ପ୍ରଜାତନ୍ତ୍ରର ମତକୁ ମୁଣ୍ଡପାତି ସ୍ୱୀକାର କରୁଛି: ଧର୍ମେନ୍ଦ୍ର

ଭୁବନେଶ୍ୱର: ଜନାଦେଶ 2019ର ଫଳାଫଳ ଜଣାପଡ଼ିଯାଇଛି । ବିଜେପିର 120ର ମିଶନ୍ ଫେଲ୍ ମାରିଥିଲେ ମଧ୍ୟ 2014 ନିର୍ବାଚନ ତୁଳନାରେ ବିଜେପିକୁ ଅଧିକ ଜନସମର୍ଥନ ମିଳିଛି । 8ଟି ଲୋକସଭା ଓ 23ଟି ବିଧାନସଭାରେ ବିଜୟ ହୋଇଛନ୍ତି ବିଜେପି ପ୍ରାର୍ଥୀ । ଏନେଇ ଓଡ଼ିଶାବାସୀଙ୍କୁ ଧନ୍ୟବାଦ ଜଣାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଓଡ଼ିଶାରେ ଭାରତୀୟ ଜନତା ପାର୍ଟିକୁ ଏକ ବଡ ରାଜନୀତି ସମୂହ ଭାବେ ଓଡିଶାର ଜନସାଧାରଣମାନେ ଆଶୀର୍ବାଦ କରିଛନ୍ତି । ବିଜେପିର 8 ଜଣ ଲୋକସଭା ପ୍ରତିନିଧିଙ୍କୁ ସାଂସଦ ଭାବେ ଦିଲ୍ଲୀ ପଠାଇବା ଏବଂ 23 ଜଣ ବିଧାନସଭା ପ୍ରାର୍ଥୀଙ୍କୁ ନିର୍ବାଚିତ କରିଥିବାରୁ ଓଡିଆ ଲୋକଙ୍କ ପାଖରେ କୃତଜ୍ଞତା ଜ୍ଞାପନ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଓଡ଼ିଶାର ଲୋକସଭା ଓ ବିଧାନସଭା ନିର୍ବାଚନ ଫଳାଫଳ ପରିପ୍ରେକ୍ଷୀରେ ସାମାଜିକ ଗଣମାଧ୍ୟମରେ ଏପରି ମତ ରଖିବା ସହ ପ୍ରଜାତନ୍ତ୍ରରେ ଓଡିଶାବାସୀଙ୍କ ଜନମତ ଓ ନିଷ୍ପତିକୁ ସେ ମୁଣ୍ଡପାତି ସ୍ୱୀକାର କରୁଥିବା କହିଛନ୍ତି । ଏହାସହ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପଂଚମ ଥର ମୁଖ୍ୟମନ୍ତ୍ରୀ କରିବା ପାଇଁ ଓଡ଼ିଶାବାସୀ ଆସ୍ଥା ସ୍ଥାପନ କରିଛନ୍ତି । ରାଜ୍ୟର ପଂଚମ ଥର ମୁଖ୍ୟମନ୍ତ୍ରୀ ହେବା ପାଇଁ ଶ୍ରୀ ପ୍ରଧାନ ଶ୍ରୀ ପଟ୍ଟନାୟକଙ୍କୁ ଅଭିନନ୍ଦନ ମଧ୍ୟ ଜଣାଇଛନ୍ତି ।

କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ ଦେଶରେ ଲୋକସଭା ଓ ଓଡ଼ିଶାର ବିଧାନସଭା ନିର୍ବାଚନ ଫଳାଫଳ ଏକପ୍ରକାର ଘୋଷିତ ହୋଇସାରିଛି । ଓଡ଼ିଶାରେ ସଫଳ ନିର୍ବାଚନ ପାଇଁ ଶ୍ରୀ ପ୍ରଧାନ ଓଡିଶାର ଜନସାଧାରଣଙ୍କ ପାଖରେ କୃତଜ୍ଞତା ଜ୍ଞାପନ କରିବା ସହ କହିଛନ୍ତି ଯେ ପ୍ରଜାତନ୍ତ୍ରର ମତକୁ ମୁଣ୍ଡପାତି ସ୍ୱୀକାର କରିବାର ଆବଶ୍ୟକତା ରହିଛି । ଓଡ଼ିଶାରେ ଗତ 2014 ନିର୍ବାଚନ ତୁଳନାରେ ଚଳିତ 2019 ନିର୍ବାଚନରେ ଓଡ଼ିଶାବାସୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିଶ୍ୱାସ କରି ରାଜ୍ୟ ବିଜେପି ଉପରେ ଏକ ଅଭୂତପୂର୍ବ ଜନଆଶୀର୍ବାଦ କରିଛନ୍ତି । ଗତ 2014 ନିର୍ବାଚନରେ ଓଡ଼ିଶାରୁ ବିଜେପି ନେତା ଜୁଏଲ ଓରାମ କେବଳ ଲୋକସଭା ଆସନରୁ ନିର୍ବାଚିତ ହୋଇଥିବା ବେଳେ ଚଳିତ ଥର ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦ ଭାବରେ ମୋଦିଙ୍କ ପାଇଁ ଓଡିଶାବାସୀ 8 ଜଣ ସାଂସଦ ପଠାଇଛନ୍ତି । ଓଡ଼ିଶାର ପାଖାପାଖି 1 କୋଟି ଲୋକଙ୍କ ସମର୍ଥନ କରାଣରୁ ଏହା ସମ୍ଭବ ହୋଇପାରିଛି । ବିଜେପି ଏକ ପ୍ରମୁଖ ଦଳ ଭାବେ ଓଡିଶା ଲୋକସଭା ନିର୍ବାଚନରେ ସାମ୍ନାକୁ ଆସିଥିବା ବେଳେ ଏହି ସମର୍ଥନ ପାଇଁ ଓଡିଆ ଲୋକଙ୍କ ପାଖରେ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କୃତଜ୍ଞତା ଜ୍ଞାପନ କରିଛନ୍ତି । ବିଜେପିର ପରାଜୟ ସ୍ଥାନରେ ମଧ୍ୟ ବିଜେପିକୁ ଅଭୁତପୂର୍ବ ଜନସମର୍ଥନ ମିଳିଥିବା ସେ ମତବ୍ୟକ୍ତ କରିଛନ୍ତି ।

ଧର୍ମେନ୍ଦ୍ର ଆହୁରି ମଧ୍ୟ କହିଛନ୍ତି ଯେ, ଓଡ଼ିଶା ବିଧାନସଭାରେ 23 ଜଣ ବିଜେପି ପ୍ରାର୍ଥୀ ଜିତିବା ନେଇ ଦେଖାଯାଇଥିବା ବେଳେ ଦଳର ଆଶାନୁଯାୟୀ ପ୍ରଦର୍ଶନ ହୋଇନାହିଁ କିନ୍ତୁ ଖେଳୁଆଡ ମନୋବୃତି ନେଇ ଆମେ ଏହାକୁ ସ୍ୱୀକାର କରୁଛୁ । ଜନମତକୁ ସ୍ୱୀକାର କରି ମୁଖ୍ୟମନ୍ତ୍ରୀ ଓଡିଆ ଲୋକଙ୍କ ଆସ୍ଥା ହାସଲ କରିଥିବାରୁ ପୁନର୍ବାର ଶ୍ରୀ ପ୍ରଧାନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅଭିନନ୍ଦନ ଜଣାଇଛନ୍ତି ।

ସେ କହିଛନ୍ତି ଓଡିଆ ଲୋକମାନେ ତାଙ୍କ ଦାୟିତ୍ୱ ପୂରଣ କରିଛନ୍ତି । ଓଡ଼ିଶାର ଉପକୂଳ ଅଂଚଳ ସାମୁଦ୍ରିକ ବାତ୍ୟା ଫନୀ ଦ୍ୱାରା ପ୍ରଭାବିତ ହୋଇଥିବା ବେଳେ ଏବେ କେନ୍ଦ୍ର କିମ୍ବା ରାଜ୍ୟ ଓଡିଆ ଲୋକଙ୍କ ଆକାଂକ୍ଷାକୁ ପୂରଣ କରିବାର ସମୟ । ଓଡିଶାକୁ ଏକବିଂଶ ଶତାବ୍ଦୀରେ ଏକ ଅଗ୍ରଣୀ ଅଂଚଳ ଭାବେ ପୂରା କରିବା ପାଇଁ ଓଡିଆ ଲୋକଙ୍କ ଅପେକ୍ଷା ଓ ଆକାଂକ୍ଷାକୁ ପୂରା କରିବାକୁ ହେବ । ନୂଆ କେନ୍ଦ୍ର ଓ ରାଜ୍ୟ ସରକାରମାନେ ଓଡିଶା ଲୋକଙ୍କ ଆକାଂକ୍ଷାକୁ ପୂରଣ କରିବା କାମରେ ଲାଗନ୍ତୁ ବୋଲି କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ।