ଦୀପାବଳି ପୂର୍ବରୁ ପାକିସ୍ତାନର ହୀନ ପ୍ରୟାସ। ଦୀପାବଳିର ମାହୋଲ ଖରାପ କରିବାକୁ ଆଜି ସୀମାରେ ତିନୋଟି ସେକ୍ଟରରେ ଅସ୍ତ୍ରବିରତି ଉଲ୍ଲଙ୍ଘନ କରିବା ସହ ଗୁଳିବର୍ଷା କରିଛି ପାକିସ୍ତାନ। ଫଳରେ ଦୁଇ ଜଣ ଯବାନ ଏବଂ ଜଣେ ବିଏସଏଫ ଏସଆଇ ଶହୀଦ ହୋଇଛନ୍ତି। ଏତଦ୍ ବ୍ୟତୀତ ୩ ଜଣ ସାଧାରଣ ନାଗରିକଙ୍କର ମଧ୍ୟ ମୃତ୍ୟୁ ହୋଇଛି। ତେବେ ଏହାର କଡ଼ା ଜବାବ ଦେଇଛି ଭାରତୀୟ ସେନା। ଭାରତୀୟ ସେନା ଗୁଳିରେ ପାକିସ୍ତାନର ୭ ରୁ ୮ ଜଣ ଯବାନ ନିହତ ହୋଇଛନ୍ତି। ମୃତକଙ୍କ ମଧ୍ୟରେ ୨-୩ ଜଣ ଏସଏସଜି କମାଣ୍ଡର ସାମିଲ ଅଛନ୍ତି।
ସୂଚନାନୁଯାୟୀ, ଜାମ୍ମୁ କାଶ୍ମୀରର ନିୟନ୍ତ୍ରଣ ରେଖା ନିକଟରେ ଶୁକ୍ରବାର ତିନୋଟି ସେକ୍ଟରରେ ଗୁଳିବର୍ଷା କରିଛି ପାକିସ୍ତାନ। ଜଣେ ଅଧିକାରୀଙ୍କ ସୂଚନା ଅନୁଯାୟୀ, ବାନ୍ଦୀପୋରା ଜିଲ୍ଲାର ଗୁରେଜ ସେକ୍ଟରର ଇଜମାର୍ଗରେ ପାକିସ୍ତାନ ଅସ୍ତ୍ରବିରତି ଉଲ୍ଲଙ୍ଘନ କରିଥିବା ବେଳେ କୁପୱାଡାର କେରନ ସେକ୍ଟରରେ ଏବଂ ବାରାମୂଳା ଉରୀ ସେକ୍ଟରରେ ଗୁଳିବର୍ଷା କରିଛି ପାକିସ୍ତାନୀ ସେନା। ତେବେ ସମସ୍ତ ସେକ୍ଟରରେ ପାକିସ୍ତାନକୁ ମୁହଁତୋଡ ଜବାବ ଦେଇଛି ଭାରତୀୟ ସେନା।
