ନିଜ ଅପାରଗତାକୁ ଲୁଚାଇ କେନ୍ଦ୍ରୀୟ ଅବହେଳା ନାରା ଦେଉଛନ୍ତି ରାଜ୍ୟ ସରକାର !

ଭୁବନେଶ୍ୱର: ପୁଣିଥରେ  କେନ୍ଦ୍ରୀୟ ଅବହେଳା ନାରା ଦେଲା ବିଜେଡି  ।  ରାଜ୍ୟର ପର୍ଯ୍ୟଟନ କ୍ଷେତ୍ର ପ୍ରତି କେନ୍ଦ୍ର ଅଣଦେଖା କରିଥିବା ଅଭିଯୋଗ କରିଛି ବିଜେଡି  । ଯାହାକୁ ନେଇ ବିଧାନସଭା ଶୂନ୍ୟ କାଳରେ  ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଥିରେ ପିପିଲି ବିଧାୟକ ପ୍ରଦୀପ ମହାରଥି  ।  କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ  17ଟି ପ୍ରର୍ଯ୍ୟଟନସ୍ଥଳୀକୁ ଆକର୍ଷଣୀୟ କ୍ଷେତ୍ର ଭାବେ  ଘୋଷଣା କରିଛନ୍ତି  ।

କିନ୍ତୁ ଏହା ମଧ୍ୟରେ  ବିଶ୍ୱ ପ୍ରସିଦ୍ଧ ଶ୍ରୀକ୍ଷେତ୍ର ନାହିଁ କି କୋଣାର୍କର ସୂର୍ଯ୍ୟମନ୍ଦିର ମଧ୍ୟ ସ୍ଥାନ ପାଇନାହିଁ  । ନିଜ ନିଜ ଅଂଚଳର ପ୍ରର୍ଯ୍ୟଟନ କ୍ଷେତ୍ରକୁ ନେଇ ବିଧାନସଭାରେ ଉଦବେଗ ପ୍ରକାଶ  କରିଛନ୍ତି ବିଜେଡିର ଅନେକ ବିଧାୟକ  । ଏପରିକି  କଂଗ୍ରେସ  ମଧ୍ୟ ଏହା ଉପରେ ଏକ କମିଟି ଗଠନ କରି କେନ୍ଦ୍ର ସରକାରଙ୍କ ନିକଟକୁ ଏକ ସ୍ମାରକ ପତ୍ର ପଠାଇବା ପାଇଁ ଦାବି କରିଛି  ।

ଅପରପକ୍ଷେ ରାଜ୍ୟରେ ପର୍ଯ୍ୟଟନର ସ୍ଥିତି ଦୁର୍ବଳ  । ପର୍ଯ୍ୟଟନସ୍ଥଳଗୁଡିକର ବିକାଶ କରିବା ତଥା ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ରାଜ୍ୟ ସରକାର କୌଣସି ପଦକ୍ଷେପ ନେଇ ନାହାଁନ୍ତି ବୋଲି ପାଲଟା ଅଭିଯୋଗ କରିଛି ବିଜେପି  ।  2013 ରୁ 2018 ମଧ୍ୟରେ ରାଜ୍ୟର ଘରୋଇ ପର୍ଯ୍ୟଟକଙ୍କ ସଂଖ୍ୟା ମାତ୍ର  10 ହଜାର 288ରୁ ବୃଦ୍ଧି ପାଇ 14ହଜାର 500ରେ  ପହଁଚିଛି  ।

  ବିଦେଶୀ ପର୍ଯ୍ୟଟକଙ୍କ ସଂଖ୍ୟା 308ରୁ ବୃଦ୍ଧି ପାଇଁ 472ରେ ପହଁଚିଛି  ।  ଅଥଚ ପଡୋଶୀ ହାଇଦ୍ରାବାଦରେ 2016ରେ ଘରୋଇ ପର୍ଯ୍ୟଟକଙ୍କ ସଂଖ୍ୟା 2 କୋଟି 33 ଲକ୍ଷ ଥିବା ବେଳେ 2017ରେ ଏହି ସଂଖ୍ୟା 2 କୋଟି 71ରେ ଲକ୍ଷରେ ପହଁଚିଛି  । ସେହିପରି ବିଦେଶୀ ପର୍ଯ୍ୟଟକଙ୍କ କ୍ଷେତ୍ରରେ ମଧ୍ୟ ବେଶ ଆଗରେ ରହିଛି ହାଇଦ୍ରାବାଦ  ।  2017ରେ 2 ଲକ୍ଷ  47 ହଜାର  ବିଦେଶୀ ପର୍ଯ୍ୟଟକ ହାଇଦ୍ରାବଦ  ଆସିଛନ୍ତି  ।

ଏହା ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟରେ 7ଟି ପ୍ରମୁଖ ପର୍ଯ୍ୟଟନ କ୍ଷେତ୍ରକୁ  ଆଇକନିକ୍ ପର୍ଯ୍ୟଟନ କ୍ଷେତ୍ରରେ ସାମିଲ କରିବା ପାଇଁ କେନ୍ଦ୍ରକୁ ଚିଠି ଲେଖି ଦାବି ଉପସ୍ଥାପନ କରିଥିଲେ । ତେବେ ମୁଖ୍ୟମନ୍ତ୍ରୀଙ୍କ ଚିଠିରେ ଚିଲିକା, ବୌଦ୍ଧକୀର୍ତ୍ତି,  ଭିତରକନିକା, ଶିମିଳିପାଳ  ଏପରିକି ଦେଓମାଳି ଓ ମହେନ୍ଦ୍ରଗିରି ମଧ୍ୟ ସ୍ଥାନ ପାଇଛି  । କିନ୍ତୁ ଆଶ୍ଚର୍ଯ୍ୟର କଥା ଶ୍ରୀକ୍ଷେତ୍ର ପୁରୀକୁ କେମିତି ଭୁଲିଗଲେ ମୁଖ୍ୟମନ୍ତ୍ରୀ  ।