ଭୁବନେଶ୍ୱର: ରାଜ୍ୟବାସୀଙ୍କ ପାଇଁ ଆଶ୍ୱସ୍ତିକର ଖବର । ଆଉ ECMO ଟ୍ରିଟମେଣ୍ଟ ପାଇଁ ରାଜ୍ୟ ବାହାରକୁ ଏୟାର ଲିଫ୍ଟ କରିବାକୁ ପଡିବନି । ରାଜ୍ୟ ଭିତରେ ହିଁ ECMO ଚିକିତ୍ସା ପାଇପାରିବେ ଲୋକେ । ଖୁବଶୀଘ୍ର ଭୁବନେଶ୍ୱର AIIMSରେ ଲାଗିବ 2 ଟି ECMO ମେସିନ । ଚଳିତମାସ ଶେଷ ସୁଦ୍ଧା ପ୍ରଥମ ECMO ମେସିନ ଲାଗିବ । ପରେ ଅନ୍ୟଟି କାର୍ଯ୍ୟକ୍ଷମ ହେବ ବୋଲି ଆଜି AIIMS ଅଧିକ୍ଷକ ସଚ୍ଚିଦାନନ୍ଦ ମହାନ୍ତି ସୂଚନା ଦେଇଛନ୍ତି ।
ଏହି ମେସିନ ଦ୍ୱାରା ଗୁରୁତର କୋଭିଡ ରୋଗୀ ଏହାସହ ଅନ୍ୟ ଗୁରୁତର ଆଇସିୟୁ ରୋଗୀଙ୍କର ଚିକିତ୍ସା କରାଯାଇପାରିବ । ତେବେ ଇସିଏମଓ କୁ ଅପରେଟ କରିବା ପାଇଁ ଏବେ ସୁଦ୍ଧା ଏମସରେ କିଛି ଅଧ୍ୟାପକ ଅଛନ୍ତି । ଏହାସହ ଇନଷ୍ଟିଚ୍ୟୁଟ ପକ୍ଷରୁ ଆହୁରି ଟେକନିସିଆନଙ୍କୁ ମଧ୍ୟ ନିଯୁକ୍ତି ଦିଆଯାଉଛି । ଏହାଦ୍ୱାରା ରାଜ୍ୟ ବାହାରକୁ ଯାଉଥିବା ରୋଗୀଙ୍କ ପାଇଁ ବେଶ ସହାୟ ହୋଇପାରିବ ।
