ଜାଣନ୍ତୁ ଲକଡାଉନ କଟକଣାରେ କଣ ହୋଇଛି କୋହଳ

by Rasmita Pradhan

ଭୁବନେଶ୍ଵର : କୋରୋନା ମୁକାବିଲା ପାଇଁ ଦେଶବ୍ୟାପି ଲକଡାଉନ କଟକଣା ବୃଦ୍ଧି କରାଯାଇଛି। ରାଜ୍ୟ ସରକାର ମଧ୍ୟ ଏନେଇ ତତ୍ପରତା ଦେଖାଇଛନ୍ତି। ତେବେ ଆସନ୍ତା 20 ତାରିଖ ପରଠାରୁ ରାଜ୍ୟରେ ଲକଡାଉନ କିଛିକାଂଶରେ କୋହଳ କରାଯାଇଛି। ସହରାଞ୍ଚଳ ଅପେକ୍ଷା ଗ୍ରାମାଞ୍ଚଳରେ ଅଧିକ କୋହଳ କରାଯାଇଛି। ଲକଡାଉନ କଟକଣାରେ ଗ୍ରାମାଞ୍ଚଳ ପାଇଁ ହୋଇଥିବା ପରିବର୍ତ୍ତନ ଗୁଡ଼ିକ ହେଉଛି- ପୌରାଞ୍ଚଳ ବାହାରେ ଥିବା ଗାଁ ଗୁଡ଼ିକର ଶିଳ୍ପ ସଂସ୍ଥା ଗୁଡ଼ିକ ଉତ୍ପାଦନ କାର୍ଯ୍ୟ କରିପାରିବେ। ଏମଏସଏମଇ ଶିଳ୍ପ ସଂସ୍ଥା ଗୁଡ଼ିକ ନିଜ କ୍ୟାମ୍ପସରେ କର୍ମଚାରୀଙ୍କୁ ରଖି କାମ ଆରମ୍ଭ କରିପାରିବେ। ଔଷଧ, ମେଡ଼ିକାଲ ଉପକରଣ ପ୍ରସ୍ତୁତି କାମ ହୋଇପାରିବ। ଗ୍ରାମାଞ୍ଚଳରେ ଫୁଡ୍ ପ୍ରୋସେସିଂ ୟୁନିଟ୍ କାର୍ଯ୍ୟ କରିବ। କୋଇଲା ଓ ଖଣି ଉତ୍ତୋଳନ କାର୍ଯ୍ୟ ଜାରି ରହିବ। ଝୋଟ ଶିଳ୍ପ ଚାଲିବ। ଗାଁରେ ଇଟା ତିଆରି ଚିମିନି ଚାଲିବ। ଗାଁରେ ରାସ୍ତା, ଜଳସେଚନ ପ୍ରକଳ୍ପ, ସମସ୍ତ ଶିଳ୍ପ ପ୍ରକଳ୍ପର ନିର୍ମାଣ କାର୍ଯ୍ୟ ହୋଇ ପାରିବ। ଗାଁରେ ଜଳ ଯୋଗାଣ, ପରିମଳ, ବିଜୁଳି ଓ ଟେଲିକମର ବିଜୁଳି ବିଛା କାମ ଜାରି ରହିବ। ବାତ୍ୟା ଓ ବନ୍ୟା ଆଶ୍ରୟସ୍ଥଳୀ କାମ ସହ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ କାମ ହେବ। ଜଳ ସମ୍ପଦ ବିଭାଗ ନୂଆ ପ୍ରକଳ୍ପରେ ଡ୍ୟାମ, ବ୍ୟାରେଜ, ଚେକ୍ ଡ୍ୟାମ୍, ମେନ୍ କେନାଲ ଓ ଭୂତଳ ପାଇପ ଲାଇନ କାମ ହେବ। ସହରାଞ୍ଚଳରେ ହୋଇଥିବା ପରିବର୍ତ୍ତନ- ଜଳ ଯୋଗାଣ, ସ୍ଵେରେଜ୍, ଡ୍ରେନେଜ୍ କାମ ହୋଇ ପାରିବ। ବର୍ଷା ଜଳ ଅମଳ, ଖେଳ ପଡ଼ିଆ, ପାର୍କ, ଷ୍ଟ୍ରିଟଲାଇଟ୍ କାମ ହେବ। ଟଏଲେଟ, କମ୍ୟୁନିଟି ସେଣ୍ଟର, ଶ୍ମସାନ ନିର୍ମାଣକୁ ଅନୁମତି ମିଳିଛି। ଇଲେକ୍ଟ୍ରିସିଆନ, ଆଇଟି ମରାମତି, ପାଣି ପାଇପ୍ ମିସ୍ତ୍ରୀ, ମୋଟର ମେକାନିକ୍, କାଠ କାରିଗରଙ୍କ ପାଇଁ କଟକଣା କୋହଳ ହୋଇଛି। ମୋବାଇଲ ମରାମତି, ଇଲେକ୍ଟ୍ରୋନିକ୍ ମରାମତି ଦୋକାନ ଖୋଲା ରହିବ। ନିର୍ମାଣ କାମରେ ବ୍ୟବହୃତ ହେଉଥିବା ଜିନିଷ ଦୋକାନ ଖୋଲା ରହିବ।

କ୍ଷୀର ସଂଗ୍ରହ ପାଇଁ ଓ ପରିବହନ ନେଇ କଟକଣା ନାହିଁ । କୁକୁଡା ଫାର୍ମ ଚାଲିପାରିବ । ପଶୁ ଖାଦ୍ୟ ଉତ୍ପାଦନ, ପରିବନହ ଓ ବଣ୍ଟନ ଉପରେ କିଛି ରୋକ୍ ନାହିଁ । ସାମାଜିକ ଦୂରତ୍ୱ ପାଳନ କରି ମନରେଗା କାର୍ଯ୍ୟକୁ ଅନୁମତି ଦିଆଯାଇଛି । ଶ୍ରମିକମାନେ ମାସ୍କ ବ୍ୟବହାର କରିବାକୁ କୁହାଯାଇଛି। କେବଳ ଜରୁରୀ ସେବା ପାଇଁ ଘରୋଇ ଗାଡି ବ୍ୟବହାରକୁ ଅନୁମତି ମିଳିପାରିବ । ଏ କ୍ଷେତ୍ରରେ 4 ଚକିଆ ଗାଡିରେ ଜଣେ ଡ୍ରାଇଭର ସହ ପଛ ସିଟରେ ଜଣେ ଯାଇପାରିବେ । ଦୁଇ ଚକିଆରେ କେବଳ ଜଣେ ଯିବେ । କୋରୋନା ଚିହ୍ନଟ ହୋଇଥିବା 9 ଜିଲ୍ଲାର ସହାରାଞ୍ଚଳରେ ଘରୋଇ ଗାଡିକୁ ଜରୁରୀ ସେବା ପାଇଁ ବ୍ୟବହାର କରାଯିବନି । ସମସ୍ତ ମାଲବାହୀ ଗାଡି ଯାତାୟତ କରିପାରିବ । ଦମକଳ ଓ ଆଇନ ଶୃଙ୍ଖଳା ରକ୍ଷା ପାଇଁ ନିୟୋଜିତ ଗାଡି ଚଳାଚଳରେ କୌଣସି ପ୍ରତିବନ୍ଧକ ନାହିଁ । ଟ୍ରକ ଚଳାଚଳ ଯୋଗୁଁ ହାଇୱେରେ ଏକ ନିର୍ଦ୍ଧାରିତ ବ୍ୟବଧାନରେ ଢାବା ଓ ଟ୍ରକ୍ ମରାମତି ଦୋକାନ ଖୋଲା ରହିବ । ଆସନ୍ତା 20 ତାରିଖରୁ ସମସ୍ତ ହସ୍ପିଚାଲ, ନର୍ସିଂହୋମ, କ୍ଲିନିକ୍, ପାଥୋଲାବ୍ , ରକସିନ ଓ ମେଡିକାଲ ଯୋଗାଣ ଓ ବିକ୍ରୟ ଜାରି ରହିବ ।

ରିଜର୍ଭ ବ୍ୟାଙ୍କ ଅଫ ଇଣ୍ଡିଆ, ସମସ୍ତ ବ୍ୟାଙ୍କ ଶାଖା, ଏଟିଏମ୍ କେନ୍ଦ୍ର, ବୀମା କମ୍ପାନି କାର୍ଯ୍ୟାଳୟ ଖୋଲା ରହିବ । ଡାକ ସେବା ସହ ପୋଷ୍ଟ ଅଫିସ ମଧ୍ୟ ଖୋଲା ରହିବ । ପିଡିଏସ୍ ସାମଗ୍ରୀ ଯୋଗାଣ କେନ୍ଦ୍ର ସହ ଗ୍ରୋସରୀ ଫଳ, ପନିପରିବା, କ୍ଷୀର, ମାଛ, ମାଂସ, ପଶୁ ଖାଦ୍ୟ, ବିହନ, ସାର, କୀଟନାଶକ ଦୋକାନ ଖୋଲା ରହିବ । ଏସବୁ ସାମଗ୍ରୀର ପରିବହନ ମଧ୍ୟ ହେବ । ରେଷ୍ଟୁରାଣ୍ଟ ଓ ଢାବା ଗୁଡିକ ହୋମ୍ ଡେଲିଭରି କରିପାରିବେ । ଅନଲାଇନ୍ ଡେଲିଭରି ସର୍ଭିସ୍, କୋରିୟର ସର୍ଭିସ୍ ଓ ହୋମ ଡେଲିଭରି କାର୍ଯ୍ୟ ଚାଲିବ । ଖାଦ୍ୟ ଓ ଗ୍ରୋସରୀ ସାମଗ୍ରୀ ବିକୁଥିବା ବିଗ୍ ବଜାର, ରିଲାଏନ୍ସ ଫ୍ରେସ୍, ଓମଫେଡ୍, ଚିଲିକା ଫ୍ରେସ୍ ଆଦି ଖୋଲା ରହିବ । ଶୀତଳ ଭଣ୍ଡାର, ୱେୟାର ହାଉସିଂ ସେବା ଆଦି ଖୋଲା ରହିବ । କୋରୋନା ହଟସ୍ପଟ ଖୋର୍ଦ୍ଧା ଜିଲ୍ଲାର ନିଷିଦ୍ଧାଞ୍ଚଳରେ ଉପରୋକ୍ତ କୋହଳ ନୀତି କାର୍ଯ୍ୟକାରୀ ହେବନି । ହୋମ୍ କ୍ୱାରେଣ୍ଟାଇନ ଉଲ୍ଲଘଂନ କଲେ କଠୋର କାର୍ଯ୍ୟାନୁଷ୍ଠାନ ହେବ । ଲକ ଡାଉନ ନିୟମ ଭଙ୍ଗ ନେଇ କଠୋର କାର୍ଯ୍ୟାନୁଷ୍ଠାନ ନେବାକୁ ଜିଲ୍ଲାପାଳ, ପୋଲିସ କମିଶନର, ତହସିଲଦାର, ବିଡିଓ ପଦକ୍ଷେପ ନେବାକୁ କୁହାଯାଇଛି ।