ଲଭ୍‌, ସେକ୍ସ ଓ ଧୋକା: ମହିଳା ଫରେଷ୍ଟରଙ୍କୁ ପ୍ରତାରଣା କରି କିରାଣୀ ଗିରଫ

 ଅନୁଗୁଳ: ପୁରୀ ଜିଲ୍ଲାରେ ଫରେଷ୍ଟର ଭାବେ କାର୍ଯ୍ୟରତ ଜଣେ ବିବାହିତା ମହିଳା ଗତ ୨୦୧୭ ମସିହାରେ ଅନୁଗୁଳ ଫରେଷ୍ଟ ରେଞ୍ଜର୍ସ କଲେଜକୁ ପ୍ରଶିକ୍ଷଣ ନେବାକୁ ଯାଇଥିଲେ । ତାଙ୍କର ୫ ବର୍ଷର ଏକ ସନ୍ତାନ ମଧ୍ୟ ଅଛି । ସେଠାରେ ସେ ତାଲିମ ନେବା ସମୟରେ ରେଞ୍ଜର୍ସ କଲେଜରେ କିରାଣୀ ଭାବେ କାର୍ଯ୍ୟରତ ବିଶ୍ୱଜିତ ନାୟକଙ୍କ ସହିତ ତାଙ୍କର ଘନିଷ୍ଠତା ବଢ଼ିଥିଲା ।

ନିୟମିତ ବ୍ୟବଧାନରେ ସେମାନେ ମୋବାଇଲରେ କଥା ହେବା ସହ ଚାଟିଂ ମଧ୍ୟ କରୁଥିଲେ । ତେବେ ମହିଳାଙ୍କ କହିବା ଅନୁଯାୟୀ ନୂଆ ବର୍ଷ ଅବସରରେ ବିଶ୍ୱଜିତ ତାଙ୍କୁ ଅନୁଗୁଳ ଡକାଇଥିଲେ । ଆଉ ଏକାଠି ଦୁହେଁ ରାତ୍ରିଯାପନ କରିଥିଲେ । ସେହି ସମୟରେ ବିବାହ କରିବାର ପ୍ରତିଶ୍ରୁତି ଦେଇ ବିଶ୍ୱଜିତ ତାଙ୍କ ସହିତ ଶାରୀରିକ ସଂପର୍କ ରଖିଥିଲେ ।

ମାତ୍ର ତା ପର ଦିନ  ବିଶ୍ୱଜିତ ନିଜ କଥାରୁ ଓହରି ଯାଇଥିଲେ । ବିବାହ କରିବାକୁ ମନା କରିବା ସହ ତାଙ୍କୁ ଧମକ୍ ଚମକ ବି ଦେଇଥିଲେ । ଏହାକୁ  ନେଇ ପୀଡ଼ିତା ମହିଳା ଫରେଷ୍ଟର ଅନୁଗୁଳ ଥାନାରେ ଅଭିଯୋଗ କରିଥିଲେ ।

ପୀଡ଼ିତାଙ୍କ ଅଭିଯୋଗ ପରେ ଉଭୟଙ୍କ ଡାକ୍ତରୀ ପରୀକ୍ଷା କରାଇବା ପରେ ବିଶ୍ୱଜିତଙ୍କୁ ପୋଲିସ କୋର୍ଟ ଚାଲାଣ କରିଥିବା ଜଣାପଡିଛି । ଅନ୍ୟପଟେ ରେଞ୍ଜର କଲେଜ ଅଧ୍ୟକ୍ଷ ଏ ସମ୍ପର୍କରେ ତାଙ୍କ ନିକଟରେ କୌଣସି ଅଭିଯୋଗ ହୋଇ ନଥିବା କହିଛନ୍ତି । ସମ୍ପୃକ୍ତ କିରାଣୀ ଦୁଇ ଦିନ ଛୁଟି ନେଇ ଯାଇଛନ୍ତି । ପୋଲିସ ପକ୍ଷରୁ ସୂଚନା ମିଳିଲେ ସମ୍ପୃକ୍ତ କିରାଣୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କଲେଜ ଅଧ୍ୟକ୍ଷ କହିଛନ୍ତି ।