୩ୟ ପର୍ଯ୍ୟାୟରେ ରାଜଧାନୀ: ଟକ୍କର ହେବ ଜୋରଦାର, ଦୁଇ ପ୍ରଶାସକ ବନାମ୍ ରାଜନେତା

by Aryan Cross

ଭୁବନେଶ୍ୱର: ରାଜ୍ୟ ରାଜନୀତିରେ ଭୁବନେଶ୍ୱର ଲୋକସଭା ନିର୍ବାଚନର ମହତ୍ୱ ସର୍ବାଧିକ । ସମସ୍ତଙ୍କ ଫୋକସରେ ରହିଛି ଭୁବନେଶ୍ୱର ଲୋକସଭା ଆସନ । ନିର୍ବାଚନ ରଣଭୂମିରେ ହେବ ଜୋରଦାର ତ୍ରିମୁଖୀ ଲଢେଇ । ଭୁବନେଶ୍ୱରବାସୀଙ୍କ ଭରଷା କିଏ ଜିତିବି ତାରି ଉପରେ ସମସ୍ତଙ୍କ ନଜର । ଗତ ଦୁଇ ଦଶନ୍ଧି ଧରି ଏହା ବିଜେଡ଼ିର ଗଡ଼ ହୋଇ ରହିଥିବା ବେଳେ ଚଳିତ ଥର କିନ୍ତୁ ସମୀକରଣ ବଦଳି ମଧ୍ୟ ପାରେ । କାରଣ ମଇଦାନରେ ଅଛନ୍ତି ଦୁଇ ପୂର୍ବତନ ପ୍ରଶାସନିକ ଅଧିକାରୀଙ୍କ ସହ ଲଢିବେ ପୁରୁଖା ରାଜନେତା ।

ଚଳିତ ଥର ବିଜେଡିର ପ୍ରସନ୍ନ ପାଟ୍ଟଶାଣୀଙ୍କ ବଦଳରେ ମଇଦାନକୁ ଓହ୍ଲାଇଛନ୍ତି ମୁମ୍ୱାଇର ପୂର୍ବତନ ପୋଲିସ କମିଶନର ଅରୂପ ପଟ୍ଟନାୟକ । ତାଙ୍କୁ ଟକ୍କର ଦେବେ ଲୋକପ୍ରିୟ ପ୍ରଶାସିକା ଅପରାଜିତା ଷଡଙ୍ଗୀ । ସେହିପରି କଂଗ୍ରେସ ଚଳିତ ଥର ପ୍ରାର୍ଥୀ ଦେଇନଥିଲେ ହେଁ ସିପିଆଇଏମ୍ ପ୍ରାର୍ଥୀ ଜନାର୍ଦ୍ଦନ ପତିଙ୍କୁ ସମର୍ଥନ ଜଣାଉଛି । ଏଣୁ ଭୁବନେଶ୍ୱର ଲୋକସଭା ଆସନ ପାଇଁ ହେବାକୁ ଯାଉଛି ଜୋରଦାର ତ୍ରିମୁଖୀ ଲଢେଇ । ତୃତୀୟ ପର୍ଯ୍ୟାୟରେ ହେବ ଦୁଇ ପ୍ରଶାସକ ସହ ବରିଷ୍ଠ ରାଜନେତାଙ୍କ ଫାଇଟ୍ । ତେବେ ଭୋଟର ବରିଷ୍ଠ ପ୍ରଶାସକ ନା ରାଜନେତାଙ୍କୁ ବାଛିବେ, ତାହା ଦେଖିବାକୁ ବାକି ରହିଲା ।

ସୂଚନା ଯେ, ରାଜ୍ୟ ରାଜନୀତିରେ ସିପିଆଇଏମ୍‌ର ସ୍ଥିତି ସେତେଟା ସୁଦୃଢ ନାହିଁ । ଯଦିଓ ଜନାର୍ଦ୍ଦନ ପତି ଜଣେ ପୁରୁଖା ନେତା କିନ୍ତୁ ଗତ ନିର୍ବାଚନକୁ ସମୀକ୍ଷା କଲେ ଦଳର ସଂଗଠନ ମଜବୁତ୍ ନଥିବା ଜଣାଯାଏ । ତେବେ କଂଗ୍ରେସ କିନ୍ତୁ ଚଳିତ ଥର ଜନାର୍ଦ୍ଦନ ପତିଙ୍କୁ ସମର୍ଥନ କରିବା ଫଳରେ କିଛିଟା ଆଶା କରାଯାଇପାରେ । ଅନ୍ୟପଟେ ଦୁଇ ବରିଷ୍ଠ ଆଇଏଏସ୍ ଓ ଆଇପିଏସ୍ । ଜଣେ ବିଏମସି କମିଶନର ଦାୟିତ୍ୱରେ ଥିବାବେଳେ ଭୁବନେଶ୍ୱରର ଘରେ ଘରେ ଲୋକପ୍ରିୟତା ସାଉଁଟିଛନ୍ତି । ଆଉ ଜଣେ ମୁମ୍ୱାଇରେ ଜଣେ ସଚ୍ଚୋଟ ଓ ନିର୍ଭିକ ପୋଲିସ ଅଫିସର ଭାବେ ସାରା ଦେଶରେ ପରିଚିତ ।