କରୋନା ମୁକାବିଲାର ଏକମାତ୍ର ଅସ୍ତ୍ର ସାମାଜିକ ଦୂରତା: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ

ନୂଆଦିଲ୍ଲୀ: ସାମାଜିକ ଦୂରତା ବଜାୟ ରଖିବା ଏବଂ ସରକାରଙ୍କ ଦ୍ଵାରା ଜାରି କରାଯାଇଥିବା ଲକଡାଉନ ଗାଇଡଲାଇନ ମାନିବା ହିଁ ବର୍ତ୍ତମାନ ଏକମାତ୍ର ଉପାୟ। ଯାହାଦ୍ୱାରା ଆମେ କରୋନା ସହିତ ମୁକାବିଲା କରିପାରିବା। କାରଣ ବର୍ତ୍ତମାନ ସୁଦ୍ଧା ଏହା ପାଇଁ କୌଣସି ଔଷଧ ବାହାରି ନାହିଁ। ତେଣୁ ସମସ୍ତଙ୍କୁ ସରକାରଙ୍କ ଦ୍ଵାରା ଜାରି କରାଯାଇଥିବା ଗାଇଡଲାଇନକୁ ମାନିବାକୁ ପଡ଼ିବ ବୋଲି କହିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଡାଃ ହର୍ଷବର୍ଦ୍ଧନ। ବେନେଟ ବିଶ୍ୱବିଦ୍ୟାଳୟ ପକ୍ଷରୁ କୋଭିଡ-19 ଉପରେ ସମଗ୍ର ବିଶ୍ୱରେ ଅନଲାଇନରେ ଅୟୋଜିତ ସମ୍ମିଳନୀରେ ହର୍ଷବର୍ଦ୍ଧନ ଯୋଗ ଦେଇ କହିଲେ କରୋନା ସଂକ୍ରମଣ ଓ ମୃତ୍ୟୁହାର ରୋକିବା ଏବଂ ମୁକାବିଲା କ୍ଷେତ୍ରରେ ବ୍ୟାପକ ପଦକ୍ଷେପ ନେବାରେ  ବିଶ୍ୱର ଅନ୍ୟାନ୍ୟ ଦେଶ ତୁଳନାରେ ଭାରତ ସବୁଠାରେ ଆଗରେ ରହିଛି। ବର୍ତ୍ତମାନ ଦେଶରେ ପ୍ରତି 4.5 ଦିନରେ କରୋନା ଆକ୍ରାନ୍ତଙ୍କ ସଂଖ୍ୟା ଦୁଇଗୁଣ ହେଉଛି। ଏହା ବ୍ୟତୀତ ଦେଶର ଅଧିକାଂଶ ଜିଲ୍ଲାରେ କରୋନା ଏପର୍ଯ୍ୟନ୍ତ ସ୍ପର୍ଶ କରିପାରିନାହିଁ। ଅନ୍ୟପଟେ ସରକାର 133 ଜିଲ୍ଲାକୁ ହଟସ୍ପଟ ଭାବେ ଚିହ୍ନଟ କରିଛନ୍ତି। ସଂକ୍ରମଣ ରୋକିବା ପାଇଁ କେନ୍ଦ୍ର ଏବଂ ରାଜ୍ୟ ସରକାର ଦୃଢ଼ କଣ୍ଟେନମେଣ୍ଟ ରଣନୀତି ଆପଣେଇଛନ୍ତି।