କୋଭିଡ୍ ଯୋଦ୍ଧାଙ୍କୁ ନେଇ ମିଛ କହୁଛନ୍ତି ରାଜ୍ୟ ସରକାର

by Banajyotshna Ray

ଅର୍ଗସ ବ୍ୟୁରୋ: କୋଭିଡ୍ ଯୋଦ୍ଧାଙ୍କୁ ନେଇ ମିଛ କହୁଛନ୍ତି ରାଜ୍ୟ ସରକାର । କୋଭିଡ ଯୋଦ୍ଧାଙ୍କ ସହାୟତା ରାଶି ଏବଂ କେନ୍ଦ୍ରକୁ ରାଜ୍ୟ ଦେଇଥିବା ତାଲିକାକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଛି ବିଜେପି । ଦଳର ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ ଅଭିଯୋଗ କରିଛନ୍ତି, ରାଜ୍ୟରେ ସଂକ୍ରମଣ ଓ ମୃତ୍ୟୁ ବଢି ଚାଲିଥିବା ବେଳେ କୋଭିଡ ଯୋଦ୍ଧାଙ୍କୁ ନେଇ ମିଛ ତଥ୍ୟ ରଖି ସାଧାରଣ ଜନତାଙ୍କୁ ବିଭ୍ରାନ୍ତ କରୁଛନ୍ତି ସରକାର । ଷାଠିଏ ଜଣ କୋଭିଡ ଯୋଦ୍ଧାଙ୍କ ନାଁ ପ୍ରସ୍ତାବ ଦେଇଥିଲେ ଏବଂ ଜଣଙ୍କୁ କେନ୍ଦ୍ର ସରକାର ପ୍ରୋତ୍ସାହନ ଦେବାକୁ ସମ୍ମତି ଦେଇଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କହୁଛି ।

କିନ୍ତୁ ମାର୍ଚ୍ଚ ୩୦ ଠାରୁ ଗତକାଲି ପର୍ଯ୍ୟନ୍ତ ମାତ୍ର ୪୭ ଜଣ ଯୋଦ୍ଧା କୋଭିଡରେ ମୃତ୍ୟୁବରଣ କରିଥିବା କଥା କେନ୍ଦ୍ରକୁ ଅବଗତ କରିଛନ୍ତି । ଯାହା ମଧ୍ୟରୁ ୪୨ ଜଣଙ୍କ ବାବଦରେ ତଥ୍ୟ ପ୍ରଦାନ କରିଛନ୍ତି । ସେ ମଧ୍ୟରୁ ଜଣଙ୍କୁ ପ୍ରୋତ୍ସାହନ ରାଶି ମିଳିଥିବା ବେଳେ ଅନ୍ୟ ମାନଙ୍କର କଥା ବିଚାରଧୀନ ରହିଛି । ରାଜ୍ୟ ସରକାର କୋଭିଡ ଯୋଦ୍ଧାଙ୍କୁ କେନ୍ଦ୍ର ସହାୟତା ଛଡା ୫୦ ଲକ୍ଷ ଟଙ୍କାର ପ୍ରୋତ୍ସାହନ ଦେବାକୁ ଘୋଷଣା କରିଥିଲେ । କିନ୍ତୁ ଜଣଙ୍କୁ ମଧ୍ୟ ଏପର୍ଯ୍ୟନ୍ତ ଏହି ଟଙ୍କା ମିଲିନାହିଁ । ଆଶାକର୍ମୀ ଓ ଅଙ୍ଗନବାଡି କର୍ମୀଙ୍କୁ ମଧ୍ୟ ପ୍ରୋତ୍ସାହନ ସହ ଅବସର ପର୍ଯ୍ୟନ୍ତ ଦରମା ଦେବାକୁ ଘୋଷଣା କରିଥିଲେ । କିନ୍ତୁ ପ୍ରତିଶ୍ରୁତି ରକ୍ଷା କରିନାହାନ୍ତି ରାଜ୍ୟ ସରକାର।