କୋରୋନା ପାଇଁ ଉଚ୍ଚସ୍ତରୀୟ ବୈଠକ; ସୁସ୍ଥଲୋକଙ୍କୁ ଲୋଡ଼ା ନାହିଁ ମାସ୍କ ଓ ସାନିଟାଇଜର, ଆକ୍ରାନ୍ତଙ୍କୁ ମିଳିବ ମାଗଣାରେ
ଭୁବନେଶ୍ୱର: କରୋନା ଆକ୍ରାନ୍ତଙ୍କୁ ସରକାର ମାଗଣାରେ ଦେବେ ମାସ୍କ ଏବଂ ସେନିଟାଇଜର । କରୋନାକୁ ନେଇ ଭୟଭିତ ହୁଅନ୍ତି ନାହିଁ । ସମସ୍ତଙ୍କ ପାଇଁ ମାସ୍କ ଏବଂ ସେନିଟାଇଜର ଜରୁରୀ ନୁହେଁ । କେବଳ ଥଣ୍ଡା କାଶ ହେଉଥିବା ବ୍ୟକ୍ତି ମାସ୍କ ଏବଂ ସେନିଟାଇଜର ବ୍ୟବହାର କରିବା ଅତ୍ୟନ୍ତ ଜରୁରୀ । ଭୁବନେଶ୍ୱର ଆରଏମଆରସିରେ ଖୁବଶୀଘ୍ର କରୋନା ଟେଷ୍ଟିଂ କରିବାର ବ୍ୟବସ୍ଥା କରାଯିବ । ରାଜ୍ୟ ସ୍ୱାସ୍ଥ୍ୟସଚିବ ନିକୁଞ୍ଜ ଧଳ ସୂଚନା ଦେଇଛନ୍ତି ।
କୋରୋନା ମୁକାବିଲା ପାଇଁ ଆଜି ଲୋକସଭା ଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ରାଜ୍ୟ ସ୍ୱାସ୍ଥ୍ୟ ସଚିବଙ୍କ ସହ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ ହର୍ଷବର୍ଦ୍ଧନ ଭିଡିଓ କନ୍ଫେରେସିଂ ଜରିଆରେ ଏହି ବୈଠକର ପରିଚାଳନା କରିଥିଲେ । କରୋନା ମୁକାବିଲା କରିବା ପାଇଁ ଅନ୍ୟ ବିଭାଗକୁ ସାମିଲ କରିବା ପାଇଁ କେନ୍ଦ୍ରମନ୍ତ୍ରୀ ନିର୍ଦେଶ ଦେଇଛନ୍ତି । ଖାସକରି ବିଦ୍ୟାଳୟ ଓ ଗଣଶିକ୍ଷା ବିଭାଗ ଏବଂ ମହିଳା ଓ ଶିଶୁ କଲ୍ୟାଣ ବିଭାଗର ସହଯୋଗର ଆବଶ୍ୟକତା ରହିଛି ବୋଲି ସ୍ୱାସ୍ଥ୍ୟ ସଚିବ ସୂଚନା ଦେଇଛନ୍ତି । ଅନ୍ୟପଟେ କୋରୋନାକୁ ଦୃଷ୍ଟିରେ ରଖି ସ୍କୁଲ ମାନଙ୍କରେ ପ୍ରାର୍ଥନା ଉପରେ ରୋକ ଲଗାଯିବ ବୋଲି ଗଣଶିକ୍ଷା ମନ୍ତ୍ରୀ କହିଛନ୍ତି ।
ଭାରତର ଏବେ ସୁଧା କୋରୋନା ଆକ୍ରାନ୍ତଙ୍କ ସଂଖ୍ୟା 31 ଛୁଇଁଲାଣି । ଏହାର ମୁକାବିଲା ପାଇଁ ଘନ ଘନ ବୈଠକ କରାଯାଉଛି । ବିମାନବନ୍ଦର, ଜନଗହଳିପୂର୍ଣ୍ଣ ଅଞ୍ଚଳ, ମେଡିକାଲ, ବସ୍ ଷ୍ଟାଣ୍ଡ, ରେଲୱେ ଷ୍ଟେସନ ପ୍ରବୃତି ଅଞ୍ଚଳରେ ଆବଶ୍ୟକ ଥିଲେ ହିଁ ଯିବା ପାଇଁ ଆଡ୍ଭାଇଜାରି କରାଯାଇଛି । ଏହାସହ ଭାରତର ଚାରି ରାଜ୍ୟ ଦିଲ୍ଲୀ, ଉତ୍ତର ପ୍ରଦେଶ, ରାଜସ୍ଥାନ ଏବଂ ତେଲେଙ୍ଗାନାକୁ କେନ୍ଦ୍ରୀୟ ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ହାଇଆଲର୍ଟ ଜାରି କରାଯାଇଛି । ଓଡିଶାରେ ମଧ୍ୟ ବିଭିନ୍ନ ପଦକ୍ଷେପ ନିଆଯାଉଛି । ପୁରୀକୁ ଆସୁଥିବା ପର୍ଯ୍ୟଟକଙ୍କ ଉପରେ ନଜର ରଖାଯାଇଛି । ଏହାସହ ଭୁବନେଶ୍ୱରର ବିମାନବନ୍ଦରରେ ସ୍କ୍ରିନିଂର ବ୍ୟବସ୍ଥା କରାଯାଇଥିବା ବେଳେ କ୍ୟାପିଟାଲ ହସ୍ପିଟାଲ ଓ ଏସସିବି ମେଡିକାଲରେ କରୋନା ଚିକିତ୍ସା ପାଇଁ ସ୍ୱତନ୍ତ୍ର ୱାର୍ଡର ବ୍ୟବସ୍ଥା କରାଯାଇଥିବା କର୍ତ୍ତୁପକ୍ଷ ପ୍ରକାଶ କରିଛନ୍ତି ।
