କେନ୍ଦ୍ରାପଡା ରାଜନଗର ବ୍ଳକରେ ଥିବା ବିଶ୍ୱପ୍ରସିଦ୍ଧ ଜାତୀୟ ଉଦ୍ୟାନ ଭିତରକନିକା ଅଭୟାରଣ୍ୟର ଚାରିକଡେ ଲାଗିରହିଥିବା ତାରଜାଲି ଅନେକ ସ୍ଥାନରେ ଛିଣ୍ଡିଗଲାଣି । ଫଳରେ ଅଭୟାରଣ୍ୟରୁ ହରିଣ, ବାରହା ପରେ ବନ୍ୟଜନ୍ତୁ ବାହାରେ ବୁଲୁଛନ୍ତି । ଆଉ ଫାସ ବସାଇ ଏହାର ଫାଇଦା ଉଠାଉଛନ୍ତି ମାଫିଆ । କେବଳ ଏତିକି ନୁହେଁ,ଏହାର ପଛରେ ଥିବା ଚିଙ୍ଗୁଡି ଘେରିରେ ବିଷାକ୍ତ କେମିକାଲ ମିଶାଇ ଜଳ ପ୍ରଦୂଷିତ କରୁଛନ୍ତି ମାଫିଆ । ବନବିଭାଗ ଓ ମାଫିଆଙ୍କ ମିଲିଭଗତରେ ଏଭଳି କାରବାର ଚାଲିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଅଭୟାରଣ୍ୟର ସୁରକ୍ଷା ପାଇଁ କୋଟି କୋଟି ଟଙ୍କା ଅନୁଦାନ ଆସୁଛି । ମାତ୍ର କାହିଁକି ହେଉନି ପୁନରୁଦ୍ଧାର? ଏପରିକି ଅନେକ ସମୟରେ ଜଙ୍ଗଲ ଓ ବନ୍ୟ ଜନ୍ତୁଙ୍କ ସୁରକ୍ଷା ପାଇଁ ସୁରକ୍ଷାଭିତ୍ତିକ କାର୍ଯ୍ୟକ୍ରମ ଅନୁଷ୍ଠିତ ହେଉଛି । ମାତ୍ର ଭିତରକନିକା କାହିଁକି ବନ୍ୟଜନ୍ତୁଙ୍କ ପାଇଁ ଅସୁରକ୍ଷିତ ହୋଇପଡିଛି ତାହା ଏବେ ପ୍ରଶ୍ନଚିହ୍ନ ସୃଷ୍ଟି କରିଛି । ଅନ୍ୟପଟେ ଏନେଇ କୌଣସି ମତାମତ ଦେବାକୁ ମନା କରି ଦେଇଛନ୍ତି ବନଖଣ୍ଡ ଅଧିକାରୀ ।
ରକ୍ଷଣାବେକ୍ଷଣ ଅଭାବରୁ ଏହା ମାଫିଆଙ୍କ ଚରାଭୂଇଁ ପାଲଟିଛି ଏବଂ ଅଭୟାରଣ୍ୟର ଦୁର୍ଲଭ ଜନ୍ତୁ ଅବାଧରେ ଶିକାର କରି ନିଜର ସାମ୍ରାଜ୍ୟ ବିସ୍ତାର କରୁଛନ୍ତି ଶିକାରୀ । ଏଭଳି ଶିକାର ଜାରି ରହିଲେ ଅନେକ ଜୀବଜନ୍ତୁ ବିଲୁପ୍ତ ହୋଇଯିବାର ଆଶଙ୍କା ଦେଖାଦେଇଛି ।
