ବିଜେଡି ଓ କଂଗ୍ରେସର ଛାମୁଆଁ ସଙ୍ଗଠନ ପଦବୀ ଖାଲି, କିଏ ଧରିବ ମଙ୍ଗ ?

ଭୁବନେଶ୍ୱର: ବିଜେଡି ଓ କଂଗ୍ରେସର  ଛାମୁଆଁ ସଙ୍ଗଠନ ପଦବୀ ଖାଲି । କିଏ ଧରିବ ଏହି ପଦବୀର ମଙ୍ଗ । ଏହାକୁ ନେଇ ଆରମ୍ଭ ହୋଇଛି କଳ୍ପନା ଜଳ୍ପନା । ଆଗକୁ ପୌର ନିର୍ବାଚନ ଥିବା ବେଳେ ଏବେଠାରୁ ପ୍ରସ୍ତୁତି ଆରମ୍ଭ କଲେଣୀ ଉଭୟ ଦଳ । ସେପଟେ ବିଜେପିର ସଭ୍ୟ ସଂଗ୍ରହ ଅଭିଯାନ ଶେଷ ହୋଇଥିବା ବେଳେ ସାଙ୍ଗଠନିକ ନିର୍ବାଚନ ପାଇଁ ରହିଛି ବେଶ ସମୟ ବାକି ।

କିଏ ଧରିବ ବିଜେଡିର ଛାତ୍ର, ଯୁବ ଓ ମହିଳା ସଙ୍ଗଠନର ମଙ୍ଗ । କାହାକୁ ଏହି ପଦବୀରେ ବସାଇବେ ଦଳରେ ସୁପ୍ରିମୋ । ଏହାକୁ ନେଇ ଏବେ ବିଜେଡିରେ ଆରମ୍ଭ ହୋଇଛି ଜୋରଦାର ଲବି । ଯୁବ ଓ ମହିଳା ବିଜେଡି ପଦବୀରେ ଥିବା ଅମରେଶ ପତ୍ରୀ ଓ ମୀନତି ବେହେରାଙ୍କୁ ନୂଆ ଦାୟିତ୍ୱ ମିଳିଛି । ତେଣୁ ତାଙ୍କ ସ୍ଥାନରେ ନୂଆ ମୁହଁ ଦେବାକୁ ହାଇକମାଣ୍ଡ ସ୍ଥିର କରିଛନ୍ତି । ଯୁବ ବିଜେଡି ସଭାପତି ଦୌଡରେ ଅଛନ୍ତି ବିଧାୟକ ଚନ୍ଦ୍ରସାରଥୀ  ବେହେରା, ପ୍ରୀତିରଞ୍ଜନ ଘଡେଇ ଓ ଦେବଶ ଆଚାର୍ଯ୍ୟଙ୍କ ପରି ଯୁବ ବିଧାୟକ । ସେହିପରି ମହିଳା ବିଜେଡିର ସଭାପତି ଦୌଡରେ ଅଛନ୍ତି ବିଧାୟିକା ସ୍ନେହାଙ୍ଗିନୀ ଛୁରିଆ, ଲତିକା ପ୍ରଧାନଙ୍କ ପରି ନେତ୍ରୀ । ଛାତ୍ର ବିଜେଡିର ସଭାପତି ପାଇଁ ମଧ୍ୟ ଏକାଧିକ ଆଶାୟୀ ରହିଛନ୍ତି । ତେବେ ଆସନ୍ତା ୧ ତାରିଖରେ ବିଜେଡିର କାର୍ଯ୍ୟକାରୀଣୀ ବୈଠକ ବସୁଥିବା ବେଳେ ୨ ତାରିଖରୁ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୂଆ ସଭ୍ୟ ସଂଗ୍ରହ ଅଭିଯାନ ଆରମ୍ଭ କରିବେ । ତେବେ ଛାମୁଆଁ ସଙ୍ଗଠନର ପୁର୍ନଗଠନ କଥା ଦଳର ସୁପ୍ରିମୋ ଠିକ ସମୟରେ ଚିନ୍ତା କରି ଘୋଷଣା କରିବେ ବୋଲି କହିଛନ୍ତି ବିଜେଡି ବିଧାୟିକା ତଥା ସରକାରୀ ଦଳର ମୁଖ୍ୟସଚେତକ ପ୍ରମିଳା ମଲ୍ଲିକ ।

ଅନ୍ୟପଟେ ରାଜ୍ୟରେ ମୁଖ୍ୟ ବିରୋଧୀ ଦଳ ସ୍ଥାନ ହରାଇଥିବା କଂଗ୍ରେସର ସଙ୍ଗଠନ ରାଜ୍ୟରେ ବିପର୍ଯ୍ୟୟ । ଦଳ ଆଡୁ ମୁହଁ ଫେରାଇ ନେଲେଣୀ କର୍ମୀ ଓ ନେତା । ଏପରି ସ୍ଥିତିରେ ଦଳକୁ ପୁଣିଥରେ ଅଂଟା ସଳଖ କରି ଛିଡା କରିବା ପାଇଁ ଦଳ ପ୍ରସ୍ତୁତି ଆରମ୍ଭ କରିଛି । ଏପରିକି  ଚଳିତ ବର୍ଷ  ୪୦ ଲକ୍ଷରୁ ଅଧିକ ସଭ୍ୟ ସଂଗ୍ରହ କରିବା ଲକ୍ଷ୍ୟରେ ରହିଛି କଂଗ୍ରେସ । ବିଦେଶ ଗସ୍ତରେ ଥିବା ପିସିସି ସଭାପତି ନିରଞ୍ଜନ ପଟ୍ଟନାୟକ ଓଡିଶା ଫେରିବା ପରେ ଦଳର ଗୁରୁତ୍ୱପୂର୍ଣ ବୈଠକ ବସି ଦଳ ତାର ରଣନୀତି ତିଆରି କରିବ ବୋଲି କହିଛନ୍ତି ବରିଷ୍ଠ ନେତା ତଥା ବିଧାୟକ ସୁରେଶ କୁମାର ରାଉତରାୟ । ସେପଟେ ଦଳର ଛାମୁଆଁ ସଙ୍ଗଠନ ପଦବୀରେ କେହି ନଥିବା ବେଳେ ଦଳର ହାଇକମାଣ୍ଡଙ୍କ ଆଗାମୀ ରଣନୀତି ପରେ ଦଳ ଏହା ଉପରେ ବିଚାର କରିବେ ବୋଲି କହିଛନ୍ତି ପୂର୍ବତନ ଯୁବ କଂଗ୍ରେସ ସଭାପତି ସଂଗ୍ରାମ ଜେନା ।

ସାଧାରଣ ନିର୍ବାଚନ ପରେ ଏବେ ସଙ୍ଗଠନ ବଢ଼ାଇବା ଚିନ୍ତା । ନୂଆ ସଭ୍ୟଙ୍କୁ ନିଜ ଦଳକୁ ଆଣି ସଙ୍ଗଠନ ବଢାଇବା ପାଇଁ ରାଜ୍ୟର 2 ପ୍ରମୁଖ ଦଳର ପ୍ରୟାସ । ତେବେ ଏହା ଭିତରେ କିଏ ଧରିବ ଛାମୁଆ ସଙ୍ଗଠନର ମଙ୍ଗ ଏହାକୁ ନେଇ ବିଜେଡି ଓ କଂଗ୍ରେସରେ ଆରମ୍ଭ ହୋଇଗଲାଣୀ ଲବି ।