ସେବାଶ୍ରମରେ ଆଦିବାସୀ ଛାତ୍ରୀ ଗର୍ଭବତୀ ଘଟଣାରେ ସ୍ପଷ୍ଟୀକରଣ ରଖିଲେ ମନ୍ତ୍ରୀ

ଭୁବନେଶ୍ୱର: ସେବାଶ୍ରମ ସ୍କୁଲରେ ଆଦିବାସୀ ଛାତ୍ରୀ ଗର୍ଭବତୀ ଘଟଣାରେ ଗୃହରେ ସ୍ପଷ୍ଟୀକରଣ ରଖିଲେ ବିଭାଗୀୟ ମନ୍ତ୍ରୀ ଜଗନ୍ନାଥ ସାରକା । ପ୍ରାରମ୍ଭିକ ପର୍ଯ୍ୟାୟରେ ଖୋର୍ଦ୍ଧାରେ 4ଜଣ ଚିହ୍ନଟ ହୋଇଥିଲେ ।  କ୍ୟାପିଟାଲ ହସ୍ପିଟାଲରେ ସ୍ୱାସ୍ଥ୍ୟ ପରୀକ୍ଷା ପରେ ଜଣଙ୍କର ପଜିଟିଭ ଆସିଥିଲା ।  ଛାତ୍ରୀଜଣଙ୍କ ଆଶ୍ରମ ସ୍କୁଲରେ ନୁହେଁ ନିଜ ଘରେ ଥିବା ବେଳେ ଗର୍ଭବତୀ ହୋଇଥିଲେ ।  ଗ୍ରୀଷ୍ମ ଛୁଟିରେ ଘଟିଥିଲା ଏହି ଘଟଣା । ଛାତ୍ରୀଙ୍କ ସୁରକ୍ଷା ଓ ନିରାପତ୍ତାକୁ ସରକାର ଗୁରୁତ୍ୱ ଦେଉଛନ୍ତି ବୋଲି କହିଛନ୍ତି ମନ୍ତ୍ରୀ । ଆଶ୍ରମ ସ୍କୁଲରେ ନିୟମିତ ସ୍ୱାସ୍ଥ୍ୟ ପରୀକ୍ଷା କରାଯାଉଛି । 1120 ଟି ସିସିଟିଭି ଲାଗିଛି , ଛାତ୍ରୀଙ୍କ ପାଇଁ ଟୋଲ ଫ୍ରି ନମ୍ବର ରହିଛି ବୋଲି ମଧ୍ୟ କହିଛନ୍ତି ମନ୍ତ୍ରୀ ଜଗନ୍ନାଥ ସାରକା ।

ଏହାସହ ମନ୍ତ୍ରୀ ନିଜ ଉତ୍ତରରେ ଦର୍ଶାଇଛନ୍ତି, ରାଜ୍ୟରେ ପ୍ରାୟ 6500 ହଷ୍ଟେଲରେ 5.93 ଲକ୍ଷ ଛାତ୍ରଛାତ୍ରୀ ରହି ପଢୁଛନ୍ତି । ସେଥିମଧ୍ୟରୁ 3.30 ଲକ୍ଷ ହେଉଛନ୍ତି ଛାତ୍ରୀ । ଛାତ୍ରାଛାତ୍ରୀଙ୍କ ସୁରକ୍ଷା, ନିରାପତ୍ତା ଓ ସ୍ୱାସ୍ଥ୍ୟ ପାଇଁ ରାଜ୍ୟ ସରକାର ସର୍ବଦା ସଚେତନ ଅଛନ୍ତି ।

ସେ ଯାହା ହେଉ, ରାଜ୍ୟରେ ବିଭିନ୍ନ ଆଶ୍ରମ ସ୍କୁଲରେ କୁମାରୀ ମାତୃତ୍ୱ ଭଳି ଘଟଣା ସାମ୍ନାକୁ ଆସେ । ସେହି ଚିରାଚରିତ ଢଙ୍ଗରେ ସ୍କୁଲ କର୍ତ୍ତୃପକ୍ଷଙ୍କ ସମେତ ବିଭାଗୀୟ ମନ୍ତ୍ରୀ ସଫେଇ ଦେଇ କୁହନ୍ତି ଆଶ୍ରମ ସ୍କୁଲରେ ନୁହେଁ ବରଂ ଗ୍ରୀଷ୍ମ ଛୁଟିରେ ଘରକୁ ଯାଇଥିବା ବେଳେ ଏହି ଘଟଣା ଘଟିଥିଲା ।

ସେହିଭଳି ଖୋର୍ଦ୍ଧା ଘଟଣାରେ ମନ୍ତ୍ରୀ ସମାନ ଢଙ୍ଗରେ ଉତ୍ତର ରଖିଛନ୍ତି । ମନ୍ତ୍ରୀଙ୍କ ଉତ୍ତର ଅନୁଯାୟୀ ଖୋର୍ଦ୍ଧା ଜିଲ୍ଲା ମଙ୍ଗଳ ଅଧିକାରୀଙ୍କ ମତରେ ଗ୍ରୀଷ୍ମ ଛୁଟି ପରେ ସବୁ ଛାତ୍ରୀଙ୍କର ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା । ପ୍ରାଥମିକ ସ୍ୱାସ୍ଥ୍ୟ ପରୀକ୍ଷାରୁ 4 ଜଣ ଛାତ୍ରୀଙ୍କ ଗର୍ଭ ପରୀକ୍ଷା ପଜିଟିଭ୍‌ ଥିବା ସନ୍ଦେହ କରାଯାଇଥିଲା । ପରେ ସେହି 4 ଜଣଙ୍କ ବିସ୍ତୃତ ସ୍ୱାସ୍ଥ୍ୟ ପରୀକ୍ଷା କ୍ୟାପିଟାଲ ହସ୍ପିଟାଲରେ କରାଯାଇଥିଲା । ସେଥିମଧ୍ୟରୁ 3 ଜଣଙ୍କର ନେଗେଟିଭ୍‌ ବାହାରି ଥିବା ବଳେ ଜଣେ ଗର୍ଭବତୀ ଥିବା ଜଣାପଡ଼ିଥିଲା ।

ସମ୍ପୃକ୍ତ ଛାତ୍ରୀଙ୍କୁ ସମସ୍ତ ପ୍ରକାର ସ୍ୱାସ୍ଥ୍ୟ ସୁବିଧା ଯୋଗାଇ ଦିଆଯାଇଛି । ଏହାସହ ଛାତ୍ରୀଙ୍କ ପିତା-ମାତାଙ୍କୁ ଏନେଇ ଅବଗତ କରାଯାଇଛି । ଏହାପରେ ଏ ସମ୍ପର୍କରେ ପୋଲିସକୁ ଖବର ଦିଆଯାଇଥିଲା । ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଲା ଯେ, ଗ୍ରୀଷ୍ମ ଛୁଟିରେ ଛାତ୍ରୀ ଘରକୁ ଯାଇଥିବା ବେଳେ ଏଭଳି ଘଟଣା ଘଟିଛି । ଘରେ ଥିବା ବେଳେ ଜଣେ ବ୍ୟକ୍ତି ତାଙ୍କ ସହ ସମ୍ପର୍କ ସ୍ଥାପନ କରିଥିଲେ । ପରେ ଜୁଲାଇ 7ରେ ପୋଲିସ ଅଭିଯୁକ୍ତକୁ ଗିରଫ କରିଛି ବୋଲି ମନ୍ତ୍ରୀ ଜଣାଇଛନ୍ତି ।

ସେହିପରି ଚଳିତ ବର୍ଷ ଜାନୁଆରୀ ଏବଂ ଫେବୃଆରୀରେ ଢେଙ୍କାନାଳ ଏବଂ ମୟୂରଭଞ୍ଜର 2 ଜଣ ଛାତ୍ରୀଙ୍କୁ ହୋଇଥିବା ଅସଦାଚରଣ ପାଇଁ ସେହି  ଛୁଟିକୁ ଦାୟୀ କରିଛନ୍ତି ମନ୍ତ୍ରୀ । ପୋଲିସ ନିଜ ତଦନ୍ତରେ ମଧ୍ୟ ଛୁଟି ପାଇଁ ଏସବୁ ଘଟିଥିବା ପ୍ରକାଶ କରିଛି ବୋଲି ଉଲ୍ଲେଖ କରିଛନ୍ତି ମନ୍ତ୍ରୀ । ତେବେ ଏ କ୍ଷେତ୍ରରେ ସମସ୍ତ ଦୋଷୀଙ୍କୁ ଦଣ୍ଡବିଧାନ ନିମନ୍ତେ ଆଇନ ଅନୁଯାୟୀ ପୋଲିସ କେସ୍‌ କରି ପଦକ୍ଷେପ ନିଆଯାଇଛି ବୋଲି ମଧ୍ୟ ଦର୍ଶାଇଛନ୍ତି ମନ୍ତ୍ରୀ ଜଗନ୍ନାଥ ସାରକା ।