ସରକାରଙ୍କ ନିର୍ଦ୍ଦେଶ ମିଳିଲେ POK ଆମର ହେବ: ନରୱାଣେ

ନୂଆଦିଲ୍ଲୀ: ଧାରା 370 ଉଚ୍ଛେଦ ପରେ ଜମ୍ମୁକାଶ୍ମୀରରେ ଏବେ ବିକାଶ କାର୍ଯ୍ୟ ଆରମ୍ଭ ହୋଇସାରିଛି । ଦୀର୍ଘ ବର୍ଷ ଧରି ଧାରା 370କୁ ରାଜନୈତିକ ମୁଦ୍ଦା କରୁଥିବା ଦଳଗୁଡ଼ିକୁ ଚକମା ଦେଇ କେନ୍ଦ୍ରସରକାର ଏହାକୁ ଉଚ୍ଛେଦ କରିସାରିଛନ୍ତି । ପରେପରେ ପାକିସ୍ତାନ ଅଧିକୃତ କାଶ୍ମୀରକୁ ଭାରତରେ ମିଶାଇବାକୁ ନେଇ ଯେଉଁ ଆଲୋଚନା ଏବଂ ପର୍ଯ୍ୟାଲୋଚନା ଚାଲିଥିଲା ସେଥିରେ ମାଇଲେଜ୍‌  ଦେଇଛି ଆଜି ସେନାମୁଖ୍ୟଙ୍କ ବୟାନ । ସେନାମୁଖ୍ୟ ମନୋଜ ମୁକୁନ୍ଦ ନରୱାଣେଙ୍କ ପ୍ରତିକ୍ରିୟା ପିଓକେ ଦଖଲକୁ ଇଶାରା କରୁଛି ବୋଲି ବହୁ ପ୍ରତିରକ୍ଷା ବିଶେଷଜ୍ଞ ମତ ଦେଇଛନ୍ତି ।

ଡିସେମ୍ୱର ୩୧ରେ ଆର୍ମିର ମୁଖ୍ୟ ଭାବରେ ଦାୟିତ୍ୱ ନେଇଥିବା ଜେନେରାଲ ମନୋଜ ମୁକୁନ୍ଦ ନରଓ୍ୱାଣେ ଆଜି ସାମ୍ୱାଦିକ ସମ୍ମିଳନୀ କରି ପାକିସ୍ତାନକୁ ପରୋକ୍ଷରେ ଖୋଲା ଚ୍ୟାଲେଞ୍ଜ ଦେଇଛନ୍ତି । ପାକିସ୍ତାନ ଅଧିନରେ ଥିବା ପାକିସ୍ତାନ ଅଧିକୃତ କାଶ୍ମୀର(ପିଓକେ) ଭାରତର ଏକ ଅଂଶ ହୋଇପାରିବ । ସରକାରଙ୍କ ନିର୍ଦ୍ଦେଶ ମିଳିଲେ ଏଥିପ୍ରତି କାର୍ଯ୍ୟ ଆରମ୍ଭ ହେବ ବୋଲି କହିଛନ୍ତି ନରଓ୍ୱାଣେ ।

#WATCH Army Chief on if PoK can be part of India as stated by political leadership: There is a parliamentary resolution that entire J&K is part of India.If Parliament wants it,then,PoK also should belong to us. When we get orders to that effect, we'll take appropriate action pic.twitter.com/P8Rbfwpr2x

— ANI (@ANI) January 11, 2020

ସୂଚନାଯୋଗ୍ୟ, ପିଓକେ ଭାରତର ଏକ ଅଂଶ ବୋଲି ସଂସଦରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ କହିସାରିଛନ୍ତି । ଅନ୍ୟପଟେ ପିଓକେବାସୀ ପାକିସ୍ତାନ ବିରୁଦ୍ଧରେ ବାରମ୍ବାର ବିରୋଧ ପ୍ରଦର୍ଶନ କରୁଥିବା ଦେଖିବାକୁ ମିଳୁଛି । ଏପରିକି ସେମାନେ ଭାରତ ଭଳି ଏକ ଦ୍ରୁତ ଅଭିବୃଦ୍ଧିଶାଳୀ ରାଷ୍ଟ୍ରରେ ରହିବାକୁ ଚାହୁଁଥିବା ନେଇ ସେମାନଙ୍କ ନେତା ପ୍ରତିକ୍ରିୟା ରଖିଛନ୍ତି ।

ଏହାସହ ଏବେ ଭାରତ ପ୍ରତିରକ୍ଷା କ୍ଷେତ୍ରରେ ନିଜର ଶକ୍ତି ବୃଦ୍ଧି କରିବାରେ ଲାଗିଛି । ଦେଶର ସ୍ଥଳ ସେନା, ବାୟୁସେନା ଓ ନୌସେନା ମଧ୍ୟରେ ସମନ୍ୱୟ ରକ୍ଷା କରିବା ପାଇଁ ଚିଫ ଅଫ ଡିଫେନ୍ସ ଷ୍ଟାଫ(ସିଡିଏସ୍‌) ପଦବୀ ସୃଷ୍ଟି କରିବା ସହ ପୂର୍ବତନ ସେନା ମୁଖ୍ୟ ବିପୀନ ରାଓ୍ୱାତଙ୍କୁ ନୂତନ ସିଡିଏସ ଭାବେ ନିଯୁକ୍ତି ଦେଇସାରିଛନ୍ତି ସରକାର ।