ବାଲୁଖଣ୍ଡ ଅଭୟାରଣ୍ୟରେ ହରିଣଙ୍କ ପତ୍ତା ମିଳୁନି, ଏପଟେ କୃଷ୍ଣସାର ମୃଗଙ୍କ ପାଇଁ ଆରମ୍ଭ ହେଉଛି ପାଇଲଟ ପ୍ରୋଜେକ୍ଟ

ବନ ବିଭାଗର ହରିଣ ଚିନ୍ତା । ଫୋନି ବାତ୍ୟାର ୧୩ ଦିନ ପରେ ବି ବାଲୁଖଣ୍ଡ ଅଭୟାରଣ୍ୟରେ କେତେ ହରିଣ ଜୀବିତ ଅଛନ୍ତି ତାହାର ଖୋଜ ଖବର କାହାରି ପାଖରେ ନାହିଁ । ଏବେ ଡ୍ରୋନ କ୍ୟାମେରା ଉଡାଇ ହରିଣ ଖୋଜା ଅଭିଯାନ ଆରମ୍ଭ କରିଛି ବନ ବିଭାଗ । ସେହିପରି ଆସ୍କା କୃଷ୍ଣସାର ମୃଗଙ୍କ ପାଇଁ ପାଇଲଟ ପ୍ରୋଜେକ୍ଟ ଆରମ୍ଭ କରାଯିବ । ପ୍ରଥମେ ୧ ଏକର ଜମିରେ ଓ ପରେ ୫୦ ଏକର ଜମି କିଣି ହରିଣଙ୍କ ଖାଇବା ନିମନ୍ତେ ଫସଲ କରିବାକୁ ଯୋଜନା କରିଛି ବନ ବିଭାଗ ।

ମୃଗଙ୍କ ସୁରକ୍ଷା ପାଇଁ ଏବେ ଚିନ୍ତାରେ ବନ ବିଭାଗ ।  ଗତ ୩ ତାରିଖରେ ଆସିଥିବା ଫୋନି ବାତ୍ୟା ପୁରୀ ଜିଲ୍ଲାର ବାଲୁଖଣ୍ଡ ଅଭୟାରଣ୍ୟକୁ ଧ୍ୱଂସ ବିଧ୍ୱସ୍ତ କରିଦେଇଥିବା ବେଳେ ସେଠାରେ ଥିବା ପ୍ରାୟ ୫ ହଜାର ହରିଣଙ୍କ ଖୋଜ ଖବର ନାହିଁ  । ଗତ ସୋମବାର ଦିନ ବନ ବିଭାଗ ପକ୍ଷରୁ ଲଗାଯାଇଥିବା କ୍ୟାମେରା ରେ କିଛି ହରିଣ ପଲଙ୍କ ଚିତ୍ର କଏଦ ହୋଇଛି । ଅନ୍ୟପଟେ ବାତ୍ୟା ପରେ  ବାସ୍ତବରେ କେତେ ହରିଣ ଜିବୀତ ଅଛନ୍ତି ଓ କେଉଁଠି ଅଛନ୍ତି ତାହା ଜାଣିବା ପାଇଁ ବନ ବିଭାଗ ଡ୍ରୋନ କ୍ୟାମେରାର ସହାୟତା ନେଇଛି । ଆଗାମୀ ୨ ଦିନ ମଧ୍ୟରେ ପ୍ରକୃତ ସ୍ଥିତି ଜଣାପଡିବ ବୋଲି ବନ ସଂରକ୍ଷକ ତଥା ବନ୍ୟପ୍ରାଣୀ ତତ୍ୱାବଧାରକ ଅଜୟ କୁମାର ମହାପାତ୍ର ସୂଚନା ଦେଇଛନ୍ତି । ସେହିପରି ଅଭୟାରଣ୍ୟରେ ଭାଙ୍ଗିଯାଇଥିବା ଗଛଗୁଡିକର ସଫେଇ କାର୍ଯ୍ୟ ଚାଲିଛି ଓ ହରିଣଙ୍କ ପାନୀୟ ଜଳ ପାଇଁ କୃତ୍ରିମ ଜଳାଶୟ ସୃଷ୍ଟି କରାଯାଇଥିବା ସେ କହିଛନ୍ତି ।

ଅନ୍ୟପଟେ ଆସ୍କା ଓ ଭଞ୍ଜନଗର ଅଂଚଳରେ ଥିବା ବିରଳ କୃଷ୍ଣସାର ମୃଗଙ୍କ ପାଇଁ ପାଇଲଟ ପ୍ରୋଜେକ୍ଟ ଆରମ୍ଭ କରାଯିବ । ପ୍ରଥମେ ଏକ ଏକର ଜମିରେ ଏହି ପ୍ରୋଜେକ୍ଟ ଆରମ୍ଭ କରାଯିବାକୁ ଯୋଜନା କରାଯାଇଥିବା ବେଳେ ପରେ ଏଥିପାଇଁ ୫୦ ଏକର ଜମି କିଣାଯିବ । ଏହି ଜମିରେ ମୃଗଙ୍କ ପାଇଁ  ଘାସ, ମୁଗ, ବିରି, କୋଳଥ ଆଦି ବୁଣାଯିବ ବୋଲି ସେ ସୂଚନା ଦେଇଛନ୍ତି ।

ତେବେ ଏହି ପ୍ରୋଜେକ୍ଟର ବାସ୍ତବତାକୁ ନେଇ ସନ୍ଦେହ ପ୍ରକଟ କରିଛନ୍ତି ବରିଷ୍ଠ ସାମ୍ବାଦିକ ଦେବେନ୍ଦ୍ର ପୃଷ୍ଟି । ବନ୍ୟ ପଶୁଙ୍କ ରକ୍ଷଣାବେକ୍ଷଣ ପାଇଁ କୋଟି କୋଟି ଟଙ୍କା ମଞ୍ଜୁର ହେଉଥିବା ବେଳେ କିଛି ଅସାଧୁ ବ୍ୟକ୍ତିଙ୍କ ବାଟମାରଣା ଯୋଗୁଁ ପ୍ରକଳ୍ପ ଫେଲ ମାରୁଥିବା ସେ କହିଛନ୍ତି ।

ବାଘ ଓ ହାତୀଙ୍କ ରକ୍ଷଣାବେକ୍ଷଣ ପାଇଁ ପୂର୍ବରୁ ରାଜ୍ୟ ସରକାର ଏହି ଭଳି ପ୍ରକଳ୍ପ କରିଥିଲେ ମଧ୍ୟ ଏହା ଫେଲ ମାରିଥିବା ନଜିର ରହିଛି । ତେବେ କୃଷ୍ଣସାର ମୃଗଙ୍କ ପାଇଁ ହେବାକୁ ଯାଉଥିବା ଏହି ପାଇଲଟ ପ୍ରୋଜେକ୍ଟ କେତେ ସଫଳ ହେବ ତାହା ସମୟ କହିବ ।