ଅବହେଳିତ ପଣସପୁର ଗାଁ, ସ୍ୱାଧୀନତାର ଦୀର୍ଘ ବର୍ଷ ପରେବି ମୌଳିକ ସୁବିଧାରୁ ବଞ୍ଚିତ

କଳାହାଣ୍ଡି: ସରକାରଙ୍କ ଡିଙ୍ଗୁରା ଗାଁକୁ କାମ ମାଁ କୁ ସମ୍ମାନ । ହେଲେ ସରକାରଙ୍କ ଏହି ଡିଙ୍ଗୁରା ଯେ କେତେ ଦୁର କାର୍ଯ୍ୟକାରୀ ତାହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଗୋଳାମୁଣ୍ଡା ବ୍ଲକର ପଣସପୁର ଗ୍ରାମରେ । ସ୍ୱାଧୀନତାର ଦୀର୍ଘ ବର୍ଷ ପରେ ବି ଏଠି ପହଞ୍ଚି ପାରିନାହିଁ ମୌଳିକ ସୁବିଧା । ନାହିଁ ନଥିବା ସମସ୍ୟାରେ ଘେରରେ ବୁଡି ରହିଛନ୍ତି ଏହି ଗ୍ରାମର ଗ୍ରାମବାସୀମାନେ ।

କଳାହାଣ୍ଡି ଜିଲ୍ଲା ଗୋଳାମୁଣ୍ଡା ବ୍ଲକ ରେଙ୍ଗସାପାଲି ଗ୍ରାମପଞ୍ଚାୟତର ପଣସପୁର ଗାଁ । ଏହି ଗାଁରେ ବିଭିନ୍ନ ଜାତିର ପ୍ରାୟ ୧୦୦ରୁ ଉର୍ଦ୍ଧ୍ୱ ପରିବାର ବସବାସ କରନ୍ତି । ଜୀବନ ଜୀବିକା କହିଲେ ଚାଷ ବାସ ତଥା ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ନିଜ ପରିବାରର ଭରଣପୋଷଣ କରିଥାନ୍ତି । ହେଲେ ସ୍ୱାଧିନତାର ଦୀର୍ଘ ବର୍ଷ ପରେ ବି ଏହି ଗାଁରେ ମୌଳିକ ସୁବିଧା ଅପହଞ୍ଚ । ପାନୀୟ ଜଳ ସାଙ୍ଗକୁ ଏହି ଗାଁକୁ ଗମନାଗମନ ପାଇଁ ଭଲ ରାସ୍ତା ଖଣ୍ଡେ ନଥିବାରୁ ନାହିଁ ନଥିବା ଅସୁବିଧା ଭୋଗୁଛନ୍ତି ଗ୍ରାମବାସୀ । ଗାଧୁଆ ପାଧୁଆ ପାଇଁ ପୋଖରୀ ନଥିବା ଅଭିଯୋଗ କରିଛଣ୍ତି ଗ୍ରାମବାସୀ । ଅନ୍ୟପଟେ ଗାଁର ମୌଳିକ ସମସ୍ୟାକୁ ନେଇ ଗ୍ରାମବାସୀ ବାରମ୍ବାର ପ୍ରଶାସନର ଦ୍ୱାରସ୍ଥ ହେବା ସହ ରାଜନେତାଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କିଏ କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି ।

ଦୀର୍ଘ ୨୦ବର୍ଷ ପୁର୍ବରୁ ଏହି ଗ୍ରାମକୁ ରାସ୍ତା ତିଆରି କରାଯାଇଥିଲା । କିନ୍ତୁ ରକ୍ଷଣା ବେକ୍ଷଣା ଅଭାବରୁ ସେ ରାସ୍ତା ଅବସ୍ଥା ବର୍ତମାନ ଶୋଚନୀୟ ହୋଇପଡିଛି । ଅନ୍ୟପଟେ ନିର୍ବାଚନ ସମୟରେ ଏହି ଗାଁକୁ ନେତାଙ୍କ ସୁଅ ଛୁଟୁଥିବାବେଳେ ରାସ୍ତା ପାଇଁ ପ୍ରତିଶୃତି ମଧ୍ୟ ଦେଉଛନ୍ତି ହେଲେ ନିର୍ବାଚନ ପରେ ଫଳ ଶୁନ । ଏମିତିକି ଗାଁର କୌଣସି ରୋଗୀ କିମ୍ବା ଗର୍ଭବତୀଙ୍କୁ ଡାକ୍ତରଖାନା ନେବା ସମୟରେ ଏହି ଗ୍ରାମକୁ ଆମ୍ବୁଲାନ୍ସ ଆସିପାରୁନଥିବାରୁ ଦୀର୍ଘ ୫କିମି ଖଟିଆରେ ନେବାକୁ ପଡିଥାଏ । ଏନେଇ ଗ୍ରାମବାସୀ ଅଭିଯୋଗ କରିବା ସହ ତୁରନ୍ତ ପାନୀୟ ଜଳ ଓ ରାସ୍ତାର ସମସ୍ୟା ଦୁର କରିବା ପାଇଁ ଅନୁରୋଧ କରିଛନ୍ତି । ଅନ୍ୟପଟେ ଏନେଇ ଗୋଳାମୁଣ୍ଡା ବିଡିଓଙ୍କୁ ଯୋଗାଯୋଗ କରିବାରୁ ପାନୀୟ ଜଳ ପାଇଁ ବ୍ୟବସ୍ଥା କରାଯାଇଛି ଓ ରାସ୍ତା ପାଇଁ ଖୁବ ଶିଘ୍ର ବ୍ୟବସ୍ଥା କରାଯିବ ବୋଲି କହିଛନ୍ତି । ତେବେ ପ୍ରଶାସନ ତଥା ରାଜନେତା କେବେ ଏହି ଗାଁ ପ୍ରତି ଦୃଷ୍ଟି ଦେଇ ଏହି ଗାଁକୁ ମୌଳିକ ସୁବିଧା ଯୋଗାଇ ଦେଉଛନ୍ତି ତାହା ହିଁ ଦେଖିବାକୁ ବାକି ରହିଲା ।