କରୋନା କଟକଣା ଭିତରେ ଆସନ୍ତାକାଲି ପାଳନ ହେବ ଦୀପାବଳି ପର୍ବ। ଏଥର ଫୁଟିବନି ବାଣ । ଏଥର ବାଣ ଦୋକାନ ଖୋଲାଯିବାକୁ ଅନୁମତି ଦିଆଯାଇ ନଥିବା ବେଳେ ଦୀପ ଓ ଲିଚୁ ଲାଇଟ୍ କିଣି ନେଉଛନ୍ତି ଲୋକେ। ସେହିପରି ଦୀପାବଳି ଅମାବାସ୍ୟାରୁ ଆରମ୍ଭ ହେଉଛି କାଳୀପୂଜା । ଭଦ୍ରକ ଜିଲ୍ଲା ଚାନ୍ଦବାଲି ପ୍ରସିଦ୍ଧ ଦକ୍ଷିଣେଶ୍ୱର କାଳୀଙ୍କ ପୂଜା ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଏହାସହ ଭଗବାନ କୃଷ୍ଣଙ୍କ ମଧ୍ୟ ଏହିଦିନ ପୂଜା କରାଯାଇଥାଏ । କରୋନା କଟକଣା ପାଇଁ ମେଲଣ ଓ ସାଂସ୍କୃତିକ କାର୍ଯ୍ୟକ୍ରମରେ ରୋକ ଲାଗିଛି। କେବଳ ପରମ୍ପରା ରକ୍ଷା ପାଇଁ ପୂଜା କରାଯିବ । ତେବେ ସୁରକ୍ଷା ଦୃଷ୍ଟିରୁ ମନ୍ଦିର ପରିଚାଳନା କମିଟିମାନଙ୍କ ପକ୍ଷରୁ ପୂଜା ମଣ୍ଡପ ନିକଟରେ ସ୍ୱତନ୍ତ୍ର ବ୍ୟାରିକେଡ ପ୍ରସ୍ତୁତି କରାଯାଇଛି ଏବଂ ମାସ୍କ ପରିଧାନ ଉପରେ ଗୁରୁତ୍ୱ ଦିଆଯାଇଛି ।
ସେହିପରି କାଳୀପୂଜା ପାଇଁ ଯାଜପୁର ଜିଲ୍ଲା ମଧ୍ୟ ଖୁବ ପ୍ରସିଦ୍ଧ । ହେଲେ ଚଳିତ ଥର କୋଭିଡ ପାଇଁ ସବୁ ମନା । ନା ଆଗଭଳି ଅଛି ସୁନ୍ଦର ଆଲୋକମାଳା ନା ତୋରଣ। ଚଳିତ ବର୍ଷ ସଂପୂର୍ଣ୍ଣ ନିରାଡମ୍ବରରେ ପୂଜା ପାଇବେ ମାଆ କାଳୀ ଓ ଲକ୍ଷ୍ମୀ ନାରାୟଣ । ମାଙ୍କ ମୃଣ୍ମୟୀ ମୂର୍ତ୍ତିକୁ 4 ଫୁଟ ଭିତରେ କରିବାକୁ ନିର୍ଦ୍ଦେଶ ଦିଆଯାଇଛି । କୌଣସି ପ୍ରକାର ସାଜସଜା କିମ୍ବା ସାଂସ୍କୃତିକ କାର୍ଯ୍ୟକ୍ରମ ନକରିବାକୁ ପରାମର୍ଶ ଦିଆଯାଇଛି । ସହରରେ ଏଥର 48ଟି ମେଢ଼ ପୂଜା ପାଇବେ । ପ୍ରତ୍ୟେକ ପୂଜା କମିଟି ସଦସ୍ୟଙ୍କୁ ମାସ୍କ ଓ ସାନିଟାଇଜର ବ୍ୟବହାର କରିବାକୁ ପରାମର୍ଶ ଦିଆଯାଇଛି । ଗୋଟିଏ ଦିନରେ ଭସାଣ ଉତ୍ସବ କରିବାକୁ ନିଷ୍ପତ୍ତି ହୋଇଛି। କାଳୀପୂଜା ଆସନ୍ତାକାଲିଠୁ ଆରମ୍ଭ ହେଉଥିବାବେଳେ ଭସାଣ ଉତ୍ସବ 18 ତାରିଖରେ ଅନୁଷ୍ଠିତ ହେବା ସହ ନିରାଡମ୍ବରେ ପୂଜା ପାଳନ ହେବ।
