ମହିଳାଙ୍କ ପାଇଁ ରୋଜଗାରର ପନ୍ଥା ଦେଲେ ନିରୂପମା, ଘର ଭିତରେ ଛତୁ ଚାଷ କରିବା ଶିଖାଇଲେ

ବାଲେଶ୍ୱର: ଘରର ଚାରିକାନ୍ଥ ମଧ୍ୟରେ ଆଉ ବାନ୍ଧି ହୋଇ ନାହାନ୍ତି ମହିଳା । ନିଜର ଦୃଢ ଇଛାଶକ୍ତି ଥିଲେ ସଫଳତା ଆପେ ଆପେ ମିଳିଯାଏ । ଆମେ ଏଭଳି କହିବାର ଅର୍ଥ, ବାଲେଶ୍ୱର ଜିଲ୍ଲା ରୁପ୍‌ସା ଅଂଚଳର ଜଣେ ଗୃହିଣୀ ନିଜର ଦୃଢ ଇଛାଶକ୍ତି ଯୋଗୁଁ ହୋଇ ପାରିଛନ୍ତି ଜଣେ ସଫଳ ଛତୁ ଚାଷୀ । ଖାଲି ନିଜେ ସଫଳ ହୋଇ ନାହାନ୍ତି, ଆଖପାଖ ଅଞ୍ଚଳର ଦାରିଦ୍ର୍ୟ ସୀମା ରେଖା ତଳେ ଥିବା ମହିଳାମାନଙ୍କୁ ଗାଁ ଗାଁ ବୁଲି ବାଣ୍ଟୁଛନ୍ତି ସ୍ୱାବଲମ୍ବୀ ହେବାର ଗୁରୁମନ୍ତ୍ର । ଯାହା ତାଙ୍କୁ ଦେଉଛି ଆତ୍ମ ସନ୍ତୋଷ ।

ବାଲେଶ୍ୱର ଜିଲ୍ଲା ସଦର ବ୍ଲକର ରୁପ୍‌ସା କସିପଦା ଗାଁ । ପାଖାପାଖି 20 ହଜାରରୁ ଅଧିକ ଲୋକ ଏଠାରେ ବାସ କରନ୍ତି । ଆଉ ଏଠାରେ ରହିଥାନ୍ତି ନିରୂପମା ବେହେରା । ଶିକ୍ଷାଗତ ଯୋଗ୍ୟତା ହେଉଛି ଯୁକ୍ତ ଦୁଇ (କଳା ବିଭାଗ) । ପ୍ରତ୍ୟେକ ଘରର ମହିଳାଙ୍କ ପରି ନିରୂପମା ମଧ୍ୟ ଘରର କାମଦାମ କରନ୍ତି । କୃଷକ ମିତ୍ର ଭାବେ କାର୍ଯ୍ୟ ମଧ୍ୟ କରନ୍ତି । କିନ୍ତୁ ଏତିକିରେ ତାଙ୍କ ମନ ବୁଝେନି । ନିଜ ପାଇଁ ନୁହଁ, ଅନ୍ୟ ମାନଙ୍କ ପାଇଁ କିଛି କରିବାର ସ୍ୱପ୍ନ ଦେଖନ୍ତି ସେ ।

ଏହି ସମୟ ମଧ୍ୟରେ ତାଙ୍କ ସ୍ୱାମୀ ବିଦ୍ୟାଧର ଏକ ପ୍ରସ୍ତାବ ଦିଅନ୍ତି, ଆଉ ପ୍ରସ୍ତାବ ମନକୁ ଛୁଇଁବାରୁ ରାଜି ହୋଇଯାଆନ୍ତି ନିରୂପମା । ତେବେ ସ୍ୱାମୀଙ୍କ ପ୍ରସ୍ତାବ ଥିଲା ଛତୁ ଚାଷ କରିବା ଆଉ ତାହା ପୁଣି ଘର ଭିତରେ । ପ୍ରଥମେ ସେ ଧିଙ୍ଗିରୀ ଛତୁ ଚାଷକରି ସଫଳ ହୋଇ ମାସକୁ 5 ହଜାର ରୋଜଗାର କରିଥିଲେ । ପରେ ଅନ୍ୟକୁ ଏହି ଛତୁ ଚାଷ ମାଧ୍ୟମରେ ରୋଜଗାର ଦେବାର ନିଶା ଘାରିଲା ନିରୂପମାଙ୍କୁ । ପ୍ରଥମେ ଗାଁରେ ଥିବା ଗରିବ ଆଦିବାସୀ ଓ ଅନ୍ୟ ମହିଳା ମାନଙ୍କୁ ନିଜ ସଫଳତାର କାହାଣୀ କହିବା ସହ ଘରେ ରହି କିପରି ଟଙ୍କା ରୋଜଗାର କରି ହେବ ସେନେଇ ବାଣ୍ଟି ଚାଲିଲେ ଗୁରୁମନ୍ତ୍ର । ନିରୂପମାଙ୍କ ଏହି ଗୁରୁମନ୍ତ୍ରକୁ ବର୍ତ୍ତମାନ ଆପଣେଇ ନେଇଛନ୍ତି ରୁପ୍‌ସା ଅଞ୍ଚଳର ମହିଳା । ଘରେ ଘରେ ଏହି ଧିଙ୍ଗିରୀ ଛତୁ ଚାଷ କରି ମହିଳା ମାନେ ବେଶ୍‌ ଦୁଇ ପଇସା ରୋଜଗାର କରି ପାରୁଛନ୍ତି ।

ସକାଳ ହେଲେ ନିରୂପମା ନିଜ ଘରର ସମସ୍ତ କାର୍ଯ୍ୟ ସାରିଦେଇ ସ୍ୱାମୀ ବିଦ୍ୟାଧରଙ୍କ ଗାଡ଼ିରେ ବସି ବାହାରି ପଡନ୍ତି ମହିଳାମାନଙ୍କୁ ଛତୁ ଚାଷ ବିଷୟରେ ତାଲିମ ଦେବା ପାଇଁ । ଗାଁରେ ମହିଳାଙ୍କୁ ଡାକି କୁଟା ବା ନଡ଼ାକୁ କିପରି କାଟିବେ, କିପରି ଭାବେ ଜରିରେ ପୁରାଇ ଛତୁ ମଞ୍ଜି ବୁଣାଯିବା ସହ ପ୍ୟାକିଙ୍ଗ ଓ ଯତ୍ନ କିପରି ନେବେ ସେ ସମ୍ପର୍କରେ ନିଜେ ଶିଖାଇ ଥାନ୍ତି । ଆଉ କାହାର ଛତୁର ଗୁଣବତ୍ତା କିପରି ଉତ୍କୃଷ୍ଟ ହେବ ତାହାର ତଦାରଖ କରି ମହିଳା ମାନଂକୁ ବୁଝାଇ ଦିଅନ୍ତି । ମହିଳାମାନେ ନିରୂପମାଙ୍କ ଏଭଳି କାର୍ଯ୍ୟ, ଭଲ ବ୍ୟବହାର ଓ ଟଙ୍କା ରୋଜଗାର କରିବାର ପରାମର୍ଶକୁ ସହଜରେ ବୁଝି ଗାଁ ଗାଁରେ ଆରମ୍ଭ କରିଛନ୍ତି ଏହି ଧିଙ୍ଗିରୀ ଛତୁ ଚାଷ ।

ନିରୂପମାଙ୍କର ଏପରି ଇଛାଶକ୍ତି, କଠିନ ପରିଶ୍ରମ ଓ ଅନ୍ୟମାନଙ୍କ ମନରେ ଖୁସି ଦେଖି ସ୍ୱାମୀ, ଶାଶୁ ଓ ପରିବାର ସଦସ୍ୟମାନେ ବି ପୁର୍ଣ ସହଯୋଗ କରନ୍ତି । ପାଖ ପଡିଶା ମଧ୍ୟ ନିରୂପମାଙ୍କର ଏଭଳି କାର୍ଯ୍ୟକୁ ବେଶ ପ୍ରଶଂସା କରନ୍ତି । ଯାହା ନିରୂପମାଙ୍କୁ ବେଶ ଉତ୍ସାହିତ କରିଥାଏ ।

ନିରୂପମା ନିଜେ ଗୃହିଣୀ ହୋଇ ମଧ୍ୟ ସ୍ୱାବଲମ୍ବୀ ହେବା ସହିତ ତାଂକ ଅଂଚଳର ଗୃହିଣୀ ମାନଂକୁ ରୋଜଗାରକ୍ଷମ ହେବା ପାଇଁ ଯେଉଁ ରାସ୍ତା ଦେଖେଇଛନ୍ତି, ତାହା ବାସ୍ତବରେ ସ୍ୱାଗତଯୋଗ୍ୟ । ସରକାର ଆଜି ମହିଳା ସଶକ୍ତିକରଣ ନାଁରେ ଡିଣ୍ଡିମ ପିଟୁଥିବା ବେଳେ, କେବଳ ନିରୂପମାଙ୍କ ଭଳି ଉଦ୍ୟୋଗୀ ହିଁ ନିଜ ବଳରେ ଅନ୍ୟ ମହିଳାଙ୍କୁ ସଶକ୍ତ କରିପାରିବେ, ଏହା ନିଃସନ୍ଦେହରେ କୁହାଯାଇପାରେ ।