ରାୟଗଡାରେ ଜମୁଛି ନିର୍ବାଚନୀ ପ୍ରଚାର: ଝୋଡ଼ିଆ ସମ୍ପ୍ରଦାୟ ହେବେ ନିର୍ଣ୍ଣାୟକ ଭୋଟର !

ରାୟଗଡ଼ା: ରାଜ୍ୟ ରାଜନୀତିରେ ଗୁରୁତ୍ୱ ବହନ କରିଆସିଛି ରାୟଗଡ଼ା ଜିଲ୍ଲା । ଗତ ଦିନରେ ଏଠାରୁ ପ୍ରତିନିଧିତ୍ୱ କରି ଗିରିଧର ଗମାଙ୍ଗ କେନ୍ଦ୍ରମନ୍ତ୍ରୀଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀଙ୍କ ପର୍ଯ୍ୟନ୍ତ ପହଞ୍ଚି ପାରିଥିବା ବେଳେ ରାମଚନ୍ଦ୍ର ଉଲ୍ଲାକା କ୍ୟାବିନେଟ ମନ୍ତ୍ରୀ ଠାରୁ ଆରମ୍ଭ କରି ବିରୋଧିଦଳ ନେତା ପର୍ଯ୍ୟନ୍ତ ଓ ବର୍ତମାନର ବିଧାୟକ ଲାଲବିହାରି ହିମିରିକା ମଧ୍ୟ କେବିନେଟ ମନ୍ତ୍ରୀ ଭଳି ଗୁରୁତ୍ୱପୁର୍ଣ୍ଣ ଦାୟୀତ୍ୱ ବହନ କରିଆସିଛନ୍ତି । ସେଥିପାଇଁ ରାଜ୍ୟ ରାଜନୀତିରେ ରାୟଗଡ଼ା ବିଧାନସଭା ଆସନର ରହିଛି ବିଶେଷ ଗୁରୁତ୍ୱ।

କାଶିପୁର ବ୍ଲକ , ରାୟଗଡ଼ା ବ୍ଲକ ଏବଂ ରାୟଗଡ଼ା ପୈାରାଞ୍ଚଳକୁ ନେଇ ଗଠିତ ରାୟଗଡ଼ା ନର୍ବାଚନ ମଣ୍ଡଳି । ଏହି ନିର୍ବାଚନ ମଣ୍ଡଳିରେ ମୋଟ ଭୋଟରଙ୍କ ସଂଖ୍ୟା ୨୩,୩,୫୪୭ । ସେଥିମଧ୍ୟରୁ ୧,୧୦,୮୦୮ ପୁରୁଷ ଭୋଟର ଥିବା ବେଳେ ୧୨,୨,୬୩୦ ଜଣ ମହିଳା ଭୋଟର ଅଛନ୍ତି । ଚଳିତ ବର୍ଷ ପ୍ରଥମ ଥର ପାଇଁ ତୃତୀୟ ଲିଙ୍ଗ ମତ ଦାନର ସ୍ୱିକୃତି ମିଳିଥିବାରୁ ଏମାନଙ୍କ ସଂଖ୍ୟା ୧୦୯ ରହିଛି । କଂଗ୍ରେସର ଗଡ଼ କୁହାଯାଉଥିବା ରାୟଗଡ଼ା ବିଧାନସଭା ସ୍ୱର୍ଗତ ରାମଚନ୍ଦ୍ର ଉଲାକାଙ୍କ କବଜାରେ ଥିଲା ଏହି ଆସନଟି । ସେ ଏହି ଆସନରୁ ୭ ଥର ବିଜୟୀ ହେବାରେ ସକ୍ଷମ ହୋଇଥିଲେ । ତେବେ ୨୦୦୦ ମସିହାରୁ ୨୦୦୪ ପର୍ଯ୍ୟନ୍ତ ବିଜେଡ଼ି ହାତକୁ ରାୟଗଡ଼ା ବିଧାନସଭା ଆସନଟି ଯାଇ ଥିବାବେଳେ ପୁଣି ୨୦୦୯ ନିର୍ବାଚନ ପରଠାରୁ ବିଜେଡ଼ି ଟିକଟରେ ବିଜୟ ହୋଇଛି ଲାଲବିହାରି ହିମିରିକା  । ବିଭିନ୍ନ ପଦବିରେ ଅବସ୍ଥାପିତ ହୋଇଛନ୍ତି । ଚଳିତ ନିର୍ବାଚନରେ ରାୟଗଡ଼ା ବିଧାନସଭା ଆସନରେ ତିନି ପ୍ରମୁଖ ଦଳ ବିଜେଡ଼ି ,କଂଗ୍ରେସ ଏବଂ ବିଜେପି ପାଇଁ ଏବେ ମଜାଦାର ଆସନ ହୋଇଥିଲେ ମଧ୍ୟ ସ୍ୱାଧିନ ପ୍ରାର୍ଥୀ ନିର୍ଣ୍ଣୟକ ଭୁମିକା ଗ୍ରହଣ କରିବେ ।

ବିଜେଡ଼ିର ବର୍ତ୍ତମାନର ରାୟଗଡ଼ା ବିଧାୟକ ଲାଲବିହାରି ହିମିରିକାଙ୍କୁ ପୁଣି ଥରେ ଦଳୀୟ ଟିକଟ ମିଳିଛି । ସେପଟେ କଂଗ୍ରେସ ଏଥର ଜିଲ୍ଲା ଆଦିବାସୀ ମହାସଙ୍ଘ ସଭାପତି ଆପଲୁ ସ୍ୱାମୀ କାଡ଼୍ରାକାଙ୍କୁ ଦଳୀୟ ପ୍ରାର୍ଥୀ କରିଛି । ବିଜେପି ମଧ୍ୟ ଜିଲ୍ଲା ଆଦିବାସୀ ସଂଙ୍ଘର ସମ୍ପାଦକ ବସନ୍ତ ଉଲ୍ଲକାଙ୍କୁ ଏଠି ଟିକଟ ଦେଇଛି । ସେହିଭଳି ୨୦୧୪ ନିର୍ବାଚନରେ କଂଗ୍ରେସ ପ୍ରାର୍ଥୀ ଭାବେ ମକରନ୍ଦ ମୁଦୁଲି ନିର୍ବାଚନ ଲଢ଼ି ବିଜେଡ଼ି ପ୍ରାର୍ଥୀ ଲାଲ ବିହାରି ହିମିରିକାଙ୍କ ନିକଟରୁ ମାତ୍ର ୭୨୯୬ ଖଣ୍ଡ ଭୋଟରେ ପରାଜିତ ହୋଇଥିଲେ ମଧ୍ୟ ଚଳିତ ଥର ତାଙ୍କୁ କଂଗ୍ରେସରୁ ଟିକଟ ନମିଳିବା ଯୋଗୁଁ ସ୍ୱାଧିନ ଭାବେ ଲଢ଼ୁଛନ୍ତି । ସେପଟେ ବିଜେଡ଼ି ୧୯ ବର୍ଷର ନବୀନ ସରକାରଙ୍କ ଲୋକାଭିମୁଖି ଯୋଜନାକୁ ମୁଖ୍ୟ ମୁଦ୍ଦା କରିଥିବା ବେଳେ କଂଗ୍ରେସ ଏବଂ ବିଜେପି ଶିକ୍ଷା , ସ୍ୱାସ୍ଥ୍ୟ ଓ ଗମନା ଗମନକୁ ମୁଖ୍ୟ ମୁଦ୍ଦା କରିଛନ୍ତି ।

ତେବେ ସ୍ୱାଧିନ ଭାବେ ଲଢ଼ୁଥିବା ମକରନ୍ଦ ମୁଦୁଲି କିନ୍ତୁ ଝୋଡ଼ିଆଙ୍କୁ ଆଦିବାସି ମାନ୍ୟତା ସାଙ୍ଗକୁ ସ୍ଥାନୀୟ ଅଞ୍ଚଳରେ ବେକାରି ସମସ୍ୟାକୁ ନେଇ ନର୍ବାଚନ ରଣାଙ୍ଗନାରେ ଅବତୀର୍ଣ୍ଣ ହୋଇଛନ୍ତି । ମକରନ୍ଦ ମୁଦୁଲି ଝୋଡ଼ିଆ ସମ୍ପ୍ରଦାୟରୁ ପ୍ରତିନିଧିତ୍ୱ କରୁଥିବା ବେଳେ ରାୟଗଡ଼ା ନିର୍ବାଚନ ମଣ୍ଡଳିର ମୋଟ ଭୋଟର ୨ ଲକ୍ଷ ୩୩ ହଜାର ମଧ୍ୟରୁ କେବଳ କାଶିପୁର ବ୍ଲକର ଭୋଟର ଏକଲକ୍ଷ ୨୦ ହଜାର । ସେଥିମଧ୍ୟରୁ ୬୦ ହଜାର ଝୋଡ଼ିଆ ସମ୍ପ୍ରଦାୟର ଭୋଟର ରହିଛନ୍ତି । ତେଣୁ ଏଠି ଝୋଡ଼ିଆ ଭୋଟର ନର୍ଣ୍ଣାୟକ ଭୁମିକା ଗ୍ରହଣ କରିବେ ବୋଲି ଆକଳନ କରାଯାଉଛି ।