କଟକ : ନକଲି ଖାଦ୍ୟ ସାମଗ୍ରୀ ନିର୍ମାଣର ପେଣ୍ଠସ୍ଥଳୀ ପାଲଟିଛି କଟକ ! ଦୁଇ ଦିନରେ ଜବତ ହେଲାଣି 50 କ୍ୱିଣ୍ଟାଲରୁ ଅଧିକ ଅପମିଶ୍ରିତ ହଲଦୀ ଓ ଲଙ୍କା ଗୁଣ୍ଡା ! ରାଜ୍ୟର ସବୁଠାରୁ ବଡ ମାର୍କେଟ ଅଞ୍ଚଳ କଟକ ମାଲଗୋଦାମରୁ ଜବତ ହେଉଛି ଅପମିଶ୍ରିତ ସାମଗ୍ରୀ । କଟକ ମାଲଗୋଦାମ ଅଞ୍ଚଳରେ ଚାଲୁଥିବା ନକଲି ମସଲା କାରଖାନାରେ ତିଆରି ହେଉଛି କେମିକାଲ ମିଶା ହଳଦୀ । ତା ସହିତ ରହିଛି ଲଙ୍କା ଗୁଣ୍ଡ । ସାରା ରାଜ୍ୟକୁ ଖାଦ୍ୟ ସାମଗ୍ରୀ ଯୋଗାଉଥିବା କେନ୍ଦ୍ର ମାଲଗୋଦାମରେ ଗତ ଦୁଇ ଦିନ ହେବ ଜବତ ହୋଇଛି ବିପୁଳ ପରିମାଣରେ ଅପମିଶ୍ରିତ ହଳଦୀ ଓ ଲଙ୍କା ଗୁଣ୍ଡା । ଏବେ ଯାଏଁ ପୋଲିସ ୪ଟି ନକଲି କାରଖାନା ଠାବ କରିସାରିଲେଣି । ଜବତ ହେଲାଣି 50 କୁଇଣ୍ଟାଲରୁ ଅଧିକ ଅପମିଶ୍ରିତ ହଳଦୀ ଓ ଲଙ୍କା ଗୁଣ୍ଡା । ଆଜି ମଧ୍ୟ ଏସ ସି ପି ଜୋନ ୧ଙ୍କ ନେତୃତ୍ୱରେ ଏକ ଟିମ ମାଲଗୋଦାମରେ ଥିବା ଅନ୍ୟାନ ଦୋକାନ ଉପରେ ଯାଞ୍ଚ କରିଛନ୍ତି । ତେବେ ମାଲଗୋଦାମକୁ କେଉଁଠାରୁ ଏବଂ ଏଠାରୁ କେଉଁଆଡେ ଏହି ଅପମିଶ୍ରିତ ସାମଗ୍ରୀ ଯାଉଥିଲା ତାର ତଦନ୍ତ କରୁଛି ପୋଲିସ ।
ମାଲଗୋଦାମରେ ଏଭଳି ଅପମିଶ୍ରିତ ସାମଗ୍ରୀ ନିର୍ମାଣ ଏବଂ ବିକ୍ରି ଘଟଣା ପଦାକୁ ଆସିବା ପରେ ଅନ୍ୟ ବ୍ୟବସାୟୀ ଏହାକୁ ଗ୍ରହଣ କରି ପାରୁନାହାନ୍ତି । ଏବଂ ଏହି ଘଟଣା ମର୍ମାହାତ କରିଥିବା କହିଛନ୍ତି କଟକ ଚାମ୍ବର ଅଫ କମର୍ସ ସମ୍ପାଦକ । ଏହିଭଳି ଘଟଣାର ପୁନରାବୃର୍ତ୍ତି କିପରି ନହେବ ସେଥିପାଇଁ ମାଲଗୋଦାମର ବ୍ୟବସାୟୀଙ୍କ ବୈଠକ ବସିଥିଲା । ଆଗକୁ ଏଭଳି ବ୍ୟବସାୟ ଓ ବ୍ୟବସାୟୀଙ୍କୁ ପ୍ରଶୟ ଦିଆଯିବ ନାହିଁ । ଯଦି କୌଣସି ବ୍ୟବସାୟୀ ଅପମିଶ୍ରଣ କାରବାରରେ ଜଡିତ ରହିଲେ ମାଲଗୋଦାମରେ ବ୍ୟବସାୟୀ ପାଇଁ ସୁଯୋଗ ଦିଆଯିବ ନାହିଁ ବୋଲି କହିଛନ୍ତି ସଂଘର ସଂପାଦକ ।
ମାଲଗୋଦାମ ଅଂଚଳରେ ଏତେ ପରିମାଣର ନକଲି ସାମଗ୍ରୀ ଜବତ ହେବା ଏବେ ସାଧାରଣ ଖାଉଠି ପାଇଁ ଚିନ୍ତା ବଢ଼ାଇଛି । ସେପଟେ ଏଥିରେ ପୋଲିସକୁ ସମସ୍ତ ପ୍ରକାର ସହଯୋଗ କରିବ ବୋଲି କହିଛି କଟକ ଚାମ୍ବର୍ ଅଫ କମର୍ସ ।
