ଅର୍ଗସ ବ୍ୟୁରୋ: ଆମେ କହୁଛୁ ବେଲପାଳ ଗାଁର ଅଭିରାମ ବିଶ୍ୱାଳଙ୍କ ଭିନ୍ନକ୍ଷମ ପୁଅ ଅଲେଖ ବିଶ୍ୱାଳଙ୍କ କଥା। ଅଭିରାମ ଦିନ ମଜୁରିଆ ହୋଇଥିବାରୁ ସେ ମଜୁରୀ କାମ କଲେ ତାଙ୍କ ପରିବାର ଚଳନ୍ତି। ଯେଉଁଦିନ ଅଭିରାମ ମୁଲ ନ ଲାଗନ୍ତି ସେଦିନ ତାଙ୍କ ପରିବାର ପାଇଁ ଉପବାସର ଦିନ। ତାଙ୍କର ଘର ବ୍ୟତୀତ ଜମି ବାଡ଼ି କହିଲେ କିଛି ନାହିଁ । ଗତ ୨ ବର୍ଷ ହେବ ଘରର ଛପର ନ କରିବାରୁ ବର୍ଷାରେ କାନ୍ଥ ଫାଟି ଗଳି ପଡ଼ିଲାଣି। ବର୍ଷା ହେଲେ ଘରେ ଆଣ୍ଠୁଏ ଲେଖାଏଁ ପାଣି। ଏସବୁ ସତ୍ୱେ ୨ ଭିନ୍ନକ୍ଷମ ପୁଅକୁ ନେଇ ଚଳିବା କେତେ ଯେ କଷ୍ଟ ତାହା ନ ଦେଖିଲେ ଜାଣି ହେବନି। ଗଲା ବନ୍ୟାରେ ପ୍ରଶାସନ ଏ ପରିବାରକୁ ଖଣ୍ଡିଏ ପାଲ ପ୍ରଦାନ କରିଥିଲେ ସେଇ ପଲିଥିନ ଘରେ ଆଶ୍ରୟ ନେଉଛନ୍ତି ଏ ପରିବାର।
ପ୍ରଧାନମନ୍ତ୍ରୀ ଆବାସ ଯୋଜନାରେ ତାଙ୍କ ନାମ ଲିଷ୍ଟରେ ନଥିବା ଦେଖି ତାଙ୍କର ସ୍ବପ୍ନ ମଉଳି ଯାଇଛି । ତଥାପି ଗ୍ରାମର କିଛି ଲୋକେ ଏହି ଭିନ୍ନକ୍ଷମ ୨ ପିଲାଙ୍କୁ ଧରି ରାଜନଗର ବ୍ଲକ ସମ୍ମୁଖରେ ଧାରଣାରେ ବସିଥିଲେ। ବ୍ଲକ ଉନ୍ନୟନ ଅଧିକାରୀ ତାଙ୍କୁ ଆଶ୍ୱାସନା ଦେଇ ଘରକୁ ଫେରେଇ ଦେଲେ। ଯଦି ଭିନ୍ନକ୍ଷମ ପରିବାରକୁ ସରକାରୀ ଯୋଜନାରେ ବାଦ ଦିଆଯାଉଛି ତେବେ ସରକାରୀ ଯୋଜନା କାହା ପାଇଁ ? ସରକାର ଏ ଭିନ୍ନକ୍ଷମ ପରିବାର ପ୍ରତି ପାତର ଅନ୍ତର ନ କରି ଖଣ୍ଡିଏ ପକ୍କାଘର ଯୋଗାଇ ଦେବାକୁ ବୁଦ୍ଧିଜୀବି ମହଲରେ ଦାବି ହେଉଛି।
