dj-azex-death-mistry

ନୟାଗଡ଼: ନୟାଗଡ଼ରୁ ଛତିଶଗଡ଼ ବେଧଡ଼କ ବାଲି ଚୋରା ଚାଲାଣ । ମାଲେମାଲ ହେଉଛନ୍ତି ମାଫିଆ, ଏପଟେ କିନ୍ତୁ ବାରମ୍ବାର ଅଭିଯୋଗ ପରେ ବି ହାତ ବାନ୍ଧି ବସିଛି ଜିଲ୍ଲା ପ୍ରଶାସନ। ସୀମାନ୍ତରେ ଥିବା ଯୋଙ୍କ ନଦୀର ଭୁଶୁଡ଼ି ଗାଁ ନିକଟ ଘାଟରୁ ଖୋଲାଖୋଲି ବାଲି ଲୁଟ କରି ଛତିଶଗଡ଼ ଚାଲାଣ କରୁଛନ୍ତି ମାଫିଆ । ଅର୍ଗସ ନ୍ୟୁଜ କ୍ୟାମେରାରେ କଏଦ ହୋଇଛି ବାଲି ଲୁଟର ଦୃଶ୍ୟ । ପ୍ରତି ଟ୍ରିପ ପ୍ରତି  ଗାଁଲୋକଙ୍କୁ ମାତ୍ର ଶହେ ଟଙ୍କା ଦେଇ ଘାଟରୁ ବାଲି ଉଠାଉଥିବା ସ୍ବୀକାର କରିଛନ୍ତି ମାଫିଆ । ଏପଟେ ଚୋରା ଚାଲାଣ ଉପରେ ଲଗାମ ଲଗାଇବା ସହ ତୁରନ୍ତ ଟେଣ୍ଡର ପ୍ରକ୍ରିୟାରେ ସାମିଲ କରିବାକୁ ଜିଲ୍ଲା ପ୍ରଶାସନ ନିକଟରେ ଦାବି କରିଛନ୍ତି ସରପଞ୍ଚ। ନୂଆପଡ଼ା ତହସିଲ ଅଧୀନ ୯ଟି ବାଲି ଖାଦାନରୁ ଟେଣ୍ତର ହୋଇ ବାଲି ଉଠାଣ ହେଉଛି। ସେହିପରି ଦୁଇଟି ହଲଦୀ ବାଲି ଖାଦାନ, କୁରୁମୁଣ୍ତା, ଭୁଷୁଡ଼ି, ସାରାବଙ୍ଗ, ପରସାଭଦର ଭଳି ବାଲି ଖାଦାନ ଟେଣ୍ତର ହୋଇଥିଲେ ବି ଆବଶ୍ୟକ କାଗଜାତ ଅଭାବରୁ ବାଲି ଉଠାଣ ପାଇଁ ରାଜସ୍ବ ବିଭାଗ ଅନୁମତି ଦେଇନାହାନ୍ତି। ଏହି ସବୁ ଖାଦାନରୁ ବେଆଇନ ଭାବେ ବାଲି ଉଠାଣ କରି ବିକ୍ରି କରାଯାଉଥିବା ଅଭିଯୋଗ ହେଉଛି । ଲୋକେ ଟାସ୍କ ଫୋର୍ସ ଗଠନର ବାହାନା କରି ମାଫିଆଙ୍କ ପାଇଁ ଜିଲ୍ଲା ପ୍ରଶାସନ ଗଳାବାଟ କରିଥିବା ଅଭିଯୋଗ କରିଛନ୍ତି ଲୋକେ । ଓଡ଼ିଶାରୁ ଲଘୁ ଖଣିଜ ଲୁଟ ଉପରେ କେବେ ଲାଗିବ ଲଗାମ । ପ୍ରଶାସନ ବାଲି ଲୁଟ ଉପରେ ରାକ ଲଗାଇବାକୁ ସ୍ଥାନୀୟ ବାସିନ୍ଦାଙ୍କ ଦାବି ଜୋର ଧରିଛି ।  ଅଧିକ ପଢନ୍ତୁ ଓଡ଼ିଶା ଖବର

ଭୁବନେଶ୍ୱର: ବିଶୃଙ୍ଖଳାର ବାରୁଦ ଗଦାରେ ବସିଛି ବିଜେଡି । ଯେ କୌଣସି ମୁହୂର୍ତ୍ତରେ ହୋଇପାରେ ବଡ଼ ଧରଣର ବିସ୍ଫୋରଣ । ଖଣ୍ଡ ଖଣ୍ଡ ହୋଇଯାଇପାରେ ବିଜେଡି । କ୍ରମାଗତ ଷଷ୍ଠ ଥର ଲାଗି ସରକାର ଗଠନର ସ୍ବପ୍ନ ହୋଇପାରେ ଧୂଳିସାତ୍ । କାରଣ ଗୃହ ଯୁଦ୍ଧରେ ଉଠୁଛି ପଡୁଛି ଶଙ୍ଖ ଶିବିର । ନେତା ନେତାଙ୍କ ଭିତରେ ଭୀଷଣ ଲଢେଇ । ସମାଧାନ ବଦଳରେ ମଜା ନେଉଛନ୍ତି ମଙ୍ଗୁଆଳ । ଗୋଟେ ପଟେ ବିଜେଡି ଆଗୁଆ ନିର୍ବାଚନ ପାଇଁ ପ୍ରସ୍ତୁତି ଚଳାଇଥିବା ବେଳେ ଦଳ ପାଇଁ ମୁଣ୍ଡବିନ୍ଧା ବଢାଇଛି ଅସଜଡା ସଙ୍ଗଠନ । ବାଲେଶ୍ବର ଜିଲ୍ଲାର ସ୍ଥିତି ପୁଣି ଥରେ ବିଜେଡିରେ ଅଲ ଇଜ୍ ନଟ ଓ୍ବେଲ୍ ପ୍ରସଙ୍ଗକୁ ସାମ୍ନାକୁ ଆଣି ଦେଇଛି । ଜିଲ୍ଲାର ବରିଷ୍ଠ ନେତା ରବୀନ୍ଦ୍ର ଜେନା ଜିଲ୍ଲା ସଭାପତି ପଦରୁ ଇସ୍ତଫା ଦେଇଥିବା ଚର୍ଚ୍ଚା ଦଳୀୟ ସଙ୍ଗଠନର ତୁ ତୁ ମେଁ ମେଁ କୁ ପଦାକୁ ଆଣି ଦେଇଛି । ଜିଲ୍ଲାରେ ରବୀନ୍ଦ୍ର ଜେନା, ଜ୍ୟୋତି ପାଣିଗ୍ରାହୀ, ଅଶ୍ବିନୀ ପାତ୍ର ଓ ସ୍ବରୂପ ଦାସଙ୍କ ମଧ୍ୟରେ ତିକ୍ତତା ଉଗ୍ର ରୂପ ଧାରଣ କରିଛି ବୋଲି ଚର୍ଚ୍ଚା ହେଉଛି । ଏପରିକି ଖୋଦ୍ ଜିଲ୍ଲାର ପର୍ଯ୍ୟବେକ୍ଷକ ବି ଏହାକୁ ସ୍ବୀକାର କରି କହିଛନ୍ତି ଗଣତନ୍ତ୍ରରେ ସବୁବେଳେ ମତ ଦୁଇ ମତ ରହିଥାଏ । କେବଳ ପଶ୍ଚିମ ଓଡିଶା କି ଉତ୍ତର ଓଡିଶା ନୁହେଁ ବରଂ ଦକ୍ଷିଣ ଓ ଉପକୂଳରେ ବି ସମାନ ସ୍ଥିତି ।  ସେପଟେ ଗତ କିଛି ଦିନ ତଳେ ମନ୍ତ୍ରିମଣ୍ଡଳ ଅଦଳ ବଦଳ ବେଳେ ପଶ୍ଚିମ ଓଡିଶା ବିଜେଡି ଶିବିରରେ ଅସନ୍ତୋଷର ଅଗ୍ନି ଜଳିଥିଲା । ସୁଶାନ୍ତ ସିଂ ଙ୍କୁ ମନ୍ତ୍ରୀ ପଦ ନ ମିଳିବାରୁ ନିଆଁବାଣ ହୋଇଥିଲେ ତାଙ୍କ ସମଥର୍କ । ଆଉ ଖୋଦ୍ ସୁଶାନ୍ତ ସିଂ ବି ଶପଥ ଗ୍ରହଣ ସମାରୋହକୁ ନ ଆସିବା ଅସନ୍ତୋଷକୁ ନେଇ ଦେଇଥିଲା ବଡ ସଙ୍କେତ । ତେବେ ଦଳର ମଙ୍ଗୁଆଳ ସୁଶାନ୍ତ ଙ୍କୁ ଡାକି ଯେନ ତେନ ପ୍ରକାର ମାମଲା କୁ ଚାପି ଦେଇଥିଲେ ବି ଏବେ ବି ସେଠି ନିଆଁ କୁହୁଳିବାରେ ଲାଗିଛି ।  ସେପଟେ ଦକ୍ଷିଣ ଓଡିଶାରେ ବି ସମାନ ସ୍ଥିତି । ପଞ୍ଚାୟତ ଓ ପୌର ନିର୍ବାଚନରେ ଦଳକୁ ଆଶାତୀତ ଫଳ ମିଳି ନଥିବା ବେଳେ ଗୋଷ୍ଠୀ କନ୍ଦଳ ପଦାରେ ପଡିଥିଲା । ଏପରିକି ଗଞ୍ଜାମ ଛତ୍ରପୁରରେ ବିଧାୟକ ସୁବାସ ବେହେରା ଓ ପୂର୍ବତନ ବିଧାୟକ ପ୍ରିୟାଂଶୁ ପ୍ରଧାନଙ୍କ ସମର୍ଥକଙ୍କ ମଧ୍ୟରେ ହାତାହାତି ପରିସ୍ଥିତି ସୃଷ୍ଟି ହୋଇଥିଲା । ଅନ୍ୟ ବିଧାନସଭା ଆସନ ଯେମିତି କି ଖଲ୍ଲିକୋଟ, ଗୋପାଳପୁର, ଦିଗପହଣ୍ଡି, କବିସୂର୍ଯ୍ୟନଗର, ସାନଖେମୁଣ୍ଡିରେ ବିଦ୍ରୋହ ମୁଣ୍ଡ ଟେକିଛି । ଏପରିକି ସଙ୍ଗଠନରେ ଫାଟ ପ୍ରସଙ୍ଗକୁ ସ୍ବୀକାର ବି କରିଛନ୍ତି ଜିଲ୍ଲା ସଭାପତି । କଥା ଏତିକିରେ ସରିନି  । କଟକଠୁ ନେଇ କୋରାପୁଟ, ମୟୁରଭଞ୍ଜଠୁ ନେଇ ସମ୍ବଲପୁର ସବୁଠି ଦାନା ବାନ୍ଧୁଥିବା ଅସନ୍ତୋଷ 26 ବର୍ଷର ଦଳକୁ ଦୋହଲାଇ ଦେବ ବୋଲି ଚର୍ଚ୍ଚା ହେଉଛି ।  ଅଧିକ ପଢନ୍ତୁ ଓଡ଼ିଶା ଖବର 

ଭୁବନେଶ୍ୱର:  ରାଜ୍ୟରେ ସ୍ବାସ୍ଥ୍ୟ କ୍ଷେତ୍ରରେ ଭଲ ଖବର । ଏବେ ରାଜ୍ୟରେ ରହିବନି ଡାକ୍ତର ଅଭାବ । ଓଡ଼ିଶାରେ ଆଉ ଏକ ମେଡିକାଲ କଲେଜକୁ ଅନୁମତି ମିଳିଛି । କଟକ ଟାଙ୍ଗିରେ ହେବ ନୂଆ ମେଡିକାଲ କଲେଜ । ଡ୍ରିମସ ଇନଷ୍ଟିଚ୍ୟୁଟ ଅଫ ହେଲ୍ଥ ସାଇନ୍ସକୁ ଅନୁମତି ଦେଇଛି NMC । 100 ସିଟ ବିଶିଷ୍ଟ ମେଡିକାଲ କଲେଜ ନେଇ ଅନୁମତି ମିଳିଛି । ତେବେ କଟକରେ SCB ପରେ ଏହା ହେବ ଦ୍ବିତୀୟ ମେଡିକାଲ କଲେଜ । ରାଜ୍ୟ ସରକାରଙ୍କ ପକ୍ଷରୁ ଏନେଇ ଆବେଦନ କରାଯାଇଥିବା ବେଳେ ଏନେଇ ତୁରନ୍ତ ପଦକ୍ଷେପ ନିଆଯିବା ସହ ମେଡିକାଲ କଲେଜକୁ ଅନୁମତି ଦିଆଯାଇଛି । ଓଡ଼ିଶାରେ ଏବେ ବି ୫୦ ପ୍ରତିଶତ ଡାକ୍ତର ଓ ପାରା ମେଡିକାଲ, ନର୍ସ ପଦବୀ ଖାଲି ରହିଛି । ତେବେ ଆଉ ଏକ ମେଡିକାଲ କଲେଜକୁ ଅନୁମତି ମିଳିବା ପରେ ଏଠାରୁ ଯେଉଁ ଡାକ୍ତର ବାହାରିବେ ସେମାନଙ୍କୁ ରାଜ୍ୟର ବିଭିନ୍ନ ସ୍ଥାନରେ ନିଯୁକ୍ତି ମିଳି ପାରିବ ।  ଅଧିକ ପଢନ୍ତୁ ଓଡ଼ିଶା ଖବର