ଖୋର୍ଦ୍ଧା: ମାଛ ପାଇଁ କାଳ ସାଜିଛି ଜିରୋ ନେଟ୍। ବେଆଇନ ଘେରୀ ଯୋଗୁଁ ମାଛ ବଂଶ ବିସ୍ତାର ହ୍ରାସ ପାଇଛି। ସବୁ ଜାଣି ଚୁପ ବସିଛି ଜିଲ୍ଲା ପ୍ରଶାସନ। ରାଜ୍ୟର ସର୍ବବୃହତ ହ୍ରଦ ଚିଲିକା ଏବେ ମାଛଙ୍କ ପାଇଁ କାଳ ପାଲଟିଛି। ମାଫିଆମାନେ ବେଆଇନ ଘେରି କରି ମାଛଚାଷ କରୁଛନ୍ତି। ଯାହା ଫଳରେ ମାଛର ବଂଶ ବିସ୍ତାରରେ ଏହା ବାଧକ ସାଜିଛି। ଏପରିକି ପଟୁମାଟି ଦ୍ୱାରା ଚିଲିକା ପୋତି ହେବାରେ ଲାଗିଛି। ୧୦୯୫ ବର୍ଗ କିଲୋମିଟର ହ୍ରଦରେ ୨୨୫ରୁ ଉର୍ଦ୍ଧ ପ୍ରଜାତିର ମାଛ ରହିଥାନ୍ତି । କିନ୍ତୁ ଅବୈଧ ମାଛ ଧରା ଯୋଗୁଁ ଜୈବ ବିବିଧତା ନଷ୍ଟ ହେଉଛି।
ଚିଲିକା ଉନ୍ନୟନ ପକ୍ଷରୁ ଅନେକ ଥର ବେଆଇନ ଜିରୋନେଟ୍ ଉଚ୍ଛେଦ କରାଯାଉଛି। କିନ୍ତୁ ଏହାପରେ ବି ବେଆଇନ ଭାବେ ଘେରି କରାଯାଉଛି। ଚିଲିକାକୁ ସଂଯୋଗ କରୁଥିବା ପାଲୁରୁ ମୁହାଣ ଓ ସାତପଡା ମୁହାଣରେ ମତ୍ସ୍ୟଜୀବି ମାନେ ଜିରୋନେଟ୍ ପକାଉଛନ୍ତି। ଫଳରେ ମାଛମାନେ ମୃତ୍ୟୁବରଣ କରୁଛନ୍ତି। ଚିଲିକାରେ ଅବୈଧ ଭାବରେ ଜିରୋନେଟ୍ ଦ୍ଵାରା ମାଛଧରା ଚାଲିଛି। ଫଳରେ ଚିଲିକାରେ ମାଛ ସଂଖ୍ୟା କମୁଛି। ଯାହାଦ୍ୱାରା ଅନେକ ମତ୍ସ୍ୟଜୀବୀ ଜୀବିକା ହରାଇବାର ଆଶଙ୍କା ଦେଖାଦେଇଛି।
