୧୧ ଶହ ଏକର ଚାଷ ଜମି ପଡ଼ିଆ ପଡ଼ିଛି, ଫସଲ ହେଉନାହିଁ କି ଶିଳ୍ପ ନାହିଁ.. !

ବାଲେଶ୍ୱର: ଶିଳ୍ପ ପାଇଁ ଚାଷୀଙ୍କୁ ବଳି । ଶିଳ୍ପ ପ୍ରତିଷ୍ଠା ହେବ ବିକାଶ ହେବ ଲୋକଙ୍କ ସ୍ବପ୍ନ ସାକାର ହେବ । ଏଭଳି ବହୁତ ସ୍ବପ୍ନ ଦେଖାଇ ଚାଷୀଙ୍କ ଜମିକୁ  ଅଧିଗ୍ରହଣ କଲେ ରାଜ୍ୟ ସରକାର । ଏଥିପାଇଁ ଶହ ଶହ ଏକର ଚାଷ ଜମି ଏବେ ପଡ଼ିଆ ପଡ଼ିଛି ବାଲେଶ୍ବର ରେମୁଣା ନରହରିପୁରରେ । ଓଡିଶା ସରକାରଙ୍କ ଶିଳ୍ପ ଉନ୍ନୟନ ନିଗମ 2011 ମସିହାରୁ 11ଶହ ଏକର ଜମି ଅଧିଗ୍ରହଣ କରି ଲ୍ୟାଣ୍ଡ ବ୍ୟାଙ୍କ କଲେ । ସରକାରଙ୍କୁ ହସ୍ତାନ୍ତର କରାଗଲା ପରେ 9 ବର୍ଷରୁ ଅଧିକ ଦିନ ପରେବି ସାଧାରଣ ଲୋକଙ୍କ ଜମିର ଟଙ୍କା ମିଳିପାରିଲା ନାହିଁ । ଏପରିକି ଜିଲ୍ଲା ଭୁ-ଅର୍ଜନ ବିଭାଗ ଓ ଇଡ୍‌କୋ ମଧ୍ୟରେ ସମନ୍ୱୟର ଅଭାବ ଯୋଗୁଁ ଜମିର ମାଲିକାନାସତ୍ୱ ହରାଇଛନ୍ତି । ଫଳରେ ଅତ୍ୟାବଶ୍ୟକୀୟ ସମୟରେ ନିଜ ଜମି କିଣାବିକାରୁ ମଧ୍ୟ ବଂଚିତ ହେଉଛନ୍ତି ଚାଷୀ ।

ଏଭଳି ଭାବେ ଚାଷୀଙ୍କ ସହ ଖେଳ ଖେଳୁଛନ୍ତି ରାଜ୍ୟ ସରକାର । ବର୍ଷ ବର୍ଷ ହେବ ଚାଷୀଙ୍କ ଜମିକୁ ହଡପ କରି ବସିଛି ଶିଳ୍ପବିଭାଗ । ଏକଥା ଆମେ କହୁନାହୁଁ ବରଂ ବାଲେଶ୍ବର ରେମୁଣା ନରହରିପୁରର 11ଶହ ଏକର ଜମି ହରାଇଥିବା ଚାଷୀ କହୁଛନ୍ତି । ସେମାନଙ୍କ ଦୁଃଖ, କିଭଳି ସରକାରଙ୍କ ଉଦାସୀନତା ଯୋଗୁଁ ବାଲେଶ୍ୱର ଜିଲ୍ଲା ରେମୁଣା ବ୍ଲକର ବାଲଗୋପାଲପୁର, ବାଙ୍ଗର ଗାଁ, କେଶପୁର, ବଉରପୁର ଆଦି ଅଂଚଳର 9 ଗୋଟି ମୌଜାରେ ଇଡ୍‌କୋ ପକ୍ଷରୁ 11ଶହ ଏକର ଚାଷଜମି ଶିଳ୍ପ ପାଇଁ ଅଧିଗ୍ରହଣ ନୋଟିସ କରାଗଲା । ନୋଟିସ ପରେ ଶହ ଶହ ଚାଷୀ ପରିବାର ଶିଳ୍ପର ବିକାଶ ପାଇଁ ଜମି ଛାଡିଲେ । ନୋଟିସ ପରେ ପ୍ରଶାସନର ବିଜ୍ଞପ୍ତି ଜାରି କରି ଚାଷୀଙ୍କୁ ଅଧିକ ଅଡ଼ୁଆରେ ପକାଇଲା ।

ଗତ 9 ବର୍ଷରୁ ଅଧିକ ହେବ ଏହି ଚାଷ ଜମି ପଡିଆ ପଡିଥିବା ବେଳେ ଚାଷୀଙ୍କୁ ବି ମିଳିଲାନାହିଁ ପ୍ରାପ୍ୟ । ଜିଲ୍ଲାପାଳ, ମୁଖ୍ୟମନ୍ତ୍ରୀ, ସ୍ଥାନୀୟ ପ୍ରଶାସନ ଚାଷୀଙ୍କ ଗୁହାରି କେହି ଶୁଣିଲେ ନାହିଁ କି ସମାଧାନ ରାସ୍ତା ବି ବାହାର କଲେନାହିଁ । ବାରମ୍ଭାର ଜମି ପାଇଁ ବିଜ୍ଞପ୍ତି ପ୍ରକାଶ ପାଉଛି । ପରବର୍ତ୍ତୀ ସମୟରେ କ୍ଷତିପୂରଣ ଓ ଆନୁଷଙ୍ଗିକ ସହାୟତ ପ୍ରତିଶ୍ରୁତି ବି ମିଳୁଛି । ଜମି ମାଲିକମାନେ ଜମିର ମୁଲ୍ୟ ତ ପାଇବା ଦୂରର କଥା ଏପରିକି ଚାଷୀଙ୍କ ଜମିରେ ଇଡ୍‌କୋ ନୋଟିସ ଲଗାଇଥିବାରୁ ଲୋକେ କିଣା ବିକା ବି କରିପାରୁ ନାହାନ୍ତି ।

ଶିଳ୍ପର ବିକାଶ କଥା କହୁଥିବା ସରକାରର ଅସଲ ଚେହେରା ବାଲେଶ୍ବର ରେମୁଣାରୁ ଜଣାପଡିଛି । ପୂର୍ବତନ ରେମୁଣା ବିଧାୟକ ଗୋବିନ୍ଦ ଦାସ ବିଧାନସଭାରେ ପ୍ରସଙ୍ଗ ଉଠାଇଛନ୍ତି । ସରକାରଙ୍କ ନିକଟରେ ବାରମ୍ଭାର ଅଭିଯୋଗ ପରେ ବି ଚାଷୀଙ୍କ ଜମିର କ୍ଷତିପୁରଣ ମିଳିପାରିଲା ନାହିଁ କି ଶିଳ୍ପ ପ୍ରତିଷ୍ଠା ହୋଇପାରିନାହିଁ । ସେପଟେ ଏ ସମ୍ପର୍କରେ ଜିଲ୍ଲା ପ୍ରଶାସନ ଏହାକୁ ହାଲୁକାଭାବେ ଗ୍ରହଣ କରିଛି ।

ମେକ ଇନ୍‌ ଓଡିଶା ଜରିଆରେ ସରକାର ରାଜ୍ୟରେ ଶିଳ୍ପର ବିକାଶ କଥା ଚିନ୍ତା କରୁଛନ୍ତି । କିନ୍ତୁ ଶିଳ୍ପ ପାଇଁ ଜମି ଅଧିଗ୍ରହଣ ସମସ୍ୟା ସୃଷ୍ଟି ଖୋଦ କରୁଛନ୍ତି ରାଜ୍ୟ  ସରକାର ।