କମିଶନରେଟ ପୋଲିସର ନୂଆ ନିୟମ, ଏଣିକି ମନ ଇଚ୍ଛା ଗାଡ଼ି ପାର୍କିଂ କଲେ ଗଣିବାକୁ ପଡ଼ିବ ତଣ୍ଡ...

ଭୁବନେଶ୍ୱର: ଭୁବନେଶ୍ୱରରେ ଗାଡ଼ି ପାର୍କିଂ ଉପରେ ଲାଗିଲା ରୋକ ! ଏଣିକି ଏଣେତେଣେ ଗାଡ଼ି ରଖିଲେ ଗଣିବାକୁପଡ଼ିବ ମୋଟା ଅଙ୍କର ତଣ୍ଡ । ପ୍ରଥମ କରି କଳ୍ପନା ଛକରୁ ରାଜମହଲ ଓ ରାଜମହଲରୁ ଏଜି ଛକ ପର୍ଯ୍ୟନ୍ତ ବାଇକ୍‌ ଓ କାର୍‌ ପାର୍କିଂ ଉପରେ କମିଶନରେଟ ପୋଲିସ ପକ୍ଷରୁ କଟକଣା ଜାରି କରାଯାଇଛି । ନିୟମ ଉଲ୍ଲଙ୍ଘନ କଲେ ସହରାଞ୍ଚଳ ଆଇନ୍‌ ଦଫା 96 ବଳରେ 1 ହଜାର ଟଙ୍କା ଜୋରିମାନା ଆଦାୟ କରାଯିବ ବୋଲି ଚେତାବନୀ ଦେଇଛି ପୋଲିସ । ଏନେଇ ସ୍ୱତନ୍ତ୍ର ସୂଚନା ଫଳକ ଜରିଆରେ ଲୋକମାନଙ୍କୁ ସଚେତନ ମଧ୍ୟ କରାଯାଇଛି ।

ନୂଆ ନିୟମ ଅନୁଯାୟୀ କଳ୍ପନାରୁ ରାଜମହଲ ପର୍ଯ୍ୟନ୍ତ ଫ୍ଲାଏ ଓଭରବ୍ରିଜ୍‌ ନିକଟସ୍ଥ ସର୍ଭିସ ରୋଡର ଉଭୟ ପାର୍ଶ୍ୱରେ ଗାଡି ପାର୍କିଂ କରିବା ମନା । ଏହା ଛଡା ସବ୍ ମେନ୍‌ ରୋଡରେ କେବଳ ଦିନ ବାର ଅନୁଯାୟୀ ପାର୍କିଂ ବ୍ୟବସ୍ଥା କରାଯିବ । ନୂଆ ନିୟମ ଅନୁଯାୟୀ ସୋମବାର, ବୁଧବାର ଓ ଶୁକ୍ରବାର ବାମ ପାର୍ଶ୍ୱରେ ଏବଂ ମଙ୍ଗଳବାର, ଗୁରୁବାର ଓ ଶନିବାର ଡାହାଣ ପାର୍ଶ୍ବରେ ଗାଡି ପାର୍କିଂ ପାଇଁ ବ୍ୟବସ୍ଥା କରାଯାଇଛି । ସେହିଭଳି ବାପୁଜୀନଗର ଭିତରକୁ ପଶିବା ଓ ବାହାରିବା ପାଇଁ ନିର୍ଦ୍ଧିଷ୍ଠ ରାସ୍ତା ଚିହ୍ନଟ କରାଯାଇଛି ।

ଏହା ଛଡା ବାପୁଜୀନଗର ମାର୍କେଟ ଭିତରେ 3ଟି ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଛି । ବ୍ୟାଙ୍କ୍‌ ଅଫ୍‌ ବରୋଦା, ଜଗନ୍ନାଥ ସେବା ସଦନ ସାମ୍ନା ଓ ରବିନ୍ଦ୍ର ମେଡିସିନ୍‌ ଷ୍ଟୋର ସାମ୍ନାରେ ପାର୍କିଂ ପାଇଁ ସୁବିଧା କରାଯାଇଛି । ଯେଉଁ ଯାଗାରେ କାର ପାର୍କିଂ ପାଇଁ ଚିହ୍ନଟ ହୋଇଛି ସେହି ଯାଗାରେ ହିଁ କାର ପାର୍କିଂ କରାଯିବ ବୋଲି କଡ଼ା ନିର୍ଦ୍ଦେଶ ରହିଛି । ଯଦି ଅନ୍ୟ ସ୍ଥାନରେ କେହି କାର୍‌ ପାର୍କିଂ କରନ୍ତି ତେବେ ସେମାନଙ୍କଠାରୁ ଜୋରିମାନା ଆଦାୟ କରାଯିବ ।

ତେବେ ଏହି ପାର୍କିଂ ସମ୍ବନ୍ଧରେ ଅନେକ ସୂଚନା ଦିଆଯାଇଛି, ସେଗୁଡ଼ିକ ହେଲା.. 1) କୌଣସି  ଯାନବାହନ ରାଜମହଲ ଓଭରବ୍ରିଜର ଦୁଇ ପାର୍ଶ୍ୱରେ ଗାଡି ପାର୍କିଂ କରିପାରିବେ ନାହିଁ ।

2) ବାପୁଜୀନଗର ମାର୍କେଟକୁ ଯିବା ପାଇଁ ଗାଡ଼ିଗୁଡିକ ରାଜମହଲ ଶିଶୁଭବନ ସହ ମେନ ରୋଡ଼ 1 ଦେଇ ଯିବେ । କେହି ଏହି ରାସ୍ତା ଦେଇ ବହାରିପାରିବେ ନାହିଁ ।

3) ସବ୍ ମେନ୍‌ ରୋଡ୍‌ 2 ଦେଇ ସମସ୍ତ ରାସ୍ତାରେ ଗାଡି ବାହାରିବ ।

ତେବେ ଲୋକମାନେ ଏହି ନିୟମ ବିଷୟରେ ଜାଣି ନଥିବା ବେଳେ ସୂଚନା ଫଳକ ଜରିଆରେ ସବିଶେଷ ସୂଚନା ପାଇପାରିବେ ବୋଲି କହିଛନ୍ତି ଟ୍ରାଫିକ୍‌ ଡିସିପି ସାଗରିକା ନାଥ ।

ଅନ୍ୟପଟେ ଏହି ନୀୟମ ବାସ୍ତବରେ କେତେଦୂର କାର୍ଯ୍ୟକାରୀ ହେବ, ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ପ୍ରଥମତଃ ଲୋକେ ଯିବା ସମୟରେ ‘ବାର’ କଥା ମନେ ରଖି ଯିବେ କି ନାହିଁ ବୋଲି ପ୍ରଶ୍ନ ଉଠିଛି । ରାଜଧାନୀ ଲୋକ ଜାଣିପାରନ୍ତି କିନ୍ତୁ ବାହାରୁ ଆସୁଥିବା ଲୋକେ କେବେ ହେଲେ ଜାଣିପାରିବେ ନାହିଁ ବୋଲି ଲୋକଙ୍କ ମଧ୍ୟ ମତ ପ୍ରକାଶ ପାଇଛି । ଦ୍ୱିତୀୟତଃ ପାର୍କିଂ ପାଇଁ ଯେଉଁ ସବୁ ସ୍ଥାନ ନିରୂପଣ କରାଯାଇଛି, ଲୋକେ ମେର୍କେଟରୁ ଭାରି ଜିନିଷ କିଣି ସେତିକି ଦୂର ଚାଲି ଚାଲି ଯାଇପାରିବେ କି ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି । ତେଣୁ ନିୟମ କରିବା ପୂର୍ବରୁ ବାସ୍ତବତା ପରଖିବା ଦରକାର ବୋଲି ଲୋକେ କହିଛନ୍ତି ।