ମାନବପ୍ରେମୀ ଆଦିତ୍ୟ ଦାସଙ୍କ ମୃତ୍ୟୁକୁ ନେଇ ପରିବାରର ସଙ୍ଗୀନ ଅଭିଯୋଗ । ଆଦିତ୍ୟଙ୍କ ବାପା କହିଲେ, ବୋହୁ ହିଁ 1 ନମ୍ବର ଦୋଷୀ । କାରଣ ଆଦିତ୍ୟଙ୍କ ମୃତ୍ୟୁ ଖବର ସେ ହିଁ ପ୍ରଥମେ ଜାଣିଥିଲେ । ଏବଂ ଆଦିତ୍ୟଙ୍କ ମୃତ୍ୟୁ ପୂର୍ବରୁ ବିଦ୍ୟାଶ୍ରୀ ମାଷ୍ଟରକ୍ୟାଣ୍ଟିନରେ ରହିବା ରହସ୍ୟର ପର୍ଦ୍ଦାଫାସ୍ ହୋଇନି ।
ଏ ବିଷୟରେ ବାରମ୍ବାର କ୍ରାଇମବ୍ରାଞ୍ଚକୁ କହିଥିଲେ ମଧ୍ୟ ଗୁରୁତ୍ବ ଦିଆଯାଇନି । ଆଦିତ୍ୟଙ୍କ ମୃତ୍ୟୁ ପଛରେ ଆହୁରି ବଡ ବଡ ଲୋକଙ୍କ ସମ୍ପୃକ୍ତି ଥିବା କହିଛନ୍ତି ଆଦିତ୍ୟଙ୍କ ବାପା । ସେହିପରି ଆଦିତ୍ୟଙ୍କ ମାଆ ପଦ୍ମାଳୟାଙ୍କ ଅଭିଯୋଗ, ଜନସେବା କରୁଥିବା ଆଦିତ୍ୟ ପୌର ନିର୍ବାଚନ ଲଢିବାକୁ ପ୍ରସ୍ତୁତ ହେଉଥିଲେ । ସେଥିପାଇଁ ରାଜନୈତିକ ଶତ୍ରୁତା ହତ୍ୟାର କାରଣ କରାଯାଇଥାଇପାରେ ବୋଲି କହିଛନ୍ତି ପଦ୍ମାଳୟା ।
ଆଦିତ୍ୟଙ୍କ ମୃତ୍ୟୁର ତଦନ୍ତ କ୍ରାଇମବ୍ରାଞ୍ଚ ସଠିକ୍ ଭାବେ କରିନାହିଁ । ହାଇକୋର୍ଟରେ କ୍ରାଇମବ୍ରାଞ୍ଚ ଷ୍ଟାଟସ୍ ରିପୋର୍ଟ ଉପରେ ଶୁଣାଣି ବେଳେ ଏହା କହିଛନ୍ତି ଆଦିତ୍ୟଙ୍କ ଓକିଲ । ଯେଉଁଥିରେ ସେ ଦର୍ଶାଇଛନ୍ତି, ମୃତଦେହ ଉଦ୍ଧାର ପରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଷ୍ଟମର୍ଟମ ହୋଇନାହିଁ । ଖାଲି ସେତିକି ନୁହେଁ ଡେଡବଡି ସକାଳ 7ଟାରେ ଜବତ ହେଲା କିନ୍ତୁ ତଦନ୍ତ ରିପୋର୍ଟରେ କୁହାଯାଇଛି ଦିନ 10ଟା । ଖାଲି ସେତିକି ନୁହେଁ 3 ଜଣ ସାକ୍ଷୀଙ୍କ ଉପସ୍ଥିତିରେ ମୃତଦେହ ଉଦ୍ଧାର ହୋଇଥିବା ବେଳେ 2 ଜଣଙ୍କ ଦସ୍ତଖତ ରହିଛି । ଆସନ୍ତା 26 ତାରିଖ ସୁଦ୍ଧା ସତ୍ୟପାଠ ଆକାରରେ ଏସବୁ ତଥ୍ୟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ଏହାପରେ ସିବିଆଇ ତଦନ୍ତ ନେଇ ନିଷ୍ପତ୍ତି ଶୁଣାଇବେ କୋର୍ଟ ।
7 ମାସ ପରେ ବି ଆଦିତ୍ୟ ଦାସଙ୍କ ମୃତ୍ୟୁ ରହସ୍ୟରୁ ହଟୁନି ପରଦା । କ୍ରାଇମବ୍ରାଞ୍ଚ ତଦନ୍ତ ଉପରେ ପରିବାର ଲୋକେ ଭରସା କରିପାରୁ ନାହାଁନ୍ତି । ଏବେ ପ୍ରଶ୍ନ ଉଠୁଛି, ମାମଲାକୁ ଭିନ୍ନ ମୋଡ ଦେବାକୁ ଆତ୍ମହତ୍ୟ ଉଦ୍ୟମ କରିଥିଲେ ବିଦ୍ୟାଶ୍ରୀ ? ପରିବାର ଲୋକେ ଆଣିଥିବା ଅଭିଯୋଗ ସତ କି ? କାହିଁକି ସେଦିନ ମାଷ୍ଟରକ୍ୟାଣ୍ଟିନରେ ରହିଥିଲେ ବିଦ୍ୟାଶ୍ରୀ ? ପରିବାରର ଅଭିଯୋଗକୁ କାହିଁକି ଅଣଦେଖା କରୁଛି କ୍ରାଇମବ୍ରାଞ୍ଚ ?
