କଟକ ଶିଶୁଭବନର ସତ୍ୟତା: ବାହାରକୁ ଚକ୍‌ଚକ୍, ଭିତରେ ଫମ୍ପା...

କଟକ: ଆଜିର ଶିଶୁ କାଲିର ଭବିଷ୍ୟତ ବୋଲି କୁହାଯାଏ । ଆଉ ସ୍ୱାସ୍ଥ୍ୟ ହିଁ ସମ୍ପଦ ବୋଲି ମଧ୍ୟ କୁହାଯାଇଥାଏ । ତେବେ କାଲିର ଭବିଷ୍ୟତଙ୍କ ସ୍ୱାସ୍ଥ୍ୟକୁ ନେଇ ସରକାରଙ୍କ ବ୍ୟବସ୍ଥା ସମ୍ପୂର୍ଣ୍ଣ ଫେଲ୍ ମାରିଥିବା ଭଳି ବୋଧ ହେଉଛି । ଏହା ଓଡ଼ିଶାର ସବୁଠାରୁ ବଡ଼ ଚିକିତ୍ସାଳୟ ଶିଶୁଭବନର ବ୍ୟବସ୍ଥା ଦେଖି ଆମେ ନିଶ୍ଚିତ କହିପାରିବା । କଟକ ଶିଶୁଭବନର ବ୍ୟବସ୍ଥା ଓ ସେବା ସୀମିତ ରହିଯାଇଛି କେବଳ ବାହ୍ୟ ଚାକଚକ୍ୟରେ ।

ବ୍ୟାପକ ଅବ୍ୟବସ୍ଥା ଭିତରେ ରାଜ୍ୟର ଶିଶୁଙ୍କ ଚିକିତ୍ସା ପାଇଁ ଉତ୍ସର୍ଗୀକୃତ କଟକ ଶିଶୁଭବନ । ନା ଅଛି ଯଥେଷ୍ଟ ବେଡ୍, ନା ଅଛି ଅପରେସନ୍ ଥିଏଟର, ନା ଅଛନ୍ତି ପର୍ଯ୍ୟାପ୍ତ ଡାକ୍ତର, ନା ଅଛି ପରିଷ୍କାର-ପରିଚ୍ଛନ୍ନତା ଆଉ ନା ଅଛି ଚିକିତ୍ସାର ସୁବ୍ୟବସ୍ଥା । ଏଭଳି ବ୍ୟାପକ ଅବହେଳାରେ ଚାଲିଛି ବାହାରକୁ ଚକାଚକ୍ ଦେଖାଯାଉଥିବା କଟକ ଶିଶୁଭବନ । ବ୍ୟବସ୍ଥାକୁ ନେଇ ଅସନ୍ତୋଷ ଥିଲେ ମଧ୍ୟ ନିରୁପାୟ ହୋଇ ବଡ଼ ମେଡିକାଲ ଭାବି ଦୁରଦୂରାନ୍ତରୁ ଧାଇଁ ଆସୁଛନ୍ତି କଟକ ଶିଶୁଭବନକୁ ଅଭିଭାବକମାନେ ।

ପ୍ରକାଶ ଥାଉ କି, ପ୍ରତ୍ୟେକ ଦିନ ଆଉଟ୍‌ଡୋର୍‌ରେ 400ରୁ ଅଧିକ ଶିଶୁ ଚିକିତ୍ସା ହେବାକୁ ଆସିଥାନ୍ତି କଟକ ଶିଶୁଭବନକୁ । ପ୍ରାୟ 70ରୁ 100 ଶିଶୁ ପ୍ରତିଦିନ ଆଡ୍‌ମିଶନ ହୁଅନ୍ତି । ସେହିପରି ପ୍ରତ୍ୟେକ ଦିନ 400ରୁ ଅଧିକ ଶିଶୁ ଏଠାରେ ଜନ୍ମ ନେଇଥାନ୍ତି । ତେବେ ଆଜିକୁ ଦୀର୍ଘ ଦିନ ଧରି ଓଟି ବା ଅପରେସନ୍ ଥିଏଟର ଅଚଳ ହୋଇ ପଡିଥିବା ସୂଚନା ରହିଛି ।

ଶିଶୁଙ୍କ ସ୍ୱାସ୍ଥ୍ୟ ନେଇ ସାଧାରଣତଃ ସମ୍ୱେଦନଶୀଳ ହୋଇପଡିଥାନ୍ତି ବାପା-ମାଆ । ଏଭଳିସ୍ଥଳେ ଶିଶୁଭବନର ଅବ୍ୟବସ୍ଥା ଯନ୍ତ୍ରଣାଦାୟକ ହୋଇଥିଲେ ହେଁ ସରକାରଙ୍କ କିନ୍ତୁ ନିଘା ନାହିଁ । ବର୍ଷା ଋତୁ ସମୟରେ ରୋଗ ପ୍ରତିରୋଧକ ଶକ୍ତି କମ୍ ଥିବାରୁ ସାଧାରଣତଃ ଶିଶୁଙ୍କୁ ସଂକ୍ରମଣ ହୋଇଥାଏ । ଫଳରେ ଜୁଲାଇ, ଅଗଷ୍ଟ, ସେପ୍ଟେମ୍ୱର ଓ ଅକ୍ଟୋବର ଏହି ଚାରି ମାସରେ ଶିଶୁଙ୍କ ସ୍ୱାସ୍ଥ୍ୟ ବିଗିଡିବାର ସମ୍ଭାବନା ଅଧିକ ଥାଏ । ତେବେ 2017 ଜୁଲାଇ ମାସରେ 196, ଅଗଷ୍ଟ ମାସରେ 195, ସେପ୍ଟେମ୍ୱର ମାସରେ 196 ଓ ଅକ୍ଟୋବର ମାସରେ 106ଜଣ ଶିଶୁଙ୍କ ମୃତ୍ୟୁ ହୋଇଥିଲା । ସେହିପରି 2018 ଜୁଲାଇରେ 179, ଅଗଷ୍ଟରେ 225, ସେପ୍ଟେମ୍ୱରରେ 224 ଓ ଅକ୍ଟୋବରରେ 198 ଜଣ ଶିଶୁ ପ୍ରାଣ ହରାଇଥିଲେ ବୋଲି ଖୋଦ୍ ସରକାରୀ ତଥ୍ୟ କହୁଛି ।

ତେବେ ଆଗକୁ ବର୍ଷା ଆସୁଥିବା ବେଳେ ସରକାର ବିଗତ ଓ ଗତ ବର୍ଷର ଶିଶୁ ମୃତ୍ୟୁକୁ ନଜରରେ ରଖି କିପରି ନିଜକୁ ଓ ସର୍ବବୃହତ ମେଡିକାଲ ଶିଶୁଭବନକୁ ପ୍ରସ୍ତୁତ କରିନାହାନ୍ତି ? ତାହା ସବୁଠାରୁ ବଡ଼ ପ୍ରଶ୍ନ । କଣ ସରକାରଙ୍କ ପାଇଁ ଶିଶୁଙ୍କ ଜୀବନ ଓ ଶିଶୁଭବନର ସ୍ୱାସ୍ଥ୍ୟ ସେବା କେବଳ ବାହାର ଚାକଚକ୍ୟରେ ସୀମିତ ?