ଥାନା ଅଧିକାରୀଙ୍କ ବଦଳି ଦାବି କରି ବରଗଡ଼ ଓକିଲ ସଂଘର କାର୍ଯ୍ୟବନ୍ଦ ଆନ୍ଦୋଳନ

ବରଗଡ଼: ପୋଲିସ ଅଧିକାରୀଙ୍କ ବଦଳି ଦାବିରେ ଆଜି ବରଗଡ଼ ଜିଲ୍ଲା ଓକିଲ ସଂଘ କାର୍ଯ୍ୟ ବନ୍ଦ ଆନ୍ଦୋଳନ ଡାକରା ଦେଇଛି । ବରଗଡ ଜିଲ୍ଲା ସଦର ଥାନା ଅଧିକାରୀ ଓ ଜଣେ ସବ୍ ଇନ୍ସପେକ୍ଟରଙ୍କ ବଦଳି ଦାବି ନେଇ ବରଗଡ଼ ଓକିଲ ସଂଘ ପକ୍ଷରୁ ଏହି ଆନ୍ଦୋଳନ ହୋଇଥିବା ଦେଖିବାକୁ ମିଳିଛି । ତେବେ ଗତକାଲି ସନ୍ଧ୍ୟାରେ ଯୁବ ଆଇନଜୀବୀ ବିନୟ ଯୋଶୀ ଏକ ଗଣ୍ଡଗୋଳ ସଂକ୍ରାତୀୟ ଘଟଣା ନେଇ ବରଗଡ଼ ସଦର ଥାନାକୁ ଯାଇଥିଲେ । ତାଙ୍କୁ ବରଗଡ଼ ସଦର ଥାନା ଆଇଆଇସି କଳ୍ପନା ବେହେରା ଓ ଜଣେ ସବ୍ ଇନ୍ସପେକ୍ଟର ସୁଷମା ପଶାୟତ ଦୁର୍ବ୍ୟବହାର ପ୍ରଦର୍ଶନ କରିଥିଲେ ।

ଏନେଇ ଦୁର୍ବ୍ୟବହାର କରିଥିବା ଉଭୟ ପୋଲିସ ଅଧିକାରୀଙ୍କ ବଦଳି ଦାବିରେ ଆଜି ବରଗଡ଼ ଜିଲ୍ଲା ଓକିଲ ସଂଘ କାର୍ଯ୍ୟ ବନ୍ଦ ଆନ୍ଦୋଳନ ଡାକରା ଦେଇଛି । ଏ ସମ୍ପର୍କରେ ବାର୍ କାଉନସିଲ ଅଫ୍ ଓଡିଶାକୁ ମଧ୍ୟ ଅବଗତ କରାଯାଇଥିବା କୁହାଯାଇଛି । ବାରମ୍ବାର ବିଭିନ୍ନ ଥାନା ମାନଙ୍କରେ ଓକିଲଙ୍କ ପ୍ରତି ଦୁର୍ବ୍ୟବହାର ପ୍ରଦର୍ଶନ ଘଟଣା ବୃଦ୍ଧି ପାଉଥିବାରୁ ଏ ସମ୍ପର୍କରେ ବରଗଡ଼ ଜିଲ୍ଲା ଓକିଲ ସଂଘ ବରଗଡ଼ ଆରକ୍ଷୀ ଅଧିକ୍ଷକ ମୁକେଶ କୁମାର ଭାମୋଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ତେବେ ଏହି ଘଟଣାକୁ ନେଇ ଦୃଢ କାର୍ଯ୍ୟାନୁଷ୍ଠାନ କରାନଗଲେ ଆନ୍ଦୋଳନ ଆହୁରି ତିବ୍ରତର ହେବ ବୋଲି ଓକିଲ ସଂଘ ପକ୍ଷରୁ ଦାବି ହୋଇଛି ।