ଶ୍ରୀ ପ୍ରଧାନ କହିଛନ୍ତି ଯେ ପଦ୍ମପୁର ହେଉଛି ବୀର ସ୍ୱାଧୀନତା ସଂଗ୍ରାମୀ ଶହୀଦ ମାଧୋ ସିଂହ, ହଟ୍ଟେ ସିଂହ, କୁଞ୍ଜଳ ସିଂହ, ବୈରୀ ସିଂହ ଓ ଐରୀ ସିଂହଙ୍କ ମାଟି । ସ୍ୱଭାବକବି ଗଙ୍ଗାଧର ମେହେରଙ୍କ କର୍ମଭୂମି। ଏହି ପବିତ୍ର ଭୂମିକୁ ଆସିବା ମୋ ପାଇଁ ସୌଭାଗ୍ୟ। ଆଜି ସେହି ବୀର ଓ ସ୍ୱାଭିମାନୀ ମାଟିକୁ ମୋର ପ୍ରଣାମ । ଆଜି ସେହି ମାଟିରେ କଳ ବଳ କୌଶଳ ପଇସା ଲଗେଇ ନିର୍ବାଚନ ଲଢେଇ କରିବାକୁ ଶାସକ ଦଳ ଚେଷ୍ଟା କରୁଛନ୍ତି । ମାତ୍ର ଯେତେ ଚେଷ୍ଟା କଲେ ବି ଶାସକ ଦଳ ଶହୀଦ ମାଧୋ ସିଂହଙ୍କ ବଂଶଜ ପଦ୍ମପୁରବାସୀଙ୍କୁ ଟଙ୍କା ଦେଇ କିଣିପାରିବେ ନାହିଁ । ପଦ୍ମପୁରରେ ନିଶ୍ଚୟ ପଦ୍ମଫୁଲ ଫୁଟିବ ।
ଶ୍ରୀ ପ୍ରଧାନ କହିଛନ୍ତି ଯେ ମୁଖ୍ୟମନ୍ତ୍ରୀ ସବୁଠି କହୁଛନ୍ତି, ମୁଁ ଦାୟିତ୍ୱ ନେଉଛି, ସେ କେଉଁଠି ଦାୟିତ୍ୱ ନେଇଛନ୍ତି । ସ୍ଥିତି ଏପରି ହୋଇଛି, ବିଧାନସଭାରେ ଧାମନଗରର ନବନିଯୁକ୍ତ ବିଧାୟକ ସୂର୍ଯ୍ୟବଂଶୀ ସୂରଜ ମୁଖ୍ୟମନ୍ତ୍ରୀ ଦାୟିତ୍ୱ ନେଇଥିବା ନିର୍ବାଚନମଣ୍ଡଳୀର ବିକାଶ କଥା ପଚାରିଲେ ତଥ୍ୟ ସଂଗ୍ରହ କରାଯାଉଥିବା କୁହାଯାଉଛି । ବିଧାନସଭାରେ ବିଧାୟକ ଶ୍ରୀ ନରସିଂହ ମିଶ୍ର ନାରୀ ନିର୍ଯ୍ୟାତନା ପଚାରିଥିବା ପ୍ରଶ୍ନର ଉତ୍ତରରେ ରାଷ୍ଟ୍ର ସ୍ୱରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରାଙ୍କ ଉତ୍ତରରେ ଆସିଛି ରାଜ୍ୟରେ ଧର୍ଷଣ ମାମଲା ୨୦୧୯ରେ ୨୯୫୦ ଥିଲା । ୨୦୨୧ରେ ନିୟନ୍ତ୍ରଣ ହେବା ପରିବର୍ତ୍ତେ ୩୩୨୭ ଧର୍ଷଣ ମାମଲା ଥିବା ମନ୍ତ୍ରୀ ଉତ୍ତର ରଖିଛନ୍ତି । ମୁଖ୍ୟମନ୍ତ୍ରୀ ଖୋଦ୍ ଗୃହମନ୍ତ୍ରୀ ଅଛନ୍ତି । ଏ କ’ଣ ନାରୀ ସଶକ୍ତିକରଣର ଉଦାହରଣ ବୋଲି ପ୍ରଶ୍ନ କରିଛନ୍ତି ଶ୍ରୀ ପ୍ରଧାନ।
ସେହିପରି ବିଧାନସଭାରେ ଶାସକ ଦଳର ବରିଷ୍ଠ ନେତା ସୌମ୍ୟ ରଞ୍ଜନ ପଟ୍ଟନାୟକ ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କୁ ଗତ ୫ ବର୍ଷରେ କେନ୍ଦ୍ରୀୟ ସହାୟତା ବିନିଯୋଗ ଉପରେ ପଚାରିଥିବା ପ୍ରଶ୍ନ ରାଜ୍ୟ ସରକାରଙ୍କ ଗୁମର ଫିଟାଇଛି । କେନ୍ଦ୍ର ଦେଉଥିବା ପଇସା ରାଜ୍ୟ ସରକାର ଖର୍ଚ୍ଚ ନକରି କେନ୍ଦ୍ର ଉପରେ ଦୋଷ ଲଦୁଛନ୍ତି । ଏହାବ୍ୟତିତ ବିଧାନସଭାରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଦେଇଥିବା ତଥ୍ୟରୁ ଜଣାପଡିଛି ୨୦୨୧-୨୨ ବର୍ଷ ଶେଷ ସୁଦ୍ଧା ରାଜ୍ୟରେ ମୋଟ ଋଣ ଭାର ୯୭ ହଜାର ୨୦୫ କୋଟି ୩ ଲକ୍ଷ ଟଙ୍କା ଅଛି । ମୁଣ୍ଡ ପିଛା ଋଣ ଭାରର ପରିମାଣ ହେଉଛି ୨୨ ହଜାର ୪୨ ଟଙ୍କା । ରାଜ୍ୟ ସରକାର ମିଛ ପ୍ରହେଳିକା ରଚନା କରିବାର କୌଣସି ସୁଯୋଗ ନାହିଁ । ରାଜ୍ୟ ସରକାର ନିଜେ ଏ ସବୁ ତଥ୍ୟ ବିଧାନସଭା ଗୃହରେ ଦେଇଛନ୍ତି ।
ରାଜ୍ୟରେ କା’ ସରକାର ଚାଲିଛି ବୋଲି ପ୍ରଶ୍ନ କରିବା ସହ ପ୍ରଧାନ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାର ଆବାସ ଯୋଜନାରେ ଘର ପାଇଁ ଟଙ୍କା ଦେଉଥିଲେ ମଧ୍ୟ ଘର ଆବଣ୍ଟନରେ ପଶ୍ଚିମ ଓଡ଼ିଶାକୁ ନଗଣ୍ୟ କରାଯାଇଛି । ମୋଦି ସରକାର ସ୍ୱଚ୍ଛ ଭାରତ ଯୋଜନାରେ ଶୌଚାଳୟ, ପ୍ରଧାନମନ୍ତ୍ରୀ କିଷାନ ଯୋଜନାରେ ଚାଷୀଙ୍କୁ ଟଙ୍କା, ପ୍ରତି ଘରକୁ ପାଇପରେ ପାଣି, ଉଜ୍ଜ୍ୱଳା ଯୋଜନାରେ ଗ୍ୟାସର ବ୍ୟବସ୍ଥା କରିଛନ୍ତି । ରାଜ୍ୟ ସରକାର ଚାଷୀଙ୍କ ଦେଇଥିବା ପ୍ରତିଶ୍ରୁତି ପାଳନ ନକରି ମିଲରଙ୍କ ସହ ମଧୁଚନ୍ଦ୍ରିକା କରୁଛନ୍ତି । ଗତ ବର୍ଷ ପ୍ରଧାନମନ୍ତ୍ରୀ ମୋଦିଙ୍କ ସରକାର ଧାନର ଏମଏସପି କ୍ୱିଣ୍ଟାଲ ପିଛା ୧୯୪୦ ଟଙ୍କା ଧାର୍ଯ୍ୟ କରିଥିଲେ । ଚଳିତ ବର୍ଷ ଏହି ମୂଲ୍ୟ ୨୦୪୦ ଟଙ୍କା ଧାର୍ଯ୍ୟ କରାଯାଇଛି । ମାତ୍ର ଏଠାରେ ରାଜ୍ୟ ସରକାର ଓ ମିଲରଙ୍କ ମଧୂଚନ୍ଦ୍ରିକା କାରଣରୁ ଧାନ କ୍ୱିଣ୍ଟାଲ ପିଛା ୧୨୦୦ରୁ ୧୩୦୦ ଟଙ୍କାରେ ବିକ୍ରି ହେଉଛି । ସୋହେଲାରେ ୨୦୧୬ ମସିହାରେ ମୁଖ୍ୟମନ୍ତ୍ରୀ ଘୋଷଣା କରିଥିବା କେନ୍ଦ୍ର ଅନୁଦାନ ବ୍ୟତିତ ଚାଷୀଙ୍କୁ ଅତିରିକ୍ତ ୧୦୦ ଟଙ୍କା ବୋନସ ରାଜ୍ୟର ଜଣେ ବି ଚାଷୀଙ୍କୁ ମିଳିପାରିନାହିଁ । ମୋଦି ସରକାର ଧାନ କିଣା ପାଇଁ ପଇସା ଦେବା ସତ୍ତ୍ୱେ ନବୀନ ସରକାର ଚାଷୀଙ୍କ ପଇସାକୁ ହଡପ କରୁଛନ୍ତି । ବିଜେପୁରରେ ମୁଖ୍ୟମନ୍ତ୍ରୀଙ୍କ ଦ୍ୱାରା ଘୋଷିତ ଗଙ୍ଗାଧର ମେହେର କେନାଲ ପ୍ରକଳ୍ପରେ ଏ ଯାଏଁ ମୁନ୍ଦେ ପାଣି ଜମିକୁ ମାଡିନାହିଁ।
ପଦ୍ମପୁରରେ ପ୍ରଧାନମନ୍ତ୍ରୀ ଫସଲ ବୀମା ସମ୍ପର୍କରେ କେନ୍ଦ୍ର କୃଷି ମନ୍ତ୍ରୀଙ୍କ ମନ୍ତବ୍ୟ ଏବଂ ନୂଆପଡ଼ା-ବରଗଡ଼ ରେଳଲାଇନରେ କେନ୍ଦ୍ର ରେଳ ମନ୍ତ୍ରୀଙ୍କ ଅଭିଭାଷଣ ରାଜ୍ୟ ସରକାରଙ୍କ ପାରିବାପଣିଆକୁ ପଦାରେ ପକାଇଛି । ମୋଦି ସରକାରଙ୍କ ଅନେକ ସହଯୋଗ ସତ୍ତ୍ୱେ ମଧ୍ୟ କେନ୍ଦୁପତ୍ର ତୋଳାଳିଙ୍କ ଦୁଃଖ ରାଜ୍ୟ ସରକାର ବୁଝୁନାହାନ୍ତି । ଭାତହାଣ୍ଡିରୁ ଗୋଟିଏ ଭାତ ଭଳି ମାଣ୍ଡୋସିଲ ଧାନମଣ୍ଡି, କିଛି ସୁବିଧା ନାହିଁ । ସୁନାର ଅଞ୍ଚଳ ବରଗଡ ଓ ମାଣ୍ଡୋସିଲରେ ରାଜ୍ୟ ସରକାରଙ୍କ ପକ୍ଷରୁ ଜଳସେଚନ, ପାଇପ ଯୋଗେ ପିଇବା ପାଣିର ବ୍ୟବସ୍ଥା ନହେବା ଦୁର୍ଭାଗ୍ୟଜନକ । ଲମ୍ବା ସମୟର ଶାସନରେ ରହିବା ପରେ ମଧ୍ୟ ଯୁବକମାନେ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି ।
ରାଜ୍ୟରେ ରେଡ୍ ନେଇ କେନ୍ଦ୍ରମନ୍ତ୍ରୀ କହିଛନ୍ତି ଯେ କେନ୍ଦ୍ର ଓ ରାଜ୍ୟ ସରକାରଙ୍କ ଦୁଇଟି ସଂସ୍ଥା ରେଡ୍ କରୁଛି । ଉଭୟ ସଂସ୍ଥାକୁ ନିଜ ନିଜର କାମ କରିବାକୁ ଦିଆଯାଉ । ଗରିବ ଲୋକଙ୍କ ଟଙ୍କା ହଡପ କରିବାର ଅଧିକାର କାହାର ନାହିଁ । କେଉଁଟା କେଉଁଟା ରାଜନୈତିକ ଉଦ୍ଦେଶ୍ୟ ପ୍ରଣୋଦିତ, ତାହା ସମୟ କହିବ । ଶାନ୍ତିପୂର୍ଣ୍ଣ ଅଞ୍ଚଳରେ ବିଜେଡି କଣ ଅହଙ୍କାର ଦେଖାଇବାକୁ ଚାହୁଁଛି । ମତ ପରିବର୍ତ୍ତନ ଭୟରେ ନୀରିହ ଲୋକଙ୍କ ଡରାଯାଉଛି, ଭୟ ଦେଖାଯାଉଛି । ଗରିବ ଜନଜାତିଙ୍କୁ ଡରାଇବା କାମରେ କାହିଁକି ପୋଲିସକୁ ଲଗାଯାଉଛି ? ଆଇନ ତା’ ବାଟରେ ଯାଉ । ଭୟ କଣ ପାଇଁ ବୋଲି କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ପ୍ରଶ୍ନ କରିଛନ୍ତି ।
ଓଡିଶା ଖବର ଆହୁରି ପଢ଼ନ୍ତୁ ।
