ଗତ ଜୁଲାଇ ୧ ତାରିଖରେ କେନ୍ଦ୍ରାପଡା ଜିଲ୍ଲାର ଆଳି ଥାନା ବାଳକାଟି ପଂଚାୟତର ବାଳକାଟି ଗ୍ରାମର ନବକିଶୋର ମଲ୍ଲିକଙ୍କ ଦଳିତ ପରିବାର ଉପରେ, ସେହି ପଂଚାୟତର ଶାସକ ବିଜେଡି ସମର୍ଥିତ ସରପଂଚ ଦିବାକର ନାୟକଙ୍କ ଇଙ୍ଗିତ ଓ ଉପସ୍ଥିତିରେ ତାଙ୍କ ପୁଅ ରଂଜନ ନାୟକ ଏବଂ ତାଙ୍କ ସହଯୋଗୀମାନେ ମାରଣାସ୍ତ୍ରରେ ମରଣାନ୍ତକ ଆକ୍ରମଣ କଲେ । ଏପରିକି ଚିକିତ୍ସା ହେବାକୁ ମେଡିକାଲ ଯିବା ପାଇଁ ଏବଂ ଥାନାରେ ଏତଲା ନଦେବା ପାଇଁ ପୀଡିତ ପରିବାରକୁ ଛାଡିଲେ ନାହିଁ । ସ୍ଥାନୀୟ ଥାନା ଆଇଆଇସି ସଲୀଳ ପ୍ରଧାନଙ୍କୁ ୋନ୍ ଯୋଗେ ସମସ୍ତ ଘଟଣା କହିବା ପରେ ବି ସେ ଘଟଣାସ୍ଥଳକୁ ଆସିଲେ ନାହିଁ କି ପୀଡିତ ପରିବାରକୁ ସୁରକ୍ଷା ଦେଲେ ନାହିଁ । ପୁଲିସ ହୋଇ ସାଧାରଣ ଲୋକଙ୍କୁ ସୁରକ୍ଷା ଦେବା ପରିବର୍ତ୍ତେ ଶାସକ ଦଳ କର୍ମୀଙ୍କୁ ଘଣ୍ଟ ଘୋଡାଇବା ଅତ୍ୟନ୍ତ ଦୁର୍ଭାଗ୍ୟଜନକ ଓ ନିନ୍ଦନୀୟ ଘଟଣା ବୋଲି ବିଜେପି ଅନୁସୂଚୀତ ମୋର୍ଚ୍ଚା ରାଜ୍ୟ ସଭାପତି ବିଭୁ ପ୍ରସାଦ ତରାଇ କହିଛନ୍ତି ।
ଏଭଳି ଏକ ହୃଦୟ ବିଦାରକ ଘଟଣାର ଅନୁଧ୍ୟାନ କରିବା ପାଇଁ ରାଜ୍ୟ ସଭାପତି ସମୀର ମହାନ୍ତିଙ୍କ ନିର୍ଦ୍ଦେଶ କ୍ରମେ ରାଜ୍ୟ ଅନୁସୂଚୀତ ଜାତି ମୋର୍ଚ୍ଚା ସଭାପତି ବିଭୁ ତରାଇଙ୍କ ନେତୃତ୍ୱରେ ସାଧାରଣ ସଂପାଦକ ରାଘବ ମଲ୍ଲିକ, ସଂଯୋଜକ ରବି ବେହେରା ଓ ଶିବ ମଲ୍ଲିକ, ସ୍ଥାନୀୟ ଜିଲ୍ଲା ସଭାପତି କିଶୋର ପଣ୍ଡା, ଉପସଭାପତି କୃଷ୍ଣଚନ୍ଦ୍ର ପଣ୍ଡା ଓ ମୋର୍ଚ୍ଚା ସଭାପତି ସୁଦାମ ମଲ୍ଲିକ ପ୍ରମୁଖ ଘଟଣାସ୍ଥଳରେ ପହଁଚି ଘଟଣାର ସରଜମିନ ତଦନ୍ତ କରିବା ସହ କେନ୍ଦ୍ରାପଡାର ଅତିରିକ୍ତ ଏସପିଙ୍କ ସହ ଆଲୋଚନା କରିଥିଲେ ।
ଏହି ଘଟଣାରେ ସ୍ଥାନୀୟ ପୁଲିସର ନିଷ୍କ୍ରିୟତା, ପୀଡିତ ପରିବାରର ସୁରକ୍ଷା ଓ ଆସାମୀଙ୍କୁ ଗିରଫ କରିବା ପାଇଁ ପ୍ରତିନିଧୀ ଦଳ ଦାବି କରିଥିଲେ ସୁଦ୍ଧା ଏପର୍ଯ୍ୟନ୍ତ ପୁଲିସ ଅପରାଧୀଙ୍କୁ ଗିରଫ କରିପାରିଲା ନାହିଁ । ଘଟଣାକୁ ୧୩ ଦିନ ବିତିଲା ପରେ ବି ଶାସକ ଦଳ ବିଧାୟକ ପ୍ରତାପ ଦେବଙ୍କ ଛତ୍ରଛାୟା ତଳେ ଆସାମୀମାନେ ସୁରକ୍ଷିତ ରହି ପୀଡିତ ପରିବାର ଉପରେ ସାନି ଆକ୍ରମଣ କରିବାର ଧମକ ଦେଉଛନ୍ତି ବୋଲି ଶ୍ରୀ ତରାଇ ଅଭିଯୋଗ କରିଛନ୍ତି ।
ଦଳିତ ପୀଡିତ ପରିବାର ଲୋକଙ୍କୁ ନ୍ୟାୟ ଏବଂ ଏହି ମରଣାନ୍ତକ ଆକ୍ରମଣ ଘଟଣାରେ ସଂପୃକ୍ତ ଅପରାଧୀଙ୍କୁ ଗିର ଓ ଆଳି ଥାନା ଆଇଆଇସିଙ୍କ ବଦଳି ଦାବିରେ କେନ୍ଦ୍ରାପଡା ଏସପି ଅଫିସ ଘେରାଓ କରିବ ବିଜେପି । ୩ ଦିନରେ ଦାବି ପୂରଣ ନହେଲେ ଏହି ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଶ୍ରୀ ତରାଇ ଚେତାବନୀ ଦେଇଛନ୍ତି । ଏହି ସାମ୍ବାଦିକ ସମ୍ମିଳନୀରେ ଅନୁସୂଚିତ ଜାତି ମୋର୍ଚ୍ଚା ପ୍ରଭାରୀ ଦିଲୀପ ମଲ୍ଲିକ, ଅନୁସୂଚିତ ଜାତି ମୋର୍ଚ୍ଚା ସାଧାରଣ ସଂପାଦକ ରାଘବ ମଲ୍ଲିକ ଓ ସଂଯୋଜକ ରବି ବେହେରା ପ୍ରମୁଖ ଉପସ୍ଥିତ ଥିଲେ ।
