କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ପଦ୍ମପୁର ନିର୍ବାଚନମଣ୍ଡଳୀର ନିଜ ପ୍ରଚାର କାର୍ଯ୍ୟକ୍ରମର ଦ୍ୱିତୀୟ ଦିନରେ ପାଇକମାଲ ବ୍ଲକ ବାଦିକଟା, ପଦ୍ମପୁର ବ୍ଲକର ଖଇରପାଲି ଓ ଦହିତା ଠାରେ ଆୟୋଜିତ ଜନସଭାକୁ ସମ୍ବୋଧନ କରିଛନ୍ତି । ସେ କହିଛନ୍ତି ଯେ ଦୀର୍ଘ ୨୨ ବର୍ଷରେ ଯେଉଁମାନେ ଲୋକମାନଙ୍କୁ ମୌଳିକ ସୁବିଧା ଦେଇପାରିଲେ ନାହିଁ ସେମାନେ ଆଜି ମିଛ ସୁଆଙ୍ଗ ରଚୁଛନ୍ତି । ମିଥ୍ୟା ପ୍ରତିଶ୍ରୁତି ଦେଇ ବିଜେଡି ନିର୍ବାଚନର ବୈତରଣୀ ପାର୍ ହେବା ପାଇଁ ଚାହୁଁଛି । ଏହି ସଂଗ୍ରାମୀ ମାଟି ଶାସକ ଦଳର ଷଡଯନ୍ତ୍ରର ଉଚିତ ଜବାବ୍ ଦେବ । ଦିନରେ ଲଣ୍ଠନ ଦେଖାଉଥିବା ଶାସକ ଦଳର ଲୋକଙ୍କୁ ପଦ୍ମପୁରବାସୀ ଭୋଟ୍ ମାଧ୍ୟମରେ ଲାଇଟ୍ ଦେଖାଇବେ।
ଶ୍ରୀ ପ୍ରଧାନ କହିଛନ୍ତି ରାଜ୍ୟ ସରକାର ଭାରତ ସରକାରଙ୍କ ଯୋଜନାର ଶ୍ରେୟ ନେବା ପାଇଁ ସେ ସବୁ ଯୋଜନାକୁ ମୁଁ କରିବାର ଅପଚେଷ୍ଟା କରୁଛନ୍ତି । ସେହି କ୍ରମରେ ରାଜ୍ୟରେ ମହିଳାଙ୍କୁ ବିନା ସୁଧରେ ୫ ଲକ୍ଷ ଟଙ୍କା ଋଣ ଦେବାର ଘୋଷଣା କରାଯାଇଛି । ଏହା ଭାରତ ସରକାରଙ୍କ ଗ୍ରାମୀଣ ବିକାଶର ଏକ ଯୋଜନା । ନରେନ୍ଦ୍ର ମୋଦି ଦେଶର ପ୍ରଧାନମନ୍ତ୍ରୀ ଦାୟିତ୍ୱ ନେବା ପରେ ଗ୍ରାମାଞ୍ଚଳର ମହିଳାଙ୍କୁ ଆତ୍ମନିର୍ଭର କରିବା ପାଇଁ ଦୀନଦୟାଲ ଅନ୍ତୋଦୟ ଯୋଜନା -ଜାତୀୟ ଗ୍ରାମୀଣ ଜୀବିକା ମିଶନ ଆରମ୍ଭ କରିଛନ୍ତି । ଏହି ଯୋଜନାରେ ଭାରତ ସରକାର ଭାରତୀୟ ବ୍ୟାଙ୍କ ମାନଙ୍କରୁ ମହିଳାମାନଙ୍କୁ ଆନୁଷଙ୍ଗିକ କାର୍ଯ୍ୟ କରିବାକୁ ପ୍ରୋତ୍ସାହିତ କରିବା ପାଇଁ ସ୍ୱଳ୍ପ ସୁଧ ହାରରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣର ବ୍ୟବସ୍ଥା କରିଛନ୍ତି । ସୁଧର ହାର ୧୧ ପ୍ରତିଶତ ଥିବା ବେଳେ ମୋଦି ସରକାର ଅଧିକ ଭାଗ ୭ ପ୍ରତିଶତ ସୁଧ ହାରରେ ରିହାତି ଦେଇ ସେହି ସୁଧ ହାରକୁ ନିଜେ ବହନ କରି ସ୍ୱଳ୍ପ ହାରରେ ମହିଳା ମାନଙ୍କୁ ଋଣ ଦେଇ ସେମାନଙ୍କୁ ଆତ୍ମନିର୍ଭର କରିବାର ବ୍ୟବସ୍ଥା କରିଛନ୍ତି । ଏହି ବଳକା ସୁଧ ହାର ରାଜ୍ୟ ସରକାର ଛାଡ କରି ପଦ୍ମପୁର ନିର୍ବାଚନକୁ ଆଖିରେ ରଖି ମହିଳାଙ୍କୁ ବିନା ସୁଧରେ ୫ ଲକ୍ଷ ଟଙ୍କା ଋଣ ଦେବାର ଘୋଷଣା କରିବା ଚଞ୍ଚକତାର ବିଷୟ ।
ରାଜ୍ୟ ସରକାରଙ୍କ ଦୂରଦୃଷ୍ଟି ଅଭାବରୁ ଆଜି ପ୍ରତିଦିନ ଯୁବକମାନେ ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି । ସରକାର ଏହି ବିଷୟରେ ସ୍ପଷ୍ଟୀକରଣ ଦିଅନ୍ତୁ । ଇନପୁଟ ସବସିଡି ଘୋଷଣାର ପ୍ରାୟ ଅନେକ ଦିନ ପରେ ବି ଟଙ୍କା ଆସିନାହିଁ । ପଦ୍ମପୁରକୁ କେତେ ଇନପୁଟ ସବସିଡି ଦେବା ମୁଖ୍ୟମନ୍ତ୍ରୀ ସ୍ପଷ୍ଟ କରିବେ କି ? ନୂତନ ଜିଲ୍ଲା ହେବା ପାଇଁ ପଦ୍ମପୁରର ସମସ୍ତ ଯୋଗ୍ୟତା ରଖୁଥିବା ପରେ ମଧ୍ୟ ଜିଲ୍ଲା ହେଲା ନାହିଁ । ସତରେ ଏ ଅଞ୍ଚଳ ପ୍ରତି ପ୍ରତିବଦ୍ଧତା ଥିଲେ ବିଜେଡ଼ି ସଭାପତି ନୁହେଁ ବରଂ ମୁଖ୍ୟମନ୍ତ୍ରୀ ଭାବରେ ପଦ୍ମପୁରକୁ ଜିଲ୍ଲା ମାନ୍ୟତା ଦେବାର ଘୋଷଣା କରନ୍ତୁ ।
ମୋଦି ସରକାରଙ୍କ ବ୍ୟବସ୍ଥା ସତ୍ତ୍ୱେ ଓଡ଼ିଶା ହେଉଛି ଏକମାତ୍ର ରାଜ୍ୟ ଯେଉଁଠି ପଛୁଆ ବର୍ଗ ତଥା ଓବିସି ବର୍ଗଙ୍କୁ ଚାକିରି ଓ ଶିକ୍ଷା କ୍ଷେତ୍ରରେ ସମ୍ବିଧାନ ଅନୁମୋଦିତ ସଂରକ୍ଷଣ ପ୍ରଦାନ କରାଯାଉନାହିଁ । ଜନଜାତି ଲୋକ ମାନଙ୍କୁ ସଂରକ୍ଷଣ ଦେବା ବି ରାଜ୍ୟରେ ବନ୍ଦ କରିଦିଆଯାଇଛି । ମୁଖ୍ୟମନ୍ତ୍ରୀ ପଦ୍ମପୁରକୁ ପ୍ରଚାର ଆସିବାକୁ ବେଳେ ଓବିସି ତଥା କୁଲତା, ମେହେର, ଗୋପାଳ, ବଢେଇ, ଚଷା ଓ ଏହି ସମାଜର ଲୋକମାନଙ୍କ ପାଇଁ ସାମ୍ବିଧାନିକ ଅନୁମୋଦିତ ଅଧିକାର କେବେ ଲାଗୁ କରିବେ, ଏହା ଉପରେ ମତ ରଖିବେ ବୋଲି ଆଶାବ୍ୟକ୍ତ କରିଛନ୍ତି ଶ୍ରୀ ପ୍ରଧାନ । ସେ କହିଛନ୍ତି ଡ ବି.ଆର ଆମ୍ବେଦକର ପଛୁଆ ବର୍ଗର ଲୋକମାନଙ୍କୁ ଯେଉଁ ସୁରକ୍ଷା ଦେଇଛନ୍ତି ସୁରକ୍ଷା ଦେବାର ଆବଶ୍ୟକତା କରିଛି । ପ୍ରଧାନମନ୍ତ୍ରୀ ମୋଦି ଏହି ପଛୁଆ ଜାତିଙ୍କର ସଂରକ୍ଷଣ କରିବା ପାଇଁ ମୋଦି ସରକାର ବଦ୍ଧ ପରିକର ।
ମୋଦି ସରକାର ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଆବଣ୍ଟନ ପାଇଁ ପଇସା ଆବଣ୍ଟନ କରୁଥିଲେ ସୁଦ୍ଧା ଭ୍ରଷ୍ଟାଚାରୀ ସରକାର ଘରେ ଉପଲବ୍ଧ କରାଉନାହାନ୍ତି । ଆବାସ ପ୍ଲସ ପୋର୍ଟାଲ ବାରମ୍ବାର ଖୋଲାଯିବା ପରେ ମଧ୍ୟ ରାଜ୍ୟ ସରକାର କେନ୍ଦ୍ରକୁ ଯୋଗ୍ୟ ହିତାଧିକାରୀଙ୍କ ନାଁ ଦେଲେ ନାହିଁ । ପଶ୍ଚିମ ଓଡ଼ିଶାକୁ ଅଣଦେଖା କଲେ । ପିଏମ ଆବାସରେ ଓଡିଶାର ସବୁ ଜିଲ୍ଲାର ଲୋକମାନଙ୍କ ନାଁ ଗଲେ ଭାରତ ସରକାର ଯୋଗ୍ୟ ହିତାଧିକାରୀଙ୍କୁ ଘର ଦେବାର ବ୍ୟବସ୍ଥା କରିବେ । ପଦ୍ମପୁର ବିକାଶର ସବୁଠୁ ପଛରେ । ଆଜିର ପ୍ରସଙ୍ଗ ଏହି ପଦ୍ମପୁର ଅଞ୍ଚଳକୁ କେବେ ନ୍ୟାୟ ମିଳିବ ? ଏଠାକାର ଅଞ୍ଚଳର ଲୋକମାନଙ୍କୁ କେବେ କାମ ମିଳିବ ? ରେଳ ଲାଇନ ପାଇଁ ରାଜ୍ୟ ସରକାର ଜମି ଉପଲବ୍ଧ କରାଇବେ ନା ନାହିଁ ? ଗଙ୍ଗାଧର ମେହେର ପ୍ରକଳ୍ପରେ ଜାମିକୁ ପାଣି ମାଡିବ ନା ନାହିଁ, ଆବାସ ଯୋଜନାରେ ଯୋଗ୍ୟ ହିତାଧିକାରୀଙ୍କୁ ଘର ଉପଲବ୍ଧ କରାଯିବ ନା ନାହିଁ ବୋଲି ଶ୍ରୀ ପ୍ରଧାନ ପ୍ରଶ୍ନ କରିଛନ୍ତି ।
ବିଧାନସଭାରେ ପ୍ରତି ଗ୍ରାମକୁ ପାନୀୟ ଜଳ ଯୋଗାଣ ପ୍ରଶ୍ନରେ ରାଜ୍ୟ ସରକାର ମିଛ କହୁଛନ୍ତି । ପାନୀୟ ଜଳ ନପାଇ ଜନସାଧାରଣ ନଦୀ, ପୋଖରୀ, ଚୁଆର ପାଣି ବ୍ୟବହାର କରିବା ସରକାରଙ୍କ ଦୃଷ୍ଟିଗୋଚର ହେଉନଥିବା କହୁଥିବା ବେଳେ ବାସ୍ତବରେ ଏବେ ବି ବରଗଡ ଜିଲ୍ଲାର ମହିଳାମାନେ ନଦୀ ଓ ପୋଖରୀକୁ ପାଣି ଆଣିବା ପାଇଁ ଯାଉଛନ୍ତି ।
କୁନା ପୁରୋହିତ ଏ ଅଞ୍ଚଳର ସ୍ୱାଭିମାନର ପ୍ରତୀକ । ଆଗାମୀ ୫ ତାରିଖରେ ପଦ୍ମ ଫୁଲରେ ଭୋଟ ଦେଇ ଆଶୀର୍ବାଦ କରିବା ପାଇଁ ଶ୍ରୀ ପ୍ରଧାନ ଜନସାଧାରଣଙ୍କୁ ନିବେଦନ କରିଛନ୍ତି ।
