍ୟାନୁଷ୍ଠାନ ପାଇଁ ସବୁଜ ସଙ୍କେତ ଦିଆଯାଇଥିଲା । ଭାରତ ପୁଲୱାମା ଆକ୍ରମଣ ନେଇ ବିଶ୍ୱବାସୀଙ୍କ ସମର୍ଥନ ହାସଲ କରୁଛି । ପାକ୍‌ ପ୍ରାୟୋଜିତ ଆତଙ୍କବାଦ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ଉଦ୍ୟମ କରୁଛି ।

ସୂତ୍ର ଅନୁସାରେ ସୁରକ୍ଷା ବଳ ଘାଟିରେ ଅପରେଶନ ଅଲଆଉଟ ଅଭିଯାନ ଆରମ୍ଭ କରି କାର୍ଯ୍ୟାନୁଷ୍ଠାନ ନେବେ । ସମସ୍ତ ସନ୍ଦିଗ୍ଧ ସ୍ଥାନରେ ଘେରାବନ୍ଦୀ କରି ବ୍ୟାପକ ପରିମାଣରେ କାର୍ଯ୍ୟାନୁଷ୍ଠାନ ନିଆଯିବ । ଦକ୍ଷୀଣ କଶ୍ମୀରରେ କିଛି ଆଡ୍ଡାସ୍ଥଳରେ ଏବେ ଯୁଦ୍ଧକାଳୀନ ଭିତ୍ତିରେ ଅଭିଯାନ ଚାଲିଛି । ଆତଙ୍କବାଦୀଙ୍କ ସମର୍ଥନରେ ପଥରମାଡ଼ କରୁଥିବା ଲୋକଙ୍କୁ ମଧ୍ୟ ଛଡ଼ାଯିବ ନାହିଁ । ସୁରକ୍ଷା ବଳଙ୍କ ସହିତ ଜଡ଼ିତ ଜଣେ ଅଧିକାରୀ କହିଛନ୍ତି, ଆମେ ଜୈଶ, ଲସ୍କର ଓ ହିଜ୍‌ବୁଲର ସବୁ ଆତଙ୍କବାଦୀଙ୍କୁ ନିହତ କରିବାକୁ ନିଷ୍ପତ୍ତି ନେଇଛୁ । ଏଥିପାଇଁ ଯେଉଁ ଅସ୍ତ୍ରର ଆବଶ୍ୟକତା ପଡିତ, ତାକୁ ଆମେ ବ୍ୟବହାର କରିବାକୁ ପ୍ରସ୍ତୁତ ।

ଅଧିକାରୀ କହିଛନ୍ତି, ଆତଙ୍କବାଦୀଙ୍କୁ ନହିତ କରିବା ପୂର୍ବରୁ ସ୍ୱତନ୍ତ୍ର ରଣନୀତି ପ୍ରସ୍ତୁତ ହେବ । ସୁରକ୍ଷା ବଳଙ୍କ ସଂଖ୍ୟା ବଢ଼ାଯିବ । ସିଆର୍‌ପିଏଫ୍‌ ଏବଂ ସେନା ସହିତ ବିଏସ୍‌ଏଫକୁ କାର୍ଯ୍ୟାନୁଷ୍ଠନ ପାଇଁ ନିୟୋଜିତ କରାଯିବ । ଗୁଇନ୍ଦା ସଂସ୍ଥାକୁ ପିଓକେରେ ଆତଙ୍କବାଦୀ ଶିବିରର ତାଜା ସ୍ଥିତି ଏବଂ ସେଠାରେ ଚାଲିଥିବା ଗତିବିଧି ଉପରେ ପୂରା ନଜର ରଖିବାକୁ କୁହାଯାଇଛି ।