ଅର୍ଗସ ବ୍ୟୁରୋ: ଶୂନଶାନ୍ କଳାମଚ୍ ରାଜପଥ। ସବୁଜିମାର ଚାଦର ଉପରେ ନୀଳ ଆକାଶ। ଆଉ ସେହି ଦୃଶ୍ୟପଟ୍ଟରେ ଅସ୍ଥିର କଳାଧଳା ରଙ୍ଗର ଢେଉ ଖେଳୁଛି ଆନମନା ହୋଇ।
ହଠାତ୍ ଗାଡି ଅଟକିଗଲା । ପ୍ରକୃତିର ଏହି ସୁନ୍ଦର ସର୍ଜନାକୁ ଉପଭୋଗ କରୁଥିଲା ଆଖି ଆଉ ହୃଦୟ। ଲାଗୁଥିବା ଟିଭିର କୌଣସି ଏଡିଟେଡ ବୃତ୍ତଚିତ୍ର ସାମ୍ନାରେ ସତ ହୋଇଯାଇଛି।
ଦୃଶ୍ୟ ଟିକେ ଅଧିକ ରୋମାଞ୍ଚକର, ମନମତାଣିଆ ଥିଲା। ଗୋଟିଏ ସମାନ୍ତରାଳରେ ଧାଉଁଥିଲେ ଏକ ନିଦ୍ଧିଁଷ୍ଟ ଜୀବଗୋଷ୍ଠୀ। ଲାଗୁଥିଲା ଯେମିତି ଏଠି ଗଣଦୌଡ ଚାଲିଛି। ଯେତିକି ହୃଦୟଗ୍ରାହୀ ସେମିକି ରୋମାଞ୍ଚକର। ବିରଳ କୃଷ୍ଣସାର ମୃଗମାନଙ୍କ ରାସ୍ତା ଅତିକ୍ରମଣର ଏ ଦୃଶ୍ୟ ଥିଲା ସବୁଠୁ ନିଆରା।
ଏ ଦୃଶ୍ୟ ଦେଖି ମନେପଡୁଛି ପ୍ରସିଦ୍ଧ ଓଡିଆ କାବ୍ୟ ବିଚିତ୍ର ରାମାୟଣର ସଙ୍ଗୀତ, ହେମ ହରିଣୀ….
Excellent! https://t.co/9xxNLllQtP — Narendra Modi (@narendramodi) July 28, 2021
ପାଖାପାଖି ୩ହଜାରରୁ ଅଧିକ କୃଷ୍ଣସାର ମୃଗ । ଧାଡି ବାନ୍ଧି ଉତଫୁଲିତ ହୋଇ ରାସ୍ତା ପାର୍ ହେଉଥିଲେ । ଟିକେଟ କାଟି ନନ୍ଦନକାନନରେ ଏହି ବନ୍ୟାଜନ୍ତୁକୁ ଆପଣ ଦେଖିଥିବେ କିନ୍ତୁ ବିନା କୌଣସି ପ୍ରତିବନ୍ଧକରେ ସେମାନଙ୍କୁ ଏମିତି ଖୋଲାଖୋଲି ରାସ୍ତା ଉପରେ ଦେଖିବା ନିଆରା ନିଶ୍ଚୟ ।
ଯିଏ ଦେଖିଲା ସିଏ ଅଟକିଗଲା। କିଛି ଆଖିର ଲେନ୍ସରେ ଆଉ କିଛି କ୍ୟାମେରା ଲେନ୍ସରେ କଏଦ କଲେ ଦୃଶ୍ୟକୁ। ଶେଷରେ ଦୃଶ୍ୟଟି ପ୍ରଧାନମନ୍ତ୍ରୀଙ୍କ ମନକୁ ପାଇଲା।
ଏହି ଭିଡ଼ିଓଟି ସୋସିଆଲ ମିଡିଆରେ ପୋଷ୍ଟ ହେବା ମାତ୍ରେ ଲୋକେ ଖୁବ ପ୍ରଶଂସା କଲେ । ଖୋଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ଦୃଶ୍ୟ ଦେଖି ବିଭୋର ହୋଇ ନିଜ ଟୁଇଟର ହ୍ୟାଣ୍ଡେଲରେ ସେୟାର କଲେ । ଆଉ ଲେଖିଦେଲେ ଅତି ଚମତ୍କାର ।
ଏ ଦୃଶ୍ୟ ହେଉଛି ଗୁଜୁରାଟ ଭାବନଗର କୃଷ୍ଣସାର ମୃଗ ଜାତୀୟ ଉଦ୍ୟାନର। ଯେଉଁଠି କୃଷ୍ଣସାର ମୃଗଗୁଡିକ ରାସ୍ତା ପାର ହେଉଥିବାର ଏ ଦୃଶ୍ୟ ଭାଇରାଲ ହେଉଛି ।
