ସଟ୍‌ ଡାଉନ ଭିତରେ ସିଲ୍‌ ହେଲା କଟକର ପଟ୍ଟାପୋଲ ଅଞ୍ଚଳ

କଟକ : ସଟ୍‌ ଡାଉନ ଭିତରେ ସିଲ୍‌ ହୋଇଛି କଟକର ପଟ୍ଟାପୋଲ ଅଞ୍ଚଳ । ପଟ୍ଟାପୋଲ ଅଂଚଳରୁ ଜଣେ କୋରନା ରୋଗୀ ଚିହ୍ନଟ ହେବା ପରେ ଚାରିପାଖ ଅଞ୍ଚଳକୁ ସିଲ୍‌ କରିଛି କଟକ ମହାନଗର ନିଗମ । ଏହି ଅଞ୍ଚଳରେ ସାନିଟାଇଜ ସହିତ କୋରନା ବ୍ୟକ୍ତି କାହା ସଂସ୍ପର୍ଶରେ ଆସିଛନ୍ତି ସେ ନେଇ ସର୍ଭେ କାର୍ଯ୍ୟ କରାଯାଉଛି । ସେହିପରି ଦ୍ୱିତୀୟ ଦିନରେ ମଧ୍ୟ କଟକ ସହର ରାଜରାସ୍ତାରେ ଲୋକ ଶୂନ୍ୟ ରହିଥିଲା । ପ୍ରଥମ ଦିନ ତୁଳନାରେ ଆଜି ସହରରେ ଅଧିକ ପୋଲିସ ରହିଥିବା ଦେଖିବାକୁ ମିଳିଛି । ନିୟମ ଭାଙ୍ଗିବାରେ ଆଜି ବି ସେ ଭଳି କୌଣସି ବ୍ୟକ୍ତି ଚିହ୍ନଟ ହୋଇନାହାନ୍ତି ।

ସେହିପରି ବକ୍ସିବଜାରରୁ ଷ୍ଟୁଆର୍ଟ ସାଇନସ୍‌ କଲେଜ, ତିନିକୋଣିଆ ବଗିଚାରୁ ବକ୍ସିବଜାର, ସୂତାହାଟ ମତ୍ସଜିଦ ଛକଠାରୁ ତିନିକୋଣିଆ ବଗିଚା ସମ୍ପୂର୍ଣ୍ଣ ଅଞ୍ଚଳକୁ ସିଲ୍‌ କରାଯାଇଛି । ଏହି ସମସ୍ତ ଅଞ୍ଚଳ ମଧ୍ୟ ଭାଗରେ ଥିବା ପଟ୍ଟାପୋଲ ଅଞ୍ଚଳରୁ କୋରନା ରୋଗୀ ଚିହ୍ନଟ ହେବା ପରେ ଏ ଭଳି ପଦକ୍ଷେପ ନିଆୟାଇଛି । ଗତାକାଲି ସଂଧ୍ୟାରେ ସି.ଏମ.ସି ଘୋଷଣା ପରେ ଆଜି ସକାଳେ ସିଲ୍‌ ହୋଇଥିବା ଅଞ୍ଚଳର ସମସ୍ତ ଏଣ୍ଟ୍ରି ଓ ଏକଜିଟ ପଏଣ୍ଟରେ ବ୍ୟାରିକେଟ କରାଯାଇଛି । ସି.ଏମ.ସିର ୩ ଜଣ ଅଧିକାରୀଙ୍କୁ ଦାୟିତ୍ୱ ଦେବା ସହିତ ପରିମଳ, ଖାଦ୍ୟ ସାମଗ୍ରୀ ଓ ସ୍ୱାସ୍ଥ୍ୟ ପରୀକ୍ଷା ଆଦି ଉପରେ ଗୁରୁତ୍ୱ ଦିଆଯାଉଛି । ଏଥିସହିତ କୋରନା ଆକ୍ରାନ୍ତ ବ୍ୟକ୍ତି ଜଣଙ୍କ ଆଉ କାହା କାହା ସଂସ୍ପର୍ଶରେ ଆସିଛନ୍ତି ସେ ବାବଦରେ ମଧ୍ୟ ଟ୍ରାକିଂ ଓ ଷ୍ଟ୍ରେସିଂ କାର୍ଯ୍ୟ ଜାରି ରହିଥିବା କହିଛନ୍ତି ସିଏମସି ଡେପୁଟି କମିଶନର ।

ଗୋଟିଏ ପଟେ ପଟ୍ଟାପୋଲ ପାଖ ଅଞ୍ଚଳ ସମ୍ପୂର୍ଣ୍ଣ ସିଲ ରହିଥିବା ବେଳେ ସେଠାରେ ପୋଲିସ ଫୋର୍ସଙ୍କୁ ମଧ୍ୟ ମୁତୟନ କରାଯାଇଛି । କେବଳ ଯେ ପଟ୍ଟାପୋଲ ଅଞ୍ଚଳ ତା ନୁହଁ, ସଟ୍‌ ଡାଉନର ଆଜି ଦ୍ୱିତୀୟ ଦିନରେ ବି ସାରା ସହରରେ ପୋଲିସ ଫୋର୍ସଙ୍କୁ ମୃତୟନ କରାଯାଇଛି । ସରକାରୀ ନୀୟମକୁ ସମସ୍ତେ କଡାକଡି ଭାବେ ପାଳନ କରୁଛନ୍ତି । ତେବେ ସରକାରଙ୍କର ଯଦି କୌଣସି ପରବର୍ତ୍ତି ନିର୍ଦ୍ଦେଶ ନ ଆସେ ତେବେ ଆଜି ରାତି ୮ ଟାରେ ସଟ୍‌ ଡାଉନ ସମୟ ଶେଷ ହେବ । ତେବେ ସଟଡ଼ାଉନ ସମୟ ଅତିକ୍ରାନ୍ତ ହେବା ପରେ , ଲୋକେ ଯେପରି ଦୋକାନ ବ ଜାରରେ ଭିଡ ନ ଜମାନ୍ତି, ସେଥିପାଇଁ ସରକାରଙ୍କ ପକ୍ଷରୁ ଅନୁରୋଧ କରାଯାଇଛି । ସାମାଜିକ ଦୂରତା ବଜାୟ ରଖିବା ସହ ଲୋକେ ଯେପରି ଆଜି 8ଟା ପରେ ଏବଂ ଆସନ୍ତା କାଲି ସକାଳେ ଘରରୁ ନ ବାହାରିବା ପାଇଁ କଟକ ଡିସିପି ଲୋକମାନଙ୍କୁ ଅନୁରୋଧ କରିଛନ୍ତି ।

ସଜାଗ ଓ ସଚେତନତା ହେଉଛି କୋରନା ମୁକାବିଲାର ମୂଳ ମନ୍ତ୍ର । ସାମାଜିକ ଦୂରତ୍ୱ ବଜାୟ ରଖିଲେ ହିଁ ଆମେ କରୋନାଠାରୁ ଦୂରେଇ ରହିବା । ସରକାରଙ୍କ ନିର୍ଦେଶକରେ ହେଉ କିମ୍ବା ପୋଲିସ ବଳ ପୂର୍ବକ ମାଡମାରି, ଜୋରିମାନା ଆଦାୟ କରି ତଡିବା ଅପେକ୍ଷା ନିଜେ ସଜାଗ ଓ ସଚେତନ ହୋଇ ଘରେ ଲକଡାଉନରେ ରହିବା ବୁଦ୍ଧିମାନର କାମ ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି । ସାମାଜିକ ଦୂରତ୍ୱ ରଖିରେ ହିଁ କୋରୋନାକୁ ଜିତିବାର ଏକମାତ୍ର ବାଟ ବୋଲି ଡାକ୍ତରମାନେ ମଧ୍ୟ ଲଗାତର ସତର୍କ କରିଆସୁଛନ୍ତି ।