ଅର୍ଗସ ବ୍ୟୁରୋ : ଆଜି ନାଟକୀୟ ଘଟଣାକ୍ରମରେ ବାଚସ୍ପତିଙ୍କ ସମେତ ୨ ଜଣ ମନ୍ତ୍ରୀ ଇସ୍ତଫା ଦେଇଛନ୍ତି। ଯାହା ସ୍ପଷ୍ଟ କରିଛି ଆଗାମୀ ଦିନରେ ମନ୍ତ୍ରୀ ମଣ୍ଡଳର ଗୋଟିଏ ବଡ଼ ପରିବର୍ତ୍ତନ ହେବ। ପୁରୀ ଜିଲ୍ଲା ନିମାପଡା ନିର୍ବାଚନମଣ୍ଡଳୀରୁ ୩ ଥର ବିଧାୟକ ଥିବା ମନ୍ତ୍ରୀ ସମୀର ଦାସ ଗୋଟାଏ ବଡ଼ ନାଁ। ସ୍କୁଲ ଓ ଗଣଶିକ୍ଷା ବିଭାଗ ତାଙ୍କ ହାତରେ ଥିଲା। କିନ୍ତୁ ଏବେ ସେ ଇସ୍ତଫା ଦେଇ ଦଳର ସାଙ୍ଗଠନିକ କାର୍ଯ୍ୟରେ ମନ ଦେବେ ବୋଲି କହିଛନ୍ତି। ତେଣୁ ତାଙ୍କ ସ୍ଥାନରେ କାହାକୁ ମନ୍ତ୍ରୀ କରାଯିବ ବୋଲି ଚର୍ଚ୍ଚା ଉଠିଛି। ପୁରୀ ଜିଲାରୁ ସେ ମନ୍ତ୍ରୀ ହୋଇଥିବାରୁ ଏଠାରୁ ଯୁବ ବିଧାୟକ ଥିବା ପିପିଲି ଏମଏଲଏ ରୁଦ୍ର ମହାରଥୀଙ୍କୁ ମନ୍ତ୍ରୀପଦ ମିଳିପାରେ ବୋଲି ଚର୍ଚ୍ଚା ହେଉଛି। ବାପା ପ୍ରଦୀପ ମହାରଥିଙ୍କ ମୃତ୍ୟୁ ପରେ ରୁଦ୍ର ପିପିଲିବାସୀଙ୍କ ହୃଦୟ ଜିତିଥିଲେ।
ସମ୍ଭବ୍ୟ ମନ୍ତ୍ରୀପଦ ତାଲିକାରେ ଆଉ ଜଣେ ବିଧାୟକଙ୍କ ନାଁ ବି ଚର୍ଚ୍ଚାକୁ ଆସୁଛି। ସେ ହେଉଛନ୍ତି ପଦ୍ମପୁର ବିଧାୟିକା ବର୍ଷା ବରିହା। ପିତା ବିଜୟ ରଞ୍ଜନ ସିଂହ ବରିହାଙ୍କ ମୃତ୍ୟୁ ପରେ ମୁଖ୍ୟମନ୍ତ୍ରୀ ବର୍ଷାଙ୍କ ପ୍ରାର୍ଥୀତ୍ବକୁ ମୋହର ମାରିଥିଲେ। ବର୍ଷା ବାଙ୍ଗାଲୋରରେ ଆଇନରେ ସ୍ନାତକ ଡିଗ୍ରୀ ହାସଲ କରିଥିଲେ। ତାଙ୍କ ଶିକ୍ଷାଗତ ଯୋଗ୍ୟତା ଆଧାରରେ ସେ ନିର୍ବାଚନରେ ବିଜୟୀ ହୋଇ ପଦ୍ମପୁର ଆସନକୁ ବିଜେଡି ହାତରୁ ଯିବାକୁ ଦେଇ ନ ଥିଲେ। ଏଣୁ ଦଳ ତାଙ୍କୁ ମନ୍ତ୍ରୀପଦ ଦେଇପାରେ ବୋଲି ଚର୍ଚ୍ଚା ହେଉଛି।
